Sápmi |

Riikabeaiáirras Kari jearai ministaras sápmelaččaid duohtavuohta- ja soabadankomišuvnna ásaheamis Supmii

Komišuvnna ásaheami dárkkuhussan lea čielggadit ja buktit ovdan vearrivuođaid sápmelaččaid historjjás. Dat lea okta Suoma Sámedikki ulbmiliin dán válgabajis.

Emma Kari.
Emma Kari. Govva: AOP

Ruoná bellodaga riikabeaiáirras Emma Kari gažadii ministarain áigugo ráđđehus bargagoahtet Sámedikki evttohusain ásahit duohtavuohta- ja soabadankomišuvnna Supmii. Kari lea guođđán girjjálaš gažaldaga ja gažaldat čujuhuvvo ráđđehusa ministtarii, geasa ášši gullá.

– Komišuvnna ásaheami dárkkuhussan lea čielggadit ja buktit ovdan vearrivuođaid sápmelaččaid historjjás. Dat lea okta Suoma Sámedikki ulbmiliin dán válgabajis, muitala Kari dieđáhusastis.

Duohtavuohtakomišuvdna čielggadit Suomas sápmelaččaid guovdu dáhpáhuvvan vearrivuođaid

Sámedikki mielas maiddái Suomas livččii dárbu duohtavuohtakomišuvdnii. Kari lokte dieđáhusas ovdan, ahte Suopma lea Ruoŧa ja Norgga lahkai geahččalan historjjás assimileret sápmelaččaid váldoálbmogii ja sámemánáid viegal suomaiduhtte sođiid maŋŋá 1940-logus ovddosguvlui bákkuheamiin mánáid suopmelaš ásodatskuvllaide.

– Ságastallamat duohtavuohta- ja soadabankomišuvnna ásaheamis maiddái Suomas loktánii, go Ruoŧas álggii ságastallan seamma fáttás. Ruoŧas Sámediggi ja vealahanáittardeaddji hálidit ásahit duohtavuohtakomišuvnna čielggadit boasttuvuođaid, maid historjjás sámiid guovdu leat dahkan, dadjá Kari preassadieđáhusastis.

Duohtavuohtakomišuvnnaid doaibma lihkostuvvan Kanadas ja Lulli-Afrihkás

Kari mielde duohtavuohtakomišuvnna sullasaš doaibmaorgánat leat lihkostuvvan doaimmas earret eará Lulli-Afrihkás ja Kanadas. Kanadas leat čielggadan 150 000 iešguđet eamiálbmotovddasteaddjis maid sii gárte vásihit ásodatskuvllain.

– Komišuvnna barggu geažil badjel 80 000 olbmo leat ožžon buhtadusaid fysalaš ja psyhkalaš gillámušain ja 30 000 olbmo seksuálalaš viegalváldimis. Dán barggu bohtosin ledje maid máŋggat buoridanevttohusat eamiálbmogiid dillái Kanadas. Lulli-Afrihkás duohtvuohtakomišuvnna ásahedje čielggadit apartheid áiggi boasttuvuođaid, čilge riikabeaiáirras Kari.

Varrasamosat: Sápmi

Váldoođđasat

Varrasamosat

Muualla Yle.fi:ssä