Sápmi |

Risten Mustonen jođihišgoahtá nuoraidráđi

Sámedikki nuoraidráđi ođđa ságajođiheaddji muitala, ahte seksuála heađušteapmi lea okta váldotemáin dán bájis.

Jietna: Risten Mustonen
Jietna

Suoma Sámedikki nuoraidráđđi ortniiduvai mannan vahkoloahpa, ja nuoraidráđđi válljii ođđa ságadoallin sámegiela lektor Risten Mustonena.

Mustonen jođihišgoahtá buriin mielain nuoraidráđi.

– Mus lea hui buorre dovdu, ja dat lea justa dan dihte go mis leat nu čeahpes lahtut nuoraidráđis, rápmo Mustonen.

Nuoraidráđi bargun lea fuolahit ahte Suoma beale sámenuoraid jietna gullo Sámedikkis, muhto maiddái stáhtadásis ja davviriikalaš ovttasbarggus. Dan ovttasbarggu Mustonen háliida ovddidit ja lasihit, muhto ođđa ságadoalli oaidná erenomáš dehálažžan maiddái nannet sámenuoraid ja -mánáid gielladáiddu ja kultuvrra dovdamuša.

– Okta ášši, mii orru álot áigeguovdil, lea dat ahte mii sámenuorat ja -mánát dárbbahit earenomáš doarjaga sámeidentitehta nannemii, sihke giela ja kultuvrra seailluheapmái.

Nubbi dehálaš ášši dán bájis lea giddet fuomášumi seksuála heađušteapmái, man sámenuorat gártet vásihit.

– Mii Sámi parlamentáralaš ráđi nuoraidlávdegottiin, mas leat mielde Norgga ja Ruoŧa beale nuoraidráđit, leat ordneme konferánssa boahtte jahkái, man temán lea seksuála muosehuhttin.

– Dat lea maiddái okta min váldotemá dán jagi ja mii áigut maiddái ordnet boahtte čavčča seminára, ja dan semináras mii eat áiggo dušše dan muosehuhttima gieđahallat, muhto baicca maiddái obalohkáige seksuála dearvvašvuođa, muitala Mustonen.

Muhto mat leat nuoraidráđi gávcci váldoulbmila dán badjái? Makkár áššiid Mustonen háliida deattuhit? Makkár eará plánat nuoraidráđis leat? Guldal Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä