Sápmi |

Ruoŧa Sámediggi hálida rievdadit minerálalága

Ruoŧa Sámediggi hálida rievdadit minerálalága nu, ahte Gálloga sullasaš dáhpáhusat eai šat boađe. Miellačájeheaddjit leat ođđasit caggan luotta Gállogis Johkamohkis guvlui, gos ruvkefitnodat áigu ohcagoahtit ruovdemálmma.

Gállok
Bolesiid veahkaváldi miellačájeheaddjiid ektui lea ságastahttán olu erenoamážit sosiála medias. Govva: Henrik Blind

Álgovahku rájes leat miellačájeheaddjit vuostálastán ruvkefitnodat Jokkmokk Iron Mines doaimmaid álggahit ruovdemálmma ohcamiid sámiid árbevirolaš ássanguovllus Gállogis Ruoŧa bealde. Ruoŧa Sámediggi hálida rievdadit minerálalága amas dáhpáhuvvat šat seamma go dál Gállogis.

- Mii leat Sámedikkis oaidnán, ahte minerála ohcamat ja roggamat leat lassánan Sámis. Mii leat bargan guhká minerálastrategiijain ja okta dehálaš bargu das lea geahččalit rievdadit minerálalága nu, ahte dákkár unohas dáhpáhusat eai boađe, lohká sámedikki stivrra ságadoalli Per Mikael Utsi.

Nuoraidráđđi hálida deaivat ministara

Maiddái Ruoŧa sámedikki nuoraidráđđi lea oassálastán ságastallamii Gálloga dáhpáhusain. Sii leat čállán cealkámuša, mainna sii guottihit ráfálaš miellačájáhusaid Gállogis. Nuoraidráđđi lea maiddái bovden Ruoŧa ealáhus- ja guovloministtar Annie Lööf oktasaš ságastallamii.

- Mii hálidit diehtit, mo ministtar dáhkida, ahte bolesa geavahan veahkaváldi nuoraid ektui nohká. Mii hálidit muđuige ságastit dilis ministariin, čállá nuoraidráđđi.

Miellačajáhusat Gállogis joatkašuvvet ain. Dohko vurdet nuoraid miehtá Sámi.

Varrasamosat: Sápmi

Váldoođđasat

Varrasamosat

Muualla Yle.fi:ssä