Sápmi |

Riekteministeriija ásahii doaibmagotti válmmaštallat sámediggelága nuppástusa – doaibmagotti jođihišgoahtá kansliijahoavda Pekka Timonen

Doaibmagotti doaibmabadji álgá juovlamánu álggus ja bistá 15.5.2021 rádjai.

Saamen- ja suomenliput
– Dál lea áigi oažžut nuppástusaid áigái, dadjá riekteministtar Anna-Maja Henriksson riekteministeriija dieđáhusas. Govva: Vesa Toppari / Yle

Suoma riekteministeriija lea ásahan doaibmagotti válmmaštallat sámediggelága nuppástusaid. Doaibmagotti doaibmabadji lea 1.12.2020–15.5.2021.

– Lean ilus, ahte sámediggelága nuppástusa válmmaštalli doaibmagotti bargu beassá dál johtui. Eamiálbmot sápmelaččaid rivttiid sihkkarastin eaktuda, ahte sápmelaččaid iešráđđenorgána guoski njuolggadusat leat áiggi dásis. Dál lea áigi oažžut nuppástusaid áigái, dadjá riekteministtar Anna-Maja Henriksson riekteministeriija dieđáhusas.

Dálá sámediggeláhka leamašan fámus fárgga 25 jagi. Lága njuolggadusat leat muhtin muddui boarásnuvvan ja njuolggadusaid doaibmivuođas leat fuomášuvvon čuolmmat.

Lahtut ráđđehusbellodagain ja Sámedikkis

Doaibmagottis leat lahtut sihke ráđđehusbellodagain, Sámedikkis ja dan ságadoalli lea riekteministeriija kansliijahoavda Pekka Timonen.

Doaibmagottis Suoma Sosiálademokráhtalaš bellodaga lahttun lea Raimo Piirainen ja su várrelahttu lea Mikkel Näkkäläjärvi, Guovddášbellodaga ovddasta Juha Joona, várrelahttun Eeva-Maria Maijala, Ruoná bellodagas lahttun lea Jenni Pitko ja várrelahttun Mirka Soinikoski, Gurutlihtus lahttun lea Veronika Honkasalo ja várrelahttun Anni-Sofia Niittyvuopio, Ruoŧŧelaš álbmotbellodagas lahttun Eva Biaudet ja várrelahttun Mats Löfström.

Sámedikki ovddasteaddjin doaibmagottis leat Tuomas Aslak Juuso, Anne Nuorgam, Pirita Näkkäläjärvi, Martin Scheinin ja Kalle Varis. Sin várrelahtut leat Juha-Petteri Alakorva, Anni Koivisto, Veikko Feodoroff, Piia Nuorgam ja Sarita Kämäräinen.

Áššedovdin doaibmagottis leaba riekteministeriija ossodathoavda Johanna Suurpää ja Sámedikki beales Siiri Jomppanen. Čállin doibmaba Johanna Hautakorpi ja Yrsa Nyman riekteministeriijas.

Stáhta bargagođii lága ođasmahttimiin álgojagi

Stáhtaministtar Sanna Marin ráđđehusprográmma mielde ráđđehus gudnejahttá ja ovddida buot sápmelaččaid ja sámejoavkkuid gielalaš ja kultuvrralaš rivttiid ollašuvvama riikkaidgaskasaš soahpamušaid vuhtiiválddedettiin.

– Lea duođaige dehálaš, ahte sámediggeláhka ođasmahttojuvvo eamiálbmotvuoigatvuođaid vuođul. Lea buorre, ahte oažžut barggu dál johtui, dadjá Sámedikki ságajođiheaddji Tuomas Aslak Juuso Sámedikki dieđáhusas.

Stáhta válddii sámediggelága ođasmahttima vuot barggu vuollái dán jagi álggus. Riekteministeriija ásahii álgojagi sámediggelága ovdaválmmaštalli bargojoavkku, man ulbmilin lei guorahallat sámediggelága ođasmahttindárbbuid ovddit láhkanuppástusevttohusa vuođul.

Bargojoavkku čoaggin diehtu ja fuomášumit leat čohkkejuvvon muittuhančállagii. Bargojoavkku doaibmabadji nogai 31.3.2020

Sámediggelága geahččaledje ođasmahttit ovddit ráđđehusbajis, muhto bargu bisánii čakčat 2018, go Sámediggi hilggui dalle dahkkon evttohusa lágas.

Varrasamosat: Sápmi

Váldoođđasat

Varrasamosat

Muualla Yle.fi:ssä