Koe uusi yle.fi
Sápmi |

Risten Mustonen oahpahišgoahtá sámegiela Helssega universitehtas

Filosofiija magisttar Risten Mustonen fárre dán čavčča Helssegii ja álgá sámegiela universitehta oahpaheaddji sadjásažžan.

Risten Mustonen
Govva: priváhtagovva

Filosofiija magisttar Risten Mustonen lea álgimin Helssega universitehta sámegiela universitehtaoahpaheaddji sadjásažžan dán čavčča. Bargu bistá beannot jagi ja Mustonen vuordá jo iluin ahte beassá oahpahusbargui.

– Lean álggaheamen hui buriin mielain ja mus gal lea buorre dovdu. Lean ožžon rávvagiid ja veahki juohke áššis: leamaš ustitlaš olbmot Helssega universitehtas.

Helsingin yliopiston ovi.
Govva: Yle

Barggu maŋis Helssegii

Mustonen orru dál davvin, muhto lea báhkkemin lávkkaid ja eallimis máttás. Jurdda lea goit fas sadjásašvuođa maŋŋá máhccat davás.

– Dieđusge soaitá gelddolaš fárret oaivegávpogii. Mus lea goittotge mokta bargat giellaealáskahttima ovdii, oahpahit sámegiela ja sirdit ja nannet dan gielladáiddu. Šaddá miellagiddevaš vásihit makkár dat lea doppe oaivegávpogis, ovdamearkka dihte dat hušša. Beasan dan oaidnit, gávpoteallimii dolkat ja de nuppe dáfus loahpa loahpas máhccat Sápmái.

Helsset gávpogin ja báikin ii leat hirbmat oahpis, vaikko Mustonen leage duollet dálle finadan doppe.

– Mus leat moadde buorre ustiba doppe dál orrume. Dan dihte lean muhtun veardde mannan Helssegis. Ii dat goittotge leat nu čađa oahpis.

Govva: Yle

Beassá oahpahit sámegiela eatnigiellan ja vierisgiellan

Maid sámegiela universitehtaoahpaheaddji dasto bargá? Helssega universitehtas sámegiela vuođđooahpahus lea iežas linnjá Ruovttueatnama gielaid kandidáhtaprográmmas, ja das leat oktavuođat universitehta Álgoálbmotdutkama kandidáhtaprográmmii ja Suoma-ugralalaš gielaid kultuvrra magisttarprográmmii.

– Mu váldobargu lea oahpahit davvisámegiela geavadaga gielladáiddu. Justa dál vuosttas periodas doalan sámegiela álgogurssa ja joatkkagurssa sámegiela čáppagirjjálaš teavsttaid birra. Dasa lassin mus lea maiddái sámedutkan, dan gurssa namma lea “Saamenmaa ja saamelaiset”, “Sápmi ja sápmelaččat”, muitala Mustonen.

Helsset universitehta oahpahusa lassin Mustonen bargá earáge oahpahusbargguid.

– Oahpahan dál Oulu universitehtii moadde eatnigiela gurssa sámi mánáidgárdeoahpaheaddjiohppiide. Dat lea mu mielas somá go leat nu máŋggabealat oahpahusbarggut: leat sihke dat eatnigiella, vierisgiella ja sámedutkan. 

– Dál soaittálii leat buorre liiba oaivegávpoga sápmelaččaide beassat sámegiela ja -dutkama gurssaide. Juos diehtá soapmása, vaikko fuolkki dahje skihpára gii lea vaikko fárren Helssegii oahpu gazzat, sáhttá ávžžuhit searvat, son vel lasiha.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä