Sápmi |

Reakšuvnnat AHR mearrádussii

Alimus hálddahusriekti dohkkehii 93 ođđa olbmo sápmelažžan Sámedikki dáhtu vuostá. Dán artihkkalii mii čohkket reakšuvnnaid mearrádussii earet eará sosiála medias.

Saamen lippu
Govva: Yle

Dalán AHR mearrádusa maŋŋá lea ságastallan sosiála medias álgán.

Yle Sámi Facebook-siiddus kommentere Ristenrauna Magga, ahte sápmelaččat eai gal sáhte vuollánit.

– Okta bábirbihttá ii daga geange sápmelažžan! Sámit fertejit fámuid čohkket. Gal dat min leat ovdalge soardán, muhto dá mii fal eallit, Magga čállá.

Nils Eira árvala seamma ođđasa vuolde, ahte ášši soaitá leat miellagiddevaš gaskariikalaš duopmostuoluide.

Sámiráđi ságadoalli Áile Javo atná AHR mearrádusa dohkketmeahttumin. Maid son čállá Yle Sámi Facebook-siiddus ovtta ođđasa vuolde.

– Mo sáhttá stuorraservodat mearridit gii lea sápmelaš, sápmelaččaid álbmotválljejuvvon parlameantta oaivila vuostá?, Javo jearrá.

Sámediggeválggaid evttohas, City-Sámit-searvvi ságadoalli Pentti Pieski čállá Twitteris, ahte dát lea dilli ođđa sámediggebaji álggus. Son muittuha olbmuid jienasteami dehalašvuođas.

Sámediggeválggaid evttohas Neeta Jääskö čállá Twitteris, ahte AHR mearrádusain gusto bargu ja ustibat dohkkejit earet eará duođaštussan sápmelašvuođas.

– Dát riika lea buohcci, Jääskö čállá Twitteris.

Jääskö muittuha maid, ahte jos geahččá 270 jagi maŋosguvlui, de olbmot leat 512 máttarvánhema.

– Suoma sámediggi ii fargga leat šat legitima ovddastit suoma sápmelaččaid. Sápmelašmeroštallan ja láhka leat geavatlaččat duššn dahkkon, Jääskö čállá.

Lappi riikkabeaiáirras Mikko Kärnä (guovd) čállá Twitteris, ahte AHR mearrádus lei beaivvi buoremus ođas.

– Lihku didjiide, geat vejiidet mearehis proseassa loahpa rádjai, Kärnä čállá.

Son joatká Facebookas, ahte mearrádus lea vuoiggalaš. Kärnä sávvá olbmot heitet suhtadeames ja áššiide gávdno jierbmi boahtteáiggis. Erika Sarivaarai son sávvá erenoamaš olu lihku ja dadjá, ahte Sarivaara lea gal nana ja roahkkadis nisu.

Suoma ON nuoraid delegahtta Mikkel Näkkäläjärvi kommentere twitteris, ahte sámiid oainnuin ii leat mearkkašupmi.

– Gii diehtá sámiid áššiid buoremusat? Eai gusto sámit ieža, go sin oainnuin ii leat mearkkašupmi. Näkkäläjärvi čujuha válgalogahallamii, Ilo-soahpamuššii ja meahciráđđehusláhkii.

Näkkäläjärvi joatká vel:

– Suopma vázzá ođđasit ja ođđasit sámedikki oainnuid badjel. Morašlaš čuovvut, čállá Mikkel Näkkäläjärvi.

Evttohas Tuomas Aslak Juuso čállá Facebookas, ahte son ávžžuha Sámedikki guoddalit AHR mearrádusas Eurohpa olmmošvuoigatvuođaduopmostullui.

– Seammáš ášši galgá loktet olmmošvuoigatvuođakomitea ovdii, mii bearráigeahččá KP-soahpamuša (ON álbmotrivttiid ja politihkalaš rivttiid álbmogiidgaskasaš oktasašsoahpamuš) ja CERD ovdii, mii bearráigeahččá, ahte nállevealáheapmi ii dáhpáhuva, Juuso čállá.

– Lea absurda, ahte vaikke Suopma lea mearridan dievaslaččat doarjut ON eamiálbmogiid julggastusa and duohtandahkat dan, nu lihkká Suopma joatká dan rihkkuma. Erenoamažit Supma rihkku artihkkaliid 3, 4, 5, 8 and 33, Juuso dadjá.

– Livččen ávžžuhit Sámiráđi vejolaččat árvvostállat váidit ášši ovddasguvlui riihkaidgaskásaš dássai, maiddai danin ahte Suoma Sámediggi boahtteáigi soaitá šaddat eahpesihkkarin, Juuso loahpaha.

Dáiddar Matti Aikio čállá Facebookas, ahte mearrádus lea ovdamearka das, mo nu gohčoduvvon riektestáhta sáhttá duolbmat unna eamiábmotvehádaga vaikke jahki lea 2015.

– Sáhttá leat, ahte Suoma sámiin ii leat eará vejolašvuohta go hilgut Suoma Sámedikki ja guođđit dan Suomadiggin suopmelaččaide. Sámit sáhtášedje vuođđudit dorvobáikeparlameantta Suoma olggobeallái, Aikio čállá.

Mii beaividit dán artihkkala beaivvi mielde.

Varrasamosat: Sápmi

Váldoođđasat

Varrasamosat

Muualla Yle.fi:ssä