Sápmi |

Ruoŧa ođđa Sámedikki stivra hálida ođđa ráđđádallamiid Davviriikkalaš sámesoahpamušas

Gaskavahku rahppui ođđa Ruoŧa Sámedikki válgaáigodat. Doaluid rahpansáhkavuorus ođđa njunuš Per Olof Nutti gáibidii ođđa ráđđádallamiid Davviriikkalaš sámesoahpamuševttohusas.

Per Olof Nutti
Ruoŧa sámedikki ođđa stivraságadoalli Per Olof Nutti Govva: SVT

Ruoŧa Sámedikki ođđa stivra hálida ođđa ráđđádallamiid Davviriikkalaš sámesoahpamuševttohusas, muitala Ruoŧa Sámeradio. Ná almmuhii stivraságadoalli Per Olof Nutti gaskavahku Sámedikki ođđa baji rahpandoaluin.

– Mii bargat dan ovdii, ahte davviriikkalaš sámesoahpamuševttohusas ráđđádallat ođđasit, dajai Nutti iežas sáhkavuorustis.

Rahpandoaluid maŋŋá Nutti dajai vel tv-jearahallamis, ahte sámesoahpamuševttohusas leat stuorra váilevašvuođat dan oasil, mii guoská iešstivrejumi, ahte dan ii sáhte dakkárin dohkkehit.

Ovddit njunuš doarju sámesoahpamuševttohusa

Ovddit stivraságadoalli Håkan Jonsson lea garrasit bargan dan ovdii, ahte sámesoahpamuševttohus dohkkehuvvo ja oaivvilda, ahte dat livčče lávki ovddoguvlui máŋggain gažaldagain.

Ruoŧa sámeministtar Alice Bah Kuhnke oassálasttii gaskavahku Sámedikki rahpamii. Bah Kuhnke vástidii, ahte sii vurdet mo golmma riikka sámedikkit ovdánit áššis.

– Mun ja Ruoŧa stáhta vuordit mo ášši ovdána Ruoŧa sámedikkis ja dan maŋŋá easkka váldit čuovvovaš lávkki ovddosguvlui. Dán áššihan leat ovddidan golbma sámedikki ja golbma stáhta.

Ođđa stivra hálida nannet sámiid iešstivrejumi

Ruoŧa Sámedikki vihtta stivrabellodaga leat ovttas čohkken ulbmiliid, maid áigot juksat čuovvovaš njealji jagi áigge. Per Olof Nutti mielde deháleamos ulbmil lea sámi iešstivren.

– Mii hálidat nannet sámedikki iešstivrejumi dakkár áššiin, mat gusket sámiid. Sámečearuid iešstivrejumi galgá maid nannet, celkkii Nutti rahpandoaluid sáhkavuorustis.

Loga Sameradion & SVT Sámi neahttaášši dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä