Sápmi |

Rávvehagain oažžumis sámegielat girjeseahka mánáide maŋimuštá boahtte jagi álggus

Sámegielat girjeseahkas lea máinnasgirjji lassin maiddái diehtu lohkamis ja dan dehálašvuođas.

Máinnasskeaŋka-girjji bearbma
Máinnasskeaŋka-girjji bearpma hámus. Govva: Lukukeskus

Rávvehagain sáhttá fargga oažžut sámegielat girjeseahka mánáide, go Lohkanskeaŋka mánnái -prográmma (su. Lukulahja lapselle) viidu maiddái sámegielaide.

Suoma Kulturruhtaráju ruhtadan prográmmain háliidit dahkat jitnosit lohkama vejolažžan buot bearrašiidda. Prográmmas juhket girjeseahkaid buot mánáide, geat leat riegadan jagiin 2019–2021.

Sámegielat girjeseahkas lea máinnasgirji, masa leat jorgaluvvon máidnasat buot golmma Suomas hállon sámegielaide. Girjji lassin sehkkii lea páhkkejuvvon nu gohčoduvvon lohkanmihttu, mas lea diehtu iešguđege ahkásaš mánáid lohkamis, ja vánhemiidda infočálus mánnái lohkama dehálašvuođas.

Máinnasskeaŋka-girjái leat čállán mánáidgirječállit Veera Salmi, Timo Parvela, Reetta Niemelä, Anneli Kanto sihke Kerttu Vuolab. Máidnasiid leat jorgalan sámegielaide Arla Magga, Anna-Katariina Feodoroff ja Neeta Jääskö.

Prošeaktahoavda ávžžuha vánhemiid muittuhit rávvehagaid dán fálaldagas

Lohkanskeaŋka mánnái -prošeavtta prošeaktahoavda Emmi Jäkkö muitala, ahte sámegielat girjeseahkat galggaše leat oažžumis maŋimustá boahtte jagi álggus.

– Girjjit leat dál vátnama váile válbmasat mannat prentehussii. Várra dán jagi bealde rávvehagat sáhttet álgit dahkat vuosttaš diŋgojumiid, muhto maŋimuštá jagi álggus seahkat galggaše boahtit bearrašiidda, Jäkkö árvala.

Rávvehagat sáhttet diŋgot girjeseahkaid nuvttá Lukukeskusis. Rávvehagaid áigot farga dieđihit dárkilabbot sámegielatgirjeseahkaid diŋgomis, muhto Jäkkö ávžžuha maiddái vánhemiid muittuhit rávvehagaid dákkár vejolašvuođas.

– Rávvehaga dearvvašvuođadikšu sáhttá diŋgot mis dan meari seahkaid, maid son dáin gielain dárbbaša. Sámeguovllu rávvehagaiguin ráđđádallat njuolga, ahte mii dat dárbu lea. Movttiidivččen maiddái bearrašiid muittuhit iežaset dearvvašvuođadikšuid dán vejolašvuođas, ahte dákkára sáhttá bearašii diŋgot, dadjá Jäkkö.

Varrasamosat: Sápmi

Váldoođđasat

Varrasamosat

Muualla Yle.fi:ssä