Sápmi |

Rihppaskuvlii veahkkeneavvut neahttaipmilbálvalusain – Suomas vel doaivut geasset šaddet konfirmašuvnnat, Norggas maŋiduvvon čakčii

Ipmilbálvalusat leat sirdašuvvan nehttii. Anára searvegottis leat veahkkeneavvut digitálalaš rihppaskuvlaoahpahussii.

konfirmašuvdna, rihppaskuvla, Ohcejoga girku
Mo geavvá geasi konfirmašuvnnaiguin? Govva: Vesa Toppari / Yle

Rihppaskuvlla vázzi nuorat leat dál máŋggaid earáid láhkái earenoamáš dilis – mo oažžut doarvái olu merkejumiid ipmilbálvalusain?

Rihppaskuvlii gullá searvegoddái oahpásmuvvama oassi, mas nuorra oassálastá iešguđetlágán girkolaš doaimmaide ja dan bokte čohkke merkejumiid rihppaskuvlapássii das, ahte lea daidda oassálastán. Dál goittotge girkui ii beasa, dasgo bismmat leat mearridan ordnet ipmilbálvalusaid sátneipmilbálvalussan nu, ahte báikki alde girkus leat dušše ipmilbálvalusa doaimmaheaddjit.

Suoma evangelaš-luteralaš girku sádde ipmilbálvalusaid neahta bokte. Maiddái eará vuoiŋŋalaš sisdoalut ovdamearkka dihte radios leat dál geavahanláhkái nuoraide, geat galget dál deavdit searvegoddeoasi rihppaskuvllastis.

Anára searvegotti nuorat dahket oahpásmuvvama gáiddusin

Anára searvegotti sámebáhppa Mari Valjakka muitala, ahte sii leat mielde rihppaskuvllaid digitálalaš ovddidanfidnus ja dan mielde sii leat ožžon digitála searvegoddedoaimma buori vuođu ala.

– Mis leat buorit vejolašvuođat ordnet gáiddusoahpahusa maiddái rihppaskuvlii. Mun jáhkán, ahte mis leat hirbmat buorit biergasat dan várás, lohká Valjakka.

Mari Valjakka saamelaispappi Inarin seurakunta
Sámebáhppa Mari Valjakka sávvá, ahte geasset dilli livčče juo normála, vai beasašedje dábálaččat rihppaskuvllaid doallat. Govva: Sara Wesslin / Yle Sápmi

Lea goittotge váttis diehtit, mo dálges ovdánit, muhto Valjakka sávvá geassemánus dilli livčče juo normála. Anára searvegottis lea dán jagi guokte rihppaskuvlla ja dasa lassin lea vel sámerihppaskuvla. Konfirmašuvnnat leat maid plánejuvvon geassái.

– Leairraid lea vejolaš sirdit, jus lea bággu. Dat lea gitta das, leago leairaguovddážiin sadji. Maid konfirmašuvnnaid sáhttá sirdit, Valjakka muitala.

Ohcejoga searvegotti girkohearrá Päivi Aikasalo muitala, ahte sii leat olles fárttain plánemin rihppaskuvllaid ollašuhttima vejolašvuođaid.

– Dál ii leat panihkka dainna rihppaskuvllain gal. Searvegoddái oahpásmuvvama sáhttá dahkat vaikko miessemánus ja jus dalle vel lea čoahkkanangielddus, de oahpásmuvvama beassá dahkat vaikkoba neahtta bokte, dadjá Aikasalo.

Ohcejoga girku, girku, rihppaskuvla, konfirmašuvdna
Govva: Vesa Toppari / Yle

Norggas girku lea ávžžuhan sirdit konfirmašuvnnaid

Sápmelaččaide konfirmašuvdna lea hui dehálaš. Norgga girku lea ávžžuhan sirdit konfirmašuvnnaid koronavirusdili geažil.

Ságat-aviissa mielde searvegottit galget ieža mearridit áigerievdadusain. Norgga beal konfirmašuvnnat maŋiduvvojit goit dálá dieđu mielde čakčii.

Varrasamosat: Sápmi

Váldoođđasat

Varrasamosat

Muualla Yle.fi:ssä