Sápmi |

Roavvenjárggas leat 64 oahppi leamašan sámegielat oahpahusa haga dán jagi álggu rájes – vánhen: ”Dát orru hui boastut”

Roavenjárgga gávpot lea geahččalan ohcat davvisámegiela oahpaheaddji skábmamánu rájes.

Berit-Ellen Proksi
Vánhen Berit-Ellen Proksi lea fuolas, go su mánná ii leat ožžon eatnigiela oahpahusa jagi álggu rájes. Govva: Priváhtta

Álgojahki lea vuolgán johtui váivves dovdduiguin máŋgga bearrašis Roavenjárgga gávpogis. Vuosttaš skuvlavahkus vánhemat leat ožžon skuvlalávdegottis dieđu, ahte davvisámegielat diimmuid ii leat šat vejolaš ordnet, go gávpogis ii leat sámegiela oahpaheaddji.

Vánhen Berit-Ellen Proksi muitala, ahte su 2. luohkálaš bártnáš Mathis-Issat leamašan dassážii vahkkosaččat guokte diimmu eatnigielat oahpahusas. Dál ii leat goit diehtu goas oahpahus fas joatkašuvvá.

– Mu mielas dat orru hui boastut. Gávpot fertešii dasa gal ordnet juogalágan oahpahusa, váikko gáiddusoahpahusa juoga eará gielddain, árvala Proksi.

Eadneolmmoš lea njuolgut hárbmaluvvan oahpahusa nohkamis.

– Iihan leat eará skuvlaávdnasiinge nie, ahte jus it oaččo oahpaheaddji, de ii sáhte oahpahallat matematihka, šuohkiha Proksi.

Proksi dovddaha, ahte ášši lea dagahan badjelmearálaš streassa.

– Na dieđusge, galhan dat lea váivi. Muđuige dáppe gávpogis lea hirbmat váttis leahkit sápmelažžan, birashan dahká hirbmadit, dadjá Proksi.

Gávpot bivdán veahki Sámedikkis ja Ohcejoga gielddas

Dálá dilis Roavenjárgga gávpogis leat davvisámegielat oahpahusas oktiibuot 64 oahppi, 19 sierra skuvllas. Stuorámus oassi ohppiin leamašan gáiddusoahpahusas, dušše Ylikylä skuvlla oahppit leat ožžon lagasoahpahusa.

Ylikylä skuvlla rektor Petri Mäkelä nanne dieđu, ahte jagi álggu rájes sámegielat oahppodiimmut eai leat ordnejuvvo ollenge. Gávpot lea geahččalan rekryteret davvisámegielat diibmooahpaheaddji skábmamánu rájes, muhto ii leat lihkostuvvan das.

– Olles áigge mii ohcat oahpaheaddji. Leat leamašan oktavuođas sihke Sámediggái, Ohcejoga gildii go maiddái Davvi-Suoma guovlluhálddahusdoaimmahat AVI:ii, muitala Mäkelä.

Mäkelä muitala, ahte Roavenjárgga gávpot lea geahččalan heahtedilis oažžut sámegielat oahpahusa Ohcejoga gieldda ja Sámedikki oktasaš gáiddusoahpahusprošeavtta bokte.

– Dan bokte mii eat goit oaččo veahki, dasgo sis eai leat doarvái resurssat gokčat min dárbbuid. Lea sáhka nu stuorra diibmomeriin, čilge Mäkelä.

Sámegielaid gáiddusoahpahusfidnus leat dál buohkanassii 90 oahppi. Sis 44 stuđerejit davvisámegiela.

– Mis ii leat dálá dilis vejolašvuohta lasihit oahpahusjoavkkuid meari dán giđa prošeaktaruhtadeami olis. Eat leat ráhkkanan dasa, ahte mis livčče fáhkkestaga 60 oahppi lasi. Boahtteáiggis sáhttit ráđđádallat áššis, muhto aŋkke dán giđa dat ii leat vejolaš, muitala gáiddusoahpahusfidnu prošeaktahoavda Hanna Helander.

Rektor: “Roavenjárgii váttis oažžut sámegiela oahpaheaddji”

Ylikylä skuvlla rektor Petri Mäkelä mielde gávpot geahččala buoremus lági mielde dál gávdnat mánáide davvisámegiela oahpaheaddji, vaikko dat sáhttá leat hástaleaddji.

– Dilli leamašan ná máŋggaid jagiid. Deike ii leat goassege leamašan álki gávdnat sámegiela oahpaheaddji, dadjá Mäkelä.

Dálá dilis Roavenjárgga gávpot diŋgo nuortalašgiela ja anárašgiela oahpahusa moatti oahppái gáiddusoahpahusprošeavtta bokte.

Roavenjárgga davvisámegielat diibmooahpaheaddji báikki lea vejolaš ohcat ođđajagimánu 19. beaivve rádjái. Mäkelä sávvá olbmuid cavgilit áššis ovddos guvlui vai oahpaheaddji gávdnošii. Váttisvuođa duogáš lea goit dat, ahte eai leat doarvái gelbbolaš oahpaheaddjit, árvala Mäkelä.

– Mii sávvat, ahte sámegiela dievasmahttiskuvlejumi bokte boađáše midjiide lasi sámegielat ja gelbbolaš oahpaheaddjit. Go mii čakčat bidjat báikki rabas, de sávvamis dasa leat ohccit, dadjá Petri Mäkelä.

Varrasamosat: Sápmi

Váldoođđasat

Varrasamosat

Muualla Yle.fi:ssä