Sápmi |

Ruoŧa Sámedikkis váldi molsašuvvan – ođđa stivra vuostálastá earet eará Sámesoahpamuševttohusa

Ruoŧa Sámeradio & SVT Sámi politihkalaš kommentator Jörgen Heikki analysere, maid Ruoŧa Sámedikki ođđa válljemat mearkkašit boahttevaš sámipolitihka dáfus. Ođđa stivraságadoalli Per-Olof Nutti mielas lea buorre, ahte bellodagain leat sierralágan oainnut servodaga ovddideamis.

Ruoŧa Sámedikki ođđa stivra
Simon Wetterlund, Samerna. Lars-Wilhelm Svonni, Samiska folkomröstningspartiet (čohkká). Per-Olof Nutti, Samelandspartiet. Marita Stinnerbom, Guovssonásti. Lars-Miguel Utsi, Guovssonásti. Jan Rannerud, Vuovdega Govva: David Rydenfalk / Sameradion & SVT Sápmi

Ruoŧa Sámeradio & SVT Sámi politihkalaš kommentator Jörgen Heikki mielde válddi molsašuvvan Ruoŧa Sámedikkis buktá ođđa politihka.

Ovddit njeallje jagi Sámedikki leat jođihan Vuovde- ja guolástansámit, Riikkabellodat, Min Geaidnu- ja Albmut-bellodagat.

– Dat gal mearkkaša, ahte Sámedikki politihkka oalát muhttašuvvá. Ovddit stivrras, mii vuosttažettiin lea ovddastan sámiid olggobealde čearuid, leat leamaš golbma váibmoášši; Davviriikalas sámesoahpamuša dohkkeheapmi, Sámi duohtavuođakommišuvnna álggaheapmi ja čađaheapmi sihke čearromiellahttuvuođa viiddideapmi.

Mo geavvá Davviriikalaš sámesoahpamuššii?

Njeallje bellodaga ođđa stivrra bellodagain leat almmuhan ovdal válggaid, ahte vuostálastet Davviriikalaš sámesoahpamuša dohkkeheami: Riikkabellodat, Guovssonásti, Vuovdega ja Sámit-bellodat.

– Dál lea maiddái čielga eanetlohku evttohuvvon sámesoahpamuša vuostá, nu ahte lea hui eahpevissis dohkkehago dievasčoahkkin evttohusa, dadjá Heikki.

Ruoŧa Sámediggi gieđahallá Davviriikalaš Sámesoahpamuševttohusa bearjadaga dievasčoahkkimis. Dan ovdal dollojuvvo duorastaga Ollessámi seminára Davviriikalaš sámesoahpamušas, masa oassálastet maid Suoma Sámedikki ovddasteaddjit.

Ođđa stivra vuostálastá maid čearromiellahttuvuođa viiddideapmi.

Seailugo ođđa stivrra váldi olles njealji jagi baji?

Stuorra gažaldat Heikki mielas lea dat, ahte seailluhago ođđa stivrra válddis olles njeallje jagi.

Golbma bellodaga leat ideologalaččat hui lahkalagaid: Riikkabellodat, Guovssonásti ja Vuovdega. Dain leat 15 báikki. Ruoŧa Sámedikkis leat 31 sámediggelahtu.

Guovtti eará stivrabellodagas, Sámit-bellodat ja Sámiid álbmotjienastus -bellodat, fas leat oassái earálágan ideologalaš vuođđu, eandalit dakkár áššiin, mat laktasit sámiid vuoigatvuođaide ja sámečearuide.

Dál gáibiduvvo stuorra politihkalaš máhttu ja kompromissadáhttu, vai gávdno oktasaš linnjá, árvala Heikki, muđui sáhttá geavvat nu ahte stivra bieđgana gaskan baji.

Jörgen Heikki kommeanttaid sáhttá fitnat guldaleamen sámegillii dáppe ja lohkamin ruoŧagillii dáppe.

Ođđa jođiheaddji luohttevaš stivrabellodagaid ovttasbargui

Ruoŧa Sámedikki ođđa stivraságadoalli Per-Olof Nutti mielde sámiálbmot lea válgabohtosiin hálidan čájehit, ahte dat hálida rievdadusaid.

– Mun jáhkán, ahte sámiálbmot lea jo čájehan go leat válggaid dahkan, ahte dál lea áigi rievdadit sámepolitihka. Mii leat dál vihtta bellodaga, mat leat ovttas mannan ja mis lea ulbmil, ahte dat galgá rievdat, dadjá Nutti Ruoŧa Sámeradio jearahallamis.

Per-Olof Nutti
Govva: David Rydenfalk / Sameradion & SVT Sápmi

Nutti lea luohttevaš bellodagaid ovttasbargui. Vuođđobargu dasa lea dahkkon geasi áigge.

– Dát ii leat dáhpáhuvvan ijas, dát lea álggahuvvon válgabeaivvi maŋŋá. Mii leat čađat áigge doallan oktavuođa, olles geasi geahččalan čatnat buot bellodagaid oktii ja soabadit.

– Dat ferte addit ja váldit ja dat lea doaibman dán rádjái bures. Mun dovddan dan, ahte dat guokte unnit bellodaga bohtet addit oba olu dan min ovttasbargui. Ja lea hui buorre, ahte leat dakkár bellodagat mielde, main leat vehá sierralágan oainnut mo galgá rievdadit min servodaga, Nutti smiehtada.

Varrasamosat: Sápmi

Váldoođđasat

Varrasamosat

Muualla Yle.fi:ssä