Sápmi |

Raporta: Sámedieđu galgá lasihit Suoma skuvllain, nuortalašgiela oahpahusa ovddideapmi hohpolamos ášši – skuvlenčállis nana jáhkku boahttevuhtii

Oahpahus- ja kulturministeriija bargojoavku oaivvilda, ahte sámegielaid ja sámegielat oahpahusa ovddideapmi nana vuođu ala olles riikkas gáibida gáiddusoktavuođaid ja rievdadusaid earret eará ruhtadeapmái.

Ulla Aikio-Puoskari
Sámedikki skuvlenčálli Ulla Aikio-Puoskari lei mielde geigemen gáiddusdilálašvuođas oahpahusministarii ja stáhtačállái viiddes raportta sámegiela ja sámegielat oahpahusa dilis. Govva: Vesa Toppari / Yle

Nuortalašgiela oahpahusa ovddideapmi lea hohpolamos ášši, mii galggašii čovdojuvvot. Dat boahtá ovdan sámegielaid ja sámegielat oahpahusa ovddidanbargojoavkku raporttas, mii odne geigejuvvui oahpahusministtar Jussi Saramoi.

Bargojoavku evttoha maiddái nannet árrabajásgeassima earenoamážit sámiid ruovttuguovllu olggobealde ja obalohkái lasihit sámedieđu oahpahusa skuvllain.

Vai sámegielaid ja sámegielat oahpahusa sáhttá ovddidit nana vuođu ala, gáibida dat bargojoavkku oainnu mielde gáiddusoktavuođaiguin ávkkástallama ja rievdadusaid earret eará ruhtadeapmái.

Ulla Aikio-Puoskari sámegielaid ja sámegielat oahpahusa ovddidanbargojoavkku raporttas Jietna: Linda Tammela / Yle

Skuvlenčálli sávvá raportta čuollat sámeoahpahussii buoret boahtteáiggi

Oahpahus- ja kulturministeriija ásahii guovvamánus 2020 ovddidanbargojoavkku, man bargun lei guorahallat sámegielat árrabajásgeassima ja sámeoahpahusa dili Suomas.

Skuvlenčálli Ulla Aikio-Puoskari leamaš Sámedikki ovddasteaddjin bargojoavkkus. Su mielas vuoigŋa sihke Suoma dálá ráđđehusas ja bargojoavkkus leamaš buorre. Danin sus leage nana jáhkku dasa, ahte áššit bohtet ovddiduvvot.

– Mus lea dakkár govva dál, ahte mis lea guhkes áigái dakkár ráđđehus, mii lea váldán min hui duođas. Miihan leat Sámedikki beales várra 20 jagi iskan daid áššiid ovddidit Suoma skuvlenpolitihkas ja dál mii beasaimet hirbmat bures fártii, illuda Aikio-Puoskari.

Son sávvá bargojoavkku barggu bohtosiid čuollat bálgá buoret boahttevuhtii nu, ahte viđa jagi geažes sámeoahpahusas livčče eanet resurssat, sámegielagiid skuvlabálggis livččii ollislaš, sámegielat ealáskivčče sámegielat árrabajasgeassima oahpahusa bokte, sámegielaid oahpahivčče vierisgiellan ja olles Suomas oahpahivčče viidát sápmelaččaid birra.

Oahpahusministtar: "Sámegielat oahppomateriálaid dárbu lea čielggas"

Oahpahusministtar Jussi Saramo muitalii gáiddusin ordnejuvvon geigendilálašvuođas, ahte mearrádus bargojoavkku ásaheames leamaš duohta dehálaš.

Jussi Saramo
Oahpahusministtar Jussi Saramo válddii vuostá viiddis raportta das, makkár dilli Suomas lea sámegiela ja sámegielat oahpahusas. Govva: Alexander Uggla / Yle

Oktan mearkkašahtti áššin Saramo loktii boarásmuvvan oahppomateriálaid ja daid ovddideame.

– Sámegielat oahppomateriála dárbu lea čielggas. Boarásmuvvan oahppomateriála galgá ođasmahttit ja ođđa oahppomateriáladárbbuide galgá bastit vástidit, oaivvilda Saramo.

Son oaivvilda maiddái, ahte sámedieđu lasiheapmi oahppomateriálaid bokte obalohkái lea mearkkašahtti.

Bargojoavkku doaibma leamaš hui viiddis. Saramo logai sáhkavuorustis, ahte raporta sárgu dárkilis gova sámegielat ja sámegiela oahpahusa dilis.

– Raporta bidjá čielgasit mihttomeriid dasa, mo sápmelaččaid gielalaš ja kultuvrralaš rievttit ollašuvašedje skuvlejumi giettis, ministtar dadjá.

Saramo atná dehálažžan dan, ahte sámegielat ja sámegiela oahpahusa leat guorahallan ollisvuohtan ja das lea hábmejuvvon bálggis árrabajasgeassimis ovda- ja vuođđoskuvlii ja ain nubbi dássái ja universitehta dássái.

Áššis oainnát lasi Yle Ođđasat -sáddagis diibmu 15.45. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä