Sápmi |

Riekteministtar Anna-Maja Henriksson lohpida: “Stáhta čatnasa gieđahallat sápmelaččaid muosáhan vealaheami ja vuoigatvuođaid rihkkuma”

Riekteministtar Anna-Maja Henriksson ja olgoministtar Pekka Haavisto ovdanbuvttiiga sáhkavuoruid Sámedikki čoahkkimis

Anna-Maja Henriksson
Riekteministtar Anna-Maja Henriksson sáddii Sámedikki čoahkkimii videodearvvahusa duohtavuođa- ja soabadankomišuvnna birra. Govva: Screenshot Sámedikki čoahkkinstreamas 17.12.2020

Ministara guovttos Anna-Maja Henriksson ja Pekka Haavisto ledje mielde Sámedikki jagi njealját dievasčoahkkima áššedovdigullamis, mii guoskkai duohtavuođa- ja soabadankomissáraid válljenášši.

Suoma sámeáššiin vástideaddji ministtar, riekteministtar Anna-Maja Henriksson sáddii Sámedikki čoahkkimii videodearvvahusa. Olgoministtar Pekka Haavisto fas buvttii čoahkkimii stáhtaráđi dearvvuođaid gáiddusin.

Henriksson: "Sápmelaččaid rivttiid ovddideapmi lea dárbbašlaš"

Riekteministtar Anna-Maja Henriksson muitalii iežas leat ilus, ahte Sámedikki álgagis álgán oktasaš válmmaštallan lea ovdánan ná guhkás.

– Lea sihkkarit min oktasaš sávaldat, ahte bastit fargga ásahit komišuvnna ja dan bargu beassá álgit, dajai Henriksson.

Ministtar buvttii ovdan, ahte stáhtaministtar Sanna Marin ráđđehus lea ráđđehusprográmmastis čatnasan gudnejahttit ja ovddidit buot sápmelaččaid ja sámejoavkkuid gielalaš ja kultuvrralaš rivttiid ollašuvvama nu, ahte dat váldá vuhtii riikkaidgaskasaš soahpamušaid.

– Mihttomearri lea vuohkkasit gudneáŋgir. Sáhttit sihkkarit leat ovttaoaivilis das, ahte sápmelaččaid rivttiid ovddideapmi lea dárbbašlaš. Seammás oaidnit, ahte máŋgga konkrehta gažaldagain mis leat leamašan váttisvuođat gávdnat čovdosiid ja beassat ovddosguvlui, dajai Henriksson iežas videodearvvahusas.

"Komisšuvnnas lea šaddamin kategoriijas mielde vuosttaš Suomas"

Sámiid duohtavuođa- ja soabadankomišuvnna ulbmilin lea lasihit áddejumi ja dieđu historjjá dáhpáhusain ja das, mo dat váikkuhit otná beaivvisge. Henriksson mielde ulbmil lea maid hukset luohttámuša stáhta ja sápmelaččaid gaskkas.

– Jus eat máŋggabealagit ja čiekŋalit ádde, mii lea dáhpáhuvvan ja mo dat váikkuha sápmelaččaide ja sin gielaide ja kultuvrii otná beaivve, min lea váttis gávdnat bistevaš čovdosiid boahtteáigái. Anán danin boahttevaš komišuvnna barggu hui dehálažžan ja mearkkašahttin.

Henriksson buktá ovdan, ahte sáhka lea historjjálaš proseassas.

– Sámiid duohtavuođa- ja soabadankomisšuvnnas lea šaddamin kategoriijas mielde vuosttaš Suomas. Historjjálaš proseassa johttáhit ovttasráđiid álgoálbmot sápmelaččat ja Suoma stáhta. Stáhta čatnasa gieđahallat sápmelaččaid muosáhan vealaheami ja vuoigatvuođaid rihkkuma, dajai Henriksson. Dán sitáhtta maiddái riekteministeriija jugii Twitter-konttustis golmma sámegillii.

Pekka Haavisto
Olgoministtar Pekka Haavisto oassálasttii Sámedikki čoahkkimii gáiddusin stáhtaráđi šloahtas. Govva: Screenshot Sámedikki čoahkkinstreamas 17.12.2020

Haavisto: "Go sápmelaččat leat mearridan iežaset evttohasaid, álgá komišuvnna oktiiheiveheapmi"

Olgoministtar Pekka Haavisto buvttii čoahkkimii stáhtaráđi dearvvuođaid riekteministeriija dearvvahusa maŋŋá.

Maiddái Haavisto mielas lea erenoamáš dehálaš, ahte duohtavuođa- ja soabadankomišuvnna bargu lasiha luohttámuša sámiid ja stáhta gaskkas. Son buvttii ovdan, ahte komišuvnna bargguin háliidit ovddidit sápmelaččaide buoret vejolašvuođaid doalahit ja ovddidit iežaset giela ja kultuvrra. Dasa lassin proseassa áigge figget maid lasihit váldoálbmoga dieđuid sápmelašvuođas ja sámekultuvrras.

– Komišuvnna barggu mihttomearrin lea dovdát ja árvvoštallat sámiid vásihan historjjálaš ja dálá áiggi vealaheami. Dasa gullet earret eará stáhta suddanpolitihkka ja rivttiid rihkkumat. Komišuvnna bargun lea čielggadit, mo dát áššit váikkuhit sápmelaččaide ja sin servošii dálá dilis, Haavisto geardduhii.

Pekka Haavisto nannii iežas sáhkavuorus, ahte Nuortalaččaid siidačoahkkin lea mearridan evttohit Irja Jefremoff iežas bealis komišuvnna lahttun.

– Go sápmelaččat leat mearridan iežaset evttohasaid, álgá komišuvnna oktiiheiveheapmi. Sávvat, ahte sáhttit fargga ásahit komišuvnna ja ahte komišuvdna beassá álggahit dehálaš barggus, dajai olgoministtar Pekka Haavisto stáhtaráđi beales.

Sámedikki dievasčoahkkin ii nagodan vel duorastaga mearridit, geaid dat evttoha stáhtaráđđái komišuvnna lahttun. Čoahkkin joatkašuvvá bearjadaga diibmu 9.

Varrasamosat: Sápmi

Váldoođđasat

Varrasamosat

Muualla Yle.fi:ssä