Sápmi |

Revontuli-Opisto vástida Sámi Duodji -searvái: Lapin työt -kurssat leat ainge lunddolaš oassi Revontuli-Opisto gursadoaimma

Revontuli-Opisto nappo Eanodaga, Gihttela ja Soađegili oktasaš rávesolbmuidskuvlla áigu boahtte áiggisge ordnet kritiserejuvvon Lapin työt -giehtaduodjegurssaid.

Pasi Tanninen, Outi Kurkela ja Eeva Immonen
Revontuli-Opisto rektor Pasi Tanninen, Revontuli-Opisto juhkosa várrelahttu Outi Kurkela ja giehtaduodjekurssaid plánejeaddji Eeva Immonen Revontuli-Opisto juhkosa čoahkkima maŋŋá 28.11.2017. Govva: Minna Näkkäläjärvi / Yle

Eanodaga, Gihttela ja Soađegili gielddaid oktasaš rávesolbmuidskuvla, Revontuli-Opisto, lea vástidan Sámi Duodji -searvvi reivii, mas searvi láittii rávesolbmuidskuvlla nu gohččoduvvon lapintyö-kurssaid ordnemis. Revontuli-Opisto áigu ordnet Lapin työt -giehtaduodjegurssaid maiddái giđđat 2018 iežas plána mielde.

– Revontuli-Opisto juogus sávvá, ahte Sámi Duodji -searvi rahpagoađášii duodji-doahpaga ja muitalivččii dan sirdašuvvamis sámekultuvrras, ja figgašii lasihit dieđu ášši hárrái, reivves čuožžu.

Sámi Duodji -searvvi mielas Revontuli-Opisto lea loavkidan sápmelaš duodjekultuvrra árvvuid ja doaibmaprinsihpaid, go lea ordnen nu gohčoduvvon lapintyö-kurssaid. Sámi Duodji -searvvis oaivvildit, ahte sámeduoji ovddideapmi ja oahpaheapmi, eandaliige gákteárbevieru oasil, lea dušše sápmelaččaide gulli morálalaš ja kultuvrralaš riekti.

Revontuli-Opisto: "Lapin työt lunddolaš oassi kursafálaldagas"

Revontuli-Opisto juogus gieđahalai Sámi Duodji -searvvi reivve čoahkkimisttis 28.11. ja čálii dasa vástádusa, mas dat oaivvilda, ahte Lapin työt -nammasaš kurssat leat ain lunddolaš oassi Revontuli-Opisto kursafálaldagas, go váldá vuhtii rávesolbmuidskuvlla doaibmaguovllu.

– Kurssat ordnejuvvojit danin, go gieldda olbmot sávvet daid. Dáin kurssain oahppit sáhttet sohkaduogážis fuolakeahttá doalahit dásseveartasaččat iežaset giehtaduodjeárbevieru, Revontuli-Opisto juhkosa vástádusas čuožžu.

"Dáid giehtadujiid ráhkadeapmi gullá seamma láhkai sápmelaš go davvisuopmelašge kultuvrii"

Lapin työt -kurssaid govvádusain boahtá ovdan, ahte váldoáššis kurssain dahkkojuvvojit iešguđetlágan náhkke- ja láđđebarggut, dego boahkánat, luhkat ja gihcenáhkkegahpirat. Goarrunbarggu sisdoallun leamašan earret eará biktasiid goarrun njuolga minstariid mielde.

– Revontuli-Opisto juhkosa oainnu mielde daid giehtadujiid ráhkadeapmi gullá seamma láhkai sápmelaš go davvisuopmelaš dahje lappilaš kultuvrii. Kurssain lea bargobádjelágan doaibmaprinsihppa, ja dohko oahppit bohtet iežaset jurdagiiguin ja ávdnasiiguin ollašuhttit iežaset ulbmiliid oahpaheaddji vehkiin.

Revontuli-Opisto juhkosa vástádusas deattuhit, ahte rávesolbmuidskuvlla kurssain olbmot ráhkadit giehtadujiid iežaset atnui eaige vuovdimassii, ja nu sii eai gilval daiguin, geat ožžot ealáhusa duojis. Gáktelágan biktasiid, main Sámi Duodji -searvi moittii Revontuli-Opisto, eai reivve mielde leat dahkan go muhtin olbmot.

– Duohtaáššis min čielggadeami mielde Revontuli-Opisto doaimma áigge lea dahkkon biktasat gaskamearalaččat okta jahkái. Revontuli-Opisto ii álgge ráddjet ohppiid rievtti ollašuhttit iežaset dahje árbevieru, mii sin mielas lea riekta, Revontuli-Opisto reivves čuoččuhuvvo.

Maijala ja Vuovde-, guolásteaddji- ja duottarsámit -searvi bealuštit Revontuli-Opisto

Guovddášbellodaga riikkabeaiáirras Eeva-Maria Maijala bealušta iežas dieđáhusas 16.11. Revontuli-Opisto rievtti fállat lapintyö-kurssaid.

– Áiddo dán sullasaš jurddašanvuogit, maid mielde dušše unna joavkkuš oččošii mearridit árbevirolaš lappilaš giehtadujiid ráhkadeamis, dagahit negatiivvalaš atmosfeara olles eamiálbmotkultuvrra vuostá, váikko dat galggašii leat olles Lappi resursa, oaivvilda Maijala.

Maiddái Vuovde-, guolásteaddji- ja duottarsámit -searvi lea sádden áššis cealkámuša Revontuli-Opistoi dan maŋŋá, go leat gullan Sámi Duodji -searvvi reivves. Sii oaivvildit, ahte Revontuli-Opisto kurssat veahkehit nu gohčoduvvon statuskeahtes sápmelaččaid doalahit ja ealáskahttit kultuvraset, ja danin fálaldat lea sin mielas buorre.

Varrasamosat: Sápmi

Váldoođđasat

Varrasamosat

Muualla Yle.fi:ssä