Sápmi |

Ruoŧa bealde jo lagabui 100 máná sámegiela gáiddusoahpahusas

Jo lagabui čuohti máná ohppet sámegiela gáiddusoahpahusa bokte Ruoŧa bealde, vaikke gáiddusoahpahus leamašan lobalaš easka dán skuvlajagi álggu rájes. Prošeaktajođiheaddji Tiina Johansen illuda ovdáneamis ja vejolašvuođain.

Tiina Johansen, Sámiskuvlastivrra prošeaktajođiheaddji
Sámeskuvlastivrra prošeaktajođiheaddji Tiina Johansen jáhkká, ahte gáiddusoahpahus sáhttá leat buorre čoavddus báikegottiide, gos váilot sámegiela oahpaheaddjit. Govva: Stefan Karlsson / Sameradion & SVT Sápmi

Sámegiela gáiddusoahpahus lea leavvan Ruoŧa bealde oanehis áiggis dan maŋŋá, go láhka rievddai ja gáiddusoahpahusa lei vejolaš ordnegoahtit.

Ruoŧa beale Sámeskuvlastivrra prošeaktajođiheaddji Tiina Johansen oaidná gáiddusoahpahusa buorre veahkkin gielddaide, mat eai nagot gávdnat oahpaheaddjiid sámegielas.

– Dáinnalágiin mii sáhttit doalvut oahpaheaddji, gii lea Gárasavvonis, mii sáhttit su oahpahusa doalvut Göteborgii, Malmöi, Stockholmii, gosa beare. Ii leat šat gaskkain gitta, Johansen oaivvilda.

Vejolaš fállat sámegiela oahpahusa maid báikegottiide, gos váilot sámegiela oahpaheaddjit

Sámeskuvlastivrras leamašan 1.7.2015 rájis riekti ordnet gáiddusoahpahusa gielddaide, gos eai gávdno sámegieloahpaheaddjit.

Gieldda skuvla máksá bálvalusa ovddas. 

– Mađi guhkelabbui mii boahtit dáinna, dađi eanet mun jáhkán dasa, ahte dat sáhttá leat buorre čoavddus dasa, go váilot oahpaheaddjit, Johansen muitala.

Ođđajagi maŋŋá leat gáiddusoahpahusoahppit lassánan geažos áigge Ruoŧa bealde.

Dál Sámeskuvlastivrras leat 87 oahppi gáiddusoahpahusas. Eanaš oahppit leat davvisámegielas, muhto maiddái julev- ja lullisámegielas.

Oahpaheaddji dovdá buriid ja heajos beliid

Åsa Blind lea guhká bargan oahpaheaddjin Jiellevári sámeskuvllas ja maiddái oahpaha gáiddusoahppiid.

Son oaidná das sihke buriid ja heajos beliid.

– Lea stuora earuhus leahkit mánáiguin ovtta lanjas, dat gal lea sealvi. Go lea skuvllas, de sáhttá huobmát vaikko maid. Muh dihtora čađa ferte diehtit ovddalgihtii maid galgá dahkat, Blind muitala.

11 oahppi vuordimin beassat sámegiela ohppui

Sámeskuvlastivrra prošeaktajođiheaddji Tiina Johansen illuda ovdáneamis ja vejolašvuođain. Muhto ain leat maid hástalusat.

Sámeskuvlastivrras leat dal 11 oahppi, geat vurdet oahpu ubmi- ja bihtámsámegielain. Daidda ii leat vel gávdnon oahpaheaddji.

– Lea ilolaš ášši, ahte dal sáhttit fállat oahpu. Muhto seamma áigge mun dovddan vehá morraša, go mun gulan olbmuid muitaleamen, ahte mii leat vuordán gávcci jagi, ahte min mánná beassá lohkat sámegiela. Dat čuohcá váibmui oba garrasit, go diehtá ahte váhnemat leat rahčan ja mánát vuordán beassat lohkat.

– Muhto mii fertet jurddašit positiiva ja jurddašit dan, ahte buohkain galgá leat dát vejolašvuohta ja mii galgat sáhttit fállat dan vejolašvuođa áibbas buohkaide, Sámeskuvlastivrra prošeaktajođiheaddji Tiina Johansen dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä