Koe uusi yle.fi
Sápmi |

Rievssatlobit nohke diimmus – fitnodatdoalli ii ožžon lobiid vaikko máŋggain dihtoriin geahččalii

Turisttaide dárkkuhuvvon rievssatbivdolobiid ii oaččo šat boahtte dálvái.

Kaksi ammuttua riekkoa.
Rievssabivdu álgá 10.9.2017 Govva: Jouni Aikio / Yle

Turisttat eai oaččo šat boahtte meahcástanbadjái rievssatbivdolobiid Anárii, Ohcejohkii ja Eanodahkii.  Olgobáikegotti olbmuide dárkkuhuvvon rievssatbivdolobit nohke vuollái diimmus, dadjá Meahciráđđehusa bivdodárkkisteaddji Sami Pääkkö.

– Buot bivnnuhamos rievssatbivdoguovlluid lobit Anáris ja Ohcejogas nohke ovtta minuhtas. Olles Davvi-Lappi bivdoguovllus: Eanodagas, Ohcejogas ja Anáris lobit nohke hui johtilit dán jagi, čilge Sami Pääkkö.  

Meahciráđđehus vuovdigođii rievssatbivdolobiid čakčamánu 1. beaivve. Dán jagi Meahciráđđehus lei mearridan bivdolobiid vuovdinmearrin 12 253 rievssatbivdojándora.

Rievssat- ja eanaloddebivdu álgá čakčamánu 10. beaivve olles Suomas. Eanaloddebivdu nohká golggotmánu 31. beaivve. Rievssatbivdu fas joatkašuvvá njukčamánu 31. beaivvi rádjái.

Olgobáikegotti olbmot ožžot bivdit rievssahiid dán bivdobajis dušše Anáris, Eanodagas ja Ohcejogas. Báikegotti olbmot sáhttet bivdit olles bivdobaji iežaset ruovttugielddas. 

Kaksi ammuttua riekkoa ja haulikko.
Turisttat eai oaččo šat rievssatbivdolobiid davás. Govva: Jouni Aikio / Yle

Máŋggain dihtoriin geahččalii oastit lobiid ja lihkkáge ii lihkosmuvvan

Go leat unnán rievssatbivdolobit vuovdimassii, de dalle ferte leat hutkái jus áiggoš rievssatbivdolobiid oažžut. Ohcejohkalaš Jarmo Helander oamasta turismafitnodaga ja jođiha turisttaid duoddaris rievssatbivddus. Dán doibmii son dárbbaša bivdolobiid.   

Helander mielas dán jagi lei erenoamáš váttis oažžut rievssatlobiid.

– Ieš in oba ožžonge lobiid dalle go lohpevuovdin álggii, vaikko mus ledje oktanaga rabasin dihtor ja tableahttadihtor. Lihkus ledjen dáhtton muhtin iežan ustibiid maid oastit lobiid vai oažžut juobe juoidá, čilge Helander.

Helander dadjá, ahte dál leat juo moadde jagi leamaš unnán rievssatbivdolobit vuovdimassii turistaide. Jagis 2016 vuvde Sápmái váile 14 000 rievssatbivdolobi ja dán jagi mearri lea badjelaš beannotduhát lobi uhccit.

Rievssatbivddu bivdobadji lea measta 6 mánu. Buoremus bivdoáigi lea dál čavčča bealde, muitala Helander.

– Dál lobit nohket juo golggot-skábmamánus vaikko bivdu joatkašuvváge gitta njukčamánu rádjái. Gaskadálvvi gal ii leatge nu álki bivdit rievssahiid, muhto giđđat njukčamánus gal livčče buorit bivdosiivvut.   

Beaiváduvvon 6.9.2017 dii 8.26: Ođđasii lasihuvvon Jarmo Helander kommeanta ja bajilčállagii lasihuvvon fitnodatdoalli bealli.

Beaiváduvvon 6.9.2017 klo 13.54: Divvojuvvon nu, ahte Eanan- ja meahccedoalloministeriija ii leat ásahan dihto lohpemeari muhto lobii eanemusmeari  lea ásahan Meahciráđđehus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä