Sápmi |

Reakšuvnnat A-studio sápmelašságastallamis: "Suopmelaš doaimmaheaddjit eai ádde sámeáššiid"

Suoma riikkaviidosaš A-studio TV-sáddaga sámeságastallan vásihuvvui bealálažžan. Yle áigeguovdilis doaimma hoavda Riitta Pihlajamäki mielas ášši lea dahkkojuvvon dábálaš journalisttalaš vuogi mielde.

Video: A-studios Anu Avaskari ja Jan Saijets
Video

Gaskavahku eahkedis sáddejuvvui Yle TV 1 -kanalas Suoma riikaviidosaš sáddagis A-studio ságastallan, mas lei fáddán “gii lea sápmelaš”. Guossin studios leigga sámediggeáirras guovttos Anu Avaskari ja Jan Saijets. Dasa lassin čájehuvvojedje ovddal gihtii davvin báddejuvvon oasit, main ledje mielde earret eará Sámedikki ságadoalli Tiina Sanila-Aikio, Sámedikki ovddeš ságadoalli Klemetti Näkkäläjärvi, Ohcejoga gielddaráđđehusa lahttu Anni Koivisto, sámediggeáirras Kari Kyrö ja eanodatlaš boazodoalli Tuomas Keskitalo.

Ovdal TV-sáddaga almmustahtte guhkes neahttaođđasa, mii ii lean buot sámiid mielas vuohkkasit čállojuvvon, dan atne baicce dakkárin, mii váldá beali.

Nuorra sápmelačča mielas áššis livčče galgan muitalit sápmelaš iige suopmelaš doaimmaheaddji

Artihkkala lei čállán suopmelaš journalista. Suoma Sámi Nuoraid ságadoalli Petra Laiti oaivvilda, ahte áššis livčče galgan čállit ođđasa sápmelaš journalista, ii suopmelaš. Laiti lei gaskavahku eahket hui erdon ja dolkan.

– Mii eat goassige dieđe áddejitgo suopmelaš doaimmaheaddjit sámi áššiid riekta, beaškala Petra Laiti.

Guldal Petra Laiti jearahallama Yle Areenas dáppe.

Jietna: Petra Laiti
Jietna

Sosiála medias civke viššalit fáttás

Sosiála medias civke gaskavahko eahkes viššalit prográmma birra. Ovdamearkka dihte ovddeš vuoigatvuohtaminister ja dálá bargominister Jari Lindström čálii Twitteras, ahte vaikko son lea veháš oahpásnuvvan fáddái, de son ii sáhte dadjat áššis maidege, go ahte son ii leat oahpásnuvvan fáddái doarvái.

– Leat nu váttis áššit, cealká Lindström.

Jarin Lindström civkin.
Jarin Lindström civkin. Govva: Šearbmagovva Jari Lindström civkimis.

Sámedikki áirras Neeta Jääskö čállá Twitter-konttustis, ahte dego ikte dadjen, ii miige ođđa sisdoaluid dahje oainnuid boađe ovdan jus studioi váccihuvvojit jagis nubbái seamma olbmot seamma árgumenttaiguin. Fargga juo gergen gáddit, ahte livččiimet beassan dás ovddosguvlui.

Riikkabeaiáirras Mikko Kärnä bealistis čálii iežas politihkkár Facebook-siiddusti gaskavahku, ahte otne gánniha geahččat A-studio. Nana áššit boahtimin sámeáššiin. Ieš lean bealušteamen vuoiggalašvuođa ja ovttaveardásašvuođa.

Mikko Kärnä ávžžuha geahččat A-studio
Mikko Kärnä ávžžuha geahččat A-studio Govva: Šearbmagovva Mikko Kärnä politihkársiiddus Facebookas.


Yle áigeguovdilis doaimma vástádus: Ášši lea dahkkojuvvon dábálaš journalisttalaš vuogi mielde

Yle áigeguovdilis doaimma hoavda Riitta Pihlajamäki, guhte maid vástida A-studio-prográmmas dadjá, ahte Yle A-studio "gii lea sápmelaš" -ságastallan ja ášši leat dahkkojuvvon dábálaš journalisttalaš vuogi mielde.

–Jus mii válljet man nu fáttá, de galgágo mis leat álot man nu servošis ovddasteaddji. Dathan ii lea journalismma dáfos jierpmálaš. Dát journalisttalaš proseassa lea hui dábálaš, dadjá Pihlajamäki.

Pihlajamäki deattuha, ahte ášši dagadettiin doaimmahus ja doaimmaheaddji leat dahkan viiddis duogášbarggu ja jearahallan máŋggaidlogiid olbmuid prográmma dagadettiin.

Jietna: Riitta Pihlajamäki.
Jietna

– Dat, ahte mis ii lean sámi journalista fárus proseassas, ii dárkkut dan, ahte dat livčče dagahan dan, ahte mii leat bargan barggumet funet.

Pihlajamäki šiitá, ahte sii livčče leamaš bealálaččat.

– Dalle go gieđahallat fáttá, mas leat čielgasit juohkásan joavku, main lea hui nana oaivil man nu áššis, de dalle jus dat iežas oaivil ii leat áidna, mii boahtá ovdan ášši oktavuođas, de dalle min álkit lávejit sivahit bealálažžan, dadjá Riitta Pihlajamäki.

Guldal Riitta Pihlajamäki jearahallama Yle Areenas dáppe.

Näkkäläjärvi: Sápmelaččat fertejit joatkit hállama ja čállima áššis

Jagi sápmelaš ja Yle Sámi ovddeš hoavda Pirita Näkkäläjärvi geahčai A-studio ságastallama restauráŋŋa maŋŋelanjas seammás, go livčče lean jođus somás eahket Sáhkavuorrokaraokes ustibiiguin. Prográmma ii goittotge lean nu vearrái, go ledje jáhkkán ja ballan ovddalgihtii, dajai Näkkäläjärvi gaskavahku eahket.

Näkkäläjärvi dadjá, ahte sámit fertejit beare joatkit sámi oainnu ovdanbuktima: hállat ja čállit. Mađi eanet leat sámit geat hállet, dađi buoret. Ovttasbargamin šaddá buorre, rávve Näkkäläjärvi.

Guldal Pirita Näkkäläjärvi jearahallama Yle Areenas dáppe.

Jietna: Pirita Näkkäläjärvi
Jietna

8.2.2018 dii 20.59 Artihkkal beaiváduvvon ja dasa lasihuvvon sosiála media kommeanttat ja govat prográmma sisdoalus ja lasihuvvon diehtu, ahte Pirita Näkkäläjärvi lea Yle Sámi ovddeš hoavda.

9.2.2018 dii: 16:46: Lasihuvvon diehtu das ahte Pirita Näkkäläjärvis livčče lean jođus somás eahket Sáhkavuorrokaraokes ustibiiguin.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä