Sápmi |

Rodion Sulyandziga stevnnet pássa bilideamis šluhttejuvvui

Mearrádus pássa bilidansivahusaid eretgeassimis addojuvvui bearjada 26.9. Sulyandziga lohká iežas leat váiban, muhto ilus ja geahpehan. Son atná dán mearrádusa mearkkašahttin maiddái boahtteáiggi dáfus.

Rodion Sulyandziga ja Valentina Sovkina
Rodion Sulyandziga ja Valentina Sovkina Barentsguovllu eamiálbmotbargojoavkku čoahkkimis 2012. Govva: Rodion Sulyandziga govvarádju

Rodion Sulyandziga lea okta daid Ruošša eamiálbmotolbmuin, geat eastaduvvojedje vuolgimis ON eamiálbmogiid máilmmikonferensii. Son ja Anna Naikinchina sivahuvvuiga pássa bilideamis, go sudno pássain váillui siidu pássadárkkistusa maŋŋá.

Sulyandziga lei bearjadaga čakčamánu 26. beaivve vástideamen sivahallamii pássa bilideamis ja su stevnnet šluhttejuvvui. Anna Naikinchina gullan lea sotnabeaivve 28.9. Su láhkaalmmái atná jáhkehahttin, ahte maiddái su sivahusat gessojuvvojit eret.

Sulyandziga, Naikinchina ja earáid eastadeamit ja sivahusat leat ožžon olu fuobmášumi

Earet eará Suoma presidenta Sauli Niinistö válddii ášši ovdan eamiálbmogiid máilmmikonferenssa rahpansáhkavuorusttis. Maiddái Estteeatnama presidenta Toomas Hendrik Ilves válddii ášši ovdan máilmmikonferenssas.

– Dat, geat leat ordnen ja ollášuhttán  dákkáraš doaimmaid Valentina Sovkina, Sasha Arteeva, Anna Naikanchina ja Rodion Sulyandziga guovdu, eai leat dušše dahkan rihkkosa, muhto maiddái dagahan olu vahaga min riikii, dadjá Ruošša davviguovllu eamiálbmogiid ovttastusa, RAIPON-organisašuvnna dálá vuosttas várresátnejođiheaddji Pavel Sulyandziga jekaterinburgilaš Znak.com-interneahttaáviissas.

Pavel Sulyandziga lohká dáhpáhusaid hirpmástuhttán Ruošša eiseválddiid

Pavel Sulyandziga muitala maiddái Znak.com-áviissas, ahte Ruošša várreolgoriikkaminister Gennadi Gatilov lei hirpmástuvvan go lea gullan dáid dáhpáhusain njuolga Suoma presidenttas ja lea almmuhan dakkaviđe olgoriikkaminster Sergei Lavrovii áššis.

– Nugo munnje  muitaluvvui, Lavrov lea jo almmuhan áššis Ruošša presidentii.

Pavel Sulyandziga sávvá, ahte ášši dutkojuvvo rehálaččat ja sivalaččat ráŋggáštuvvojit.

Eai soaittáhagas dáhpáhuvvan, eahpidit olmmošvuoigatvuođaid bealušteaddjit

Olmmošvuoigatvuohta-aktivisttaid mielas dát dáhpáhusat eai lean soaittahagas. Sin mielas Ruošša eiseválddit hálidedje eastit hálddašmeahttun ságastallamiid Ruošša unnitlogu álbmogiid dilis álbmogiidgaskasaš dásis. Olmmošvuoigatvuohta-aktivisttaid oainnuid mielde earenomážit aktiivalaš ovddasteaddjit eastaduvvojejdje, čállá Znak.com.

Okta gean pássas jávkkai siidu pássadárkkistusa oktavuođas ja gii sivahuvvo pássa bilideamis, iige beassan vuolgit ON eamiálbmogiid máilmmikonferensii, lei ovddeš RAIPON-aktivista ja dálá Davviálbmogiid guovddáža jođiheaddji Rodion Sulyandziga.

Rodion Sulyandziga dadjá  TV-kanála Al Jazeera America jearahallamis, ahte son ii sáhte duođaštit dan, muhto eahpida Ruošša Federašuvnna dorvvolašvuođabolesa leat eastadandoaimmaid duogábealde.

– Dat lea váldoášši, man munge hálidivččen diehtit. Dieđusge leat eamiálbmogiid vuoigatvuođalaš áššit, luondduriggodagaiguin ávkkástallan, eanavuoigatvuođat ja Siberia ja arktalašguovllu industriijalaš ovddideapmi. Dat lea mohkás ášši, muhto hui dábálaš, vástida Rodion Sulyandziga Al Jazeera gažaldahkii, manin FSB livččii ballan su New Yorka konferensii mannamis.

– Mis lea dušše okta ráđđehus – okta fámolaš ráđđehus. Mun jáhkán, ahte dat lea ordnejuvvon ákšuvdna. Lea váttis jáhkkit dan, muhto dat dáhpáhuvai, nuba mii fertet leat ráhkkanan masa beare, lohká Rodion Sulyandziga.

Rodion Sulyandziga lei bearjadaga čakčamánu 26. beaivve vástideamen sivahallamii pássa bilideamis.

– Mun dárbbašan solidáralašvuođa. Lean jo álggahan vuostálastinkampanja sihke Ruoššas ja álbmogiidgaskasaččat. Mun ferten suodjalit vuoigatvuođaidan ja iige dušše mu iežan, muhto álbmoga vuoigatvuođaid. Dán mun hálidan buktit fámolaččat ovdan, logai Rodion Sulyandziga Al Jazeera America jearahallamis ovddit beaivve ovdal sivahusaid gullangiehtadallama.

Rodion Sulyandziga lea dahkan dáhpáhusas rihkkusalmmusa.

Varrasamosat: Sápmi

Váldoođđasat

Varrasamosat

Muualla Yle.fi:ssä