Sápmi |

Riekteministtar Anna-Maja Henriksson sápmelaččaid vásáhusain: "Oktage ii sáhte šiitit dan, ahte vearrivuođat lea dáhpáhuvvan"

Riekteministtar Anna-Maja Henriksson, Sámedikki ságajođiheaddji Tuomas Aslak Juuso ja sámeaktivista Petra Laiti ságastalle gaskavahku Yle A-studioprográmmas duohtavuohta- ja soabadankomišuvnna mearkkašumis ovttas doaimmaheaddji Annika Damströmiin.

Video: Oikeusministeri Anna-Maja Henriksson A-studiossa
Dán láhkai riekteministtar Anna-Maja Henriksson vástidii doaimmaheaddji Annika Damström jearaldahkii vejolašvuođas stáhta ándagassiiátnumis. Video: A-studio / Yle

Riekteministtar Anna-Maja Henriksson dajai ikte gaskavahku Yle A-studio-prográmmas, ahte Suoma stáhta ii leat láhtten sápmelaččaiguin nu mo livčče galgan, leamašan olu olggušteapmi ja rievttit leat dulbmojuvvon. Dasa son ii vel váldán beali, galggašiigo Suopma bivdit ándagassii sápmelaččain.

– Dan lea vel menddo árrat dál dadjat, muhto ádden din sápmelaččaid oainnuid dán áššis, iige oktage sáhte šiitit dan, ahte vearrivuođat leat dáhpáhuvvan. Dat lea áibbas čielga ášši, dajai Henriksson.

Dán láhkai son vástidii doaimmaheaddji Annika Damström jearaldahkii vejolašvuođas stáhta ándagassiiátnumis. Studioságastallamis leigga mielde maid Sámedikki ságajođiheaddji Tuomas Aslak Juuso ja sámeaktivista Petra Laiti.

– Máŋgasis sihkkarit dákkár jurdda leamašan, ja dát duohtavuohta- ja soabadanproseassa buktá dál dáid áššiid oidnosii, ja dathan leat dál čielggadeame vuolde, dajai Sámedikki ságajođiheaddji Tuomas Aslak Juuso.

Sámeaktivistta Petra Laiti fas dajai ándagassiiátnumis, ahte symbolalaš doaimmain lea mearkkašupmi dušše dalle, juos daid čuvvot konkrehtalaš dagut.

– Dáshan Suomas leat hui buorre vejolašvuohta dasa, ahte juo ovdalgo duohtavuohta- ja soabadankomišuvdna oba geargá raporttas vel guođđitge, de leat ollu láhkanuppástusat, maid ráđđehus sáhtášii dohkkehit.

Laiti mielas ráđđehus sáhtášii juo dál álgit ollašuhttit ja buoridit sámerivttiid. Son goit muitala iežas ballat, ahte maiddái sámeservošis lea siskkáldas ballu, ahte lego boađusin dušše ándagassiiátnun iige mihkkige eará.

– Suomas lea dál vejolašvuohta čájehit, ahte ná ii ášši livčče, dajai Petra Laiti ikte A-studio-prográmmas.

Komišuvnnas stuorra bargu

Vuosttamužžan sápmelaččaid ja stáhta gaskasaš duohtavuohta- ja soabadankomišuvnnas vurdojuvvojit evttohusat sápmelaččaid ja stáhta gaskavuođaid buorideamis.

– Dan dihte lea dál dehálaš mannat dán váttis proseassa čađa, ja leahan dát hui váttis proseassa, dajai riekteministtar Anna-Maja Henriksson ikte eahkedis.

Petra Laiti ovdanbuvttii eahpeluohttámuša stáhta ja sápmelaččaid gaskkaš ja das duogážis leat historjjálaš sivat.

– Historjjás dáhpáhuvvan loavkašuhttimat váikkuhit hui čiekŋalit min servošis ja lea dehálaš, ahte dál geahččat maid ovdosguvlui ja man láhkai servvodagas sáhttit dál sámerivttiid buoridit ja mainna lágiin Suoma stáhta sáhttá guoddit ovddasvástádusa das, mii sápmelaččaide lea dahkkojuvvon. Vuosttamužžan livčče sámedikkelága ođasmahttima dohkkeheapmi, Petra Laiti dajai.

Dása riekteministtar Anna-Maja Henriksson vástidii, ahte son lea ovttaoaivilis dán áššis.

– Sávan maiddái ieš, ahte ráđđehusas maid beassat oktasaš oaivilii sámedikkelágas ovttas Sámedikkiin, ja nu ahte oččošeimmet dan juo dán ráđđehusbajis riikkabeivviide ja dohkkehuvvot. Suopmahan lea ožžon cuiggodemiid Ovttastuvvan našuvnnaid olmmošriektekomiteas das, ahte dálá lágat eai deavdde daid gáibádusaid maid galggašedje, dajai riekteministtar Henriksson gaskavahku A-studio-prográmmas.

Video: Saamelaisaktivisti Petra Laiti, saamelaiskäräjien puheenjohtaja Tuomas Aslak Juuso, oikeusministeri Anna-Maja Henriksson sekä toimittaja Annika Damström A-studiossa
A-studios gieđahalle gaskavahku dan, makkár mearkkašupmi lea duohtavuohta- ja soabadankomišuvnnas. Guossin ledje Sámedikki ságadoalli Tuomas Aslak Juuso, sámeaktivista Petra Laiti ja riekteministtar Anna-Maja Henriksson (Ruoŧŧelaš álbmotbellodat). Sáddaga lágidii Annika Damström. Video: A-studio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä