Sápmi

Rájit leat dušše olbmo miela siste: jorrestuolloextreme meašttir čierastii jorrestuoluin Njuorggángeainnu vulos juobe 50 km/d

Video: Aleksi Kirjonen, Nuorgam
Geahča videos, mo Aleksi Kirjonen čierastallá jorrestuoluin Njuorggámis. Video: Joni Salminen

Aleksi Kirjonen govvii extremefilmmaža Sámis.

Porvoolaš Aleksi Kirjonen geahččá guhkás ovddosguvlui, gos šalkageaidnu jávká čáppa duoddariid gaskii. Son vel stelle suodjegahpira oaivái ja de vuolgá johtui.

Son lea Njuorggámis ja áigu čierastit jorrestuoluin mielli vulos Njuorggángeainnus.

Kirjonen lea leamaš gitta mánnávuođa rájes jorrestuolus. Son árvala, ahte lea sullii 3-jahkásažžan ožžon vuosttaš stuolu. Sutnje jorrestuollu ii leat goassege leamaš eastta, iige dat leat bisánaddan su dahje hehtten – baicce aiddo nuppegežiid.

Muohta lei garra leavttus dorvun

Extremevaláštallamis lea dehálaš vihkkedallat guđege dagu riskkaid.

Ohcejot-Njuorggán guovllus beaivi lei ráfálaš. Ovdal čierasteami Kirjonen ustibiinnis lei vuolginsajis oalle guhká ja dan vuođul soai dulkuiga, ahte geainnus ii leat jur ollenge johtolat.

– Jus biila livččii boahtán, de livččen sáhttán njuiket jorrestuoluin muohttagii, iige das livčče geavvan vearrát. Gal moai leimme dan smiehttan, Kirjonen lohká.

Aleksi Kirjonen Utsjoella
Skibir govvii Kirjonena ovdal mátkki vulos. Govva: Joni Salminen

Sus lei suodjegahpir oaivvis ja skibir bođii maŋis biillain heahtečuovggat alde vai vejolaš eará biillat fuomášivčče Kirjonena.

Báiki válljejuvvui danin, go doppe lei nu earenoamáš čáppa. Kirjonen muitala, ahte mátki vulos lei sullii golbma kilomehtera ja áigi sus golai dasa vihtta minuhta.

– Gaskamearalaččat 36 kilomehtera leavttuin bohten dan mielli vulos fiinna duovdagiidda Njuorggámii, muittaša Kirjonen.

Son árvala iežas johtán muhtin gaskkain jođánappotge, kánske olles 50 kilomehtera diibmoleavttuin.

Áigu ruovttoluotta davás

27-jahkásaš Kirjonen lea geargan bargat nuorra agis fuolatkeahttá juo oba olu. Son lea ovdamearkka dihte oassálastán jagi 2012 Londona lámisolbmuid paralympia-gilvvuide ja vuoitán Eurohpa meašttirvuođagilvvuid jagi 2014.

Dán áigge su váldobargun lea movttiidahttit eará olbmuid roahkkadit geahččalit iešguđetlágán áššiid. Son ávžžuha olbmuid leat beroškeahttá rájiin, mat leat su oainnu mielde dušše olbmo miela siste.

Aleksi Kirjonen Porvoossa
Aleksi Kirjonen lea stuđeren valáštallanbagadallin, muhto dán áigge su bargu lea iežas fitnodagas. Fitnodaga ulbmilin lea movttiidahttit olbmuid. Govva: Linda Tammela / Yle

– Lean háliidan bargat áibbas visot, mii lea beare vejolaš. Lean maid háliidan hástalit iežan. Álo jus bohtet ođđa vejolašvuođat čalmmiid ovdii, de mielas daid bargan, moddjá Kirjonen.

Boahttevuođa extremedaguin son ii vel árval maidege, muhto Njuorggámii son áigu gal máhccat.

– Lea álo somá go leat vehá beaivelottit čoavjjis.

Varrasamosat

Muualla Yle.fi:ssä