Sápmi |

Rihpalihtti, ruskalihtti vai luotnelihtti? Ovdamearkka dihte dákkár giellaáššiid gieđahallet ođđa giellapoddas

SR Sámeradio ođđa giellaprográmma gullo maiddái Yle Sámi kanálas bearjadagaid diibmu 16–17.

Karen Eira ja Linda Marakatt.
Giellapod lágideaddjit Karen Eira ja Linda Marakatt. Govva: David Rydenfalk, Sameradion & SVT Sápmi

SR Sámeradio Ruoŧa beale Sámis álggaha ođđa giellapod-prográmma. Giellapod lágideaba doaimmaheaddjiguovttos Karen Eira ja Linda Marakatt.

Prográmmas leat logi oasi, mat sáddejuvvojit juohke bearjadaga otná rájes. Giellapod gullo maiddái Yle Sámi rádiokanálas bearjadagaid diibmu 16–17.

Vuosttaš oasi fáddan leat suopmanerohusat. Lágideaddji Karen Eira muitala, ahte sáddagii leat bovdejuvvon studioguossit ságastallat, mot sii leat vásihan suopmanerohusaid.

– Ovdamearkka dihte jus eai leat gulahallan dahje jus leat šaddan dákkár somás dilálašvuođat, main muhtin lea doivon, ahte sátni mearkkaša juoidá eará, go maid dat duođas meidne.

Vuosttaš sátta sáddejuvvo Johkamohkis ja guossin leat earret eará musihkkár Ulla Pirttijärvi-Länsman, slam-diktačálli Ánná Kájsa Partapuoli, politihkkár Lars Miguel Utsi ja girječálli Helena Omma.

Sávvet guldaleddjiid searvat sáddagii

Maiddái álbmot sáhttá oassálastit giellapod-prográmmii ja sáddet gažaldagaid. Dárkkuhussan lea, ahte giellapoddas lea juohke bearjadaga mielde giellaáššedovdi, guhte sáhttá vástidit guldaleddjiid gažaldagaide. Guldaleaddji sáhttá váldit oktavuođa lágideddjiide meila dahje sosiála media bokte.

Muhtin fáttat leat juo dieđus čuovvovaš poddaide.

– Fuolkedajahusat, muohtasánit, mot lea gielladilli, ođđa ja láhppon sánit, dát leat evttohusat maiguin moai letne dál bargame, Karen Eira muitala.

Guldal Karen Eira jearahallama Yle Sámi iđit -sáddagis bearjadaga 8.2.2019. Jietna: Yle Areena. Govva: David Rydenfalk, Sameradion & SVT Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä