Sápmi |

Ráji-Jovssehis ii dábálaččat leamaš ná jaskat dán muttus jagi – ruoššaid váilun oidno maid Avvila gávppiin

Suoma ja Ruošša gaskasaš rádjejohtolaga leat ráddjen njukčamánu 2020 rájes koronaepidemiija dihte.

Video: Doaimmaheaddji Linda Tammela ja Lappi rádjegozáhusa vuorrohoavda Ville Katila Rádje-Jovssaha rádjerasttildanbáikkis
Yle Sámi doaimmaheaddji Linda Tammela jearahalai Lappi rádjegozáhusa vuorrohoavda Ville Katila bearjadaga 8.1.21 Ylen aamu -prográmmas. Video: Ylen aamu

Dábálaččat dán muttus áigge Suoma ja Ruošša davimus rádjerásttildanbáikkis Ráji-Jovssehis lea olu olmmoš jođus, muhto dál doppe eai olus dihtto johttit. Suoma ja Ruošša gaskasaš rádjejohtolaga leat ráddjen njukčamánu 2020 rájes koronaepidemiija dihte.

Lappi rádjegozáhusa vuorrohoavda Ville Katila muitala, ahte juovllaid áigge johtolat Rádje-Jovssehis lei geahppánan measta oalát.

– Dábálaččat juovlabasit leat hohpolamos áigi midjiide ja ráji rasttildit dábálaččat 400-800 geardde beaivvis, muhto dál rájá rastá johtet dušše 4-8 olbmo.

Gálvojohtolagas ii leat dáhpáhuvvan nuppástus, gálvvut johtet ain rájá rastá dego ovdalge.

Raja-Joosepin rajavartioasema Inarissa.
Jaskes áigi rádjerasttildanbáikkis lea mearkkašan maid dan, ahte Rádje-Jovssehis leat oanidan rabasáiggiid ja oassi bargiin leat sirdojuvvon Ruoŧa ja Norgga rájáide. Govva: Vesa Toppari / Yle

Ruoššaid váilun oidno maid gávppiin

Jagimolsašumis Ruošša beale olbmuin lea dábálaččat logi beaivvi luopmu ja dalle sii lávejit johttát maid Supmii luopmostallat. Dál go sii eai beasa korona dihte fiesttarii, dat oidno maid Davvi-Suoma gávppiin. Ruošša beale olbmot leat ovdamearkka dihte Avvilis stuorra kundarjoavku dábálaččat.

Henry Kesti
Gávpehoavda Henri Kesti muitala, ahte sii eai leat dál diŋgon hilduid dievva gálvvuid go ruošša áššehasaid váilun oidno sin gálvojohtimis. Govva: Linda Tammela / Yle

Gávpehoavda Henry Kesti Avvilis muitala, ahte kundarat gal leat, nu báikkálaččat go ruovtturiikka mátkkošteaddjit, muhto ruoššat eai leat ollenge. Su mielde ruoššat leat kundarin leamašan jagimolsašumis earenoamáš olu.

Hildogaskkat leat guorosnága ja gálvvut ceaggájit hilduin.

– Mii leat ferten muddet gálvomeriid ovdamearkka dan dihte, ahte mátkkošteaddjit leat geahppánan. Ruoššat ostet dábálaččat šukuláda, bassanávdnasiid ja gáfe, galhan daid johtin leamaš heittot dál, muitala Kesti.

Varrasamosat: Sápmi

Váldoođđasat

Varrasamosat

Muualla Yle.fi:ssä