Sápmi |

"Ruoŧa stáhta luobaha sápmelaččaid eatnamiid ruvkeindustriijai"

Ruoŧa stáhta atná ruvkedoaimmaid dehálabbon go boazodoalu ja sámiid vuoigatvuođaid. Dat bođii ovdan duorastaga, go Ruoŧa ráđđehus muitalii, ahte guottiha ođđa nihkkelruvkke rahpama sámiid árbevirolaš eatnamiin Rönnbäckenis, Deartna lahkosis. Čieža Ruoŧa sámebellodaga ja organisašuvnna dubmejit Ruoŧa stáhta oaivila.

Deardna
Ruoŧa stáhta doarju Davvi-Ruoŧa Rönnbäckenii plánejuvvon ruvkedoaimmaid. Govva: SVT

Ruoŧa ráđđehus muitalii duorastaga, ahte doarju Davvi-Ruoŧa Rönnbäckenii plánejuvvon ruvkedoaimmaid. Ráđđehus atná minerálaid boltuma dehálabbon go boazodoalu ja eará eamiálbmotvuoigatvuođaid.

- Nihkkelruvkkes lea eanemus ekonomalaš ávki. Ruvke sáhttá buktit guvlui 500 ođđa bargosaji, čuoččuha ráđđehus.

Ruvke boađášii Deartna lahkosii sámiid árbevirolaš guohtuneatnamiidda. Ráđđehus mieđiha, ahte ruvke hehtte sihke boazodoalu ja mátkkošteami.

- Das leat váikkuhusat guovllu eará ealáhusaide, muhto ruvkke eallinahkin lea meroštallon dušše 27 jagi, man maŋŋá eana máhcahuvvo luonddudillái, lohpidit ráđđehusas.

"Ruoŧŧa ii gudnejahte sámiid vuoigatvuođaid"

Čieža Ruoŧa sámebellodaga ja organisašuvnna leat ovttas čállán cealkámuša, mainna dubmejit Ruoŧa stáhta oaivila. Cealkámuša mielde Ruoŧa stáhta ii ane árvvus sámiid ja riikkaidgaskasaš eamiálbmotvuoigatvuođaid. Bellodagat ja organisašuvnnat imaštallet maiddái dan, ahte ealáhus-, energiija- ja diehtojuohkinministeriijas lea váldi mearridit sámemánáid boahttevuođas árbevirolaš ássanguovlluin.

- Dán oainnus lea prinsihpalaš mearkkašupmi buot Ruoŧa sápmelaččaide. Mii vuostálastit sakka stáhta doaimmaid, maiguin dat dušše joatká sámiid árbevirolaš eatnamiid koloniserema. Mii áigot doalvut ášši riikkaidgaskasaš gieđahallamii, celket sámebellodagat ja organisašuvnnat.

"Boazodoalu ja ruvkeindustriija ii sáhte oktiiheivehit"

Rönnbäckena guovlu lea meroštallon sihke boazodoalu ja ruvkeindustriija beroštupmeguovlun. Alimus duopmostuollu gávnnahii goit miessemánus 2012, ahte dán guokte ealáhusa ii sáhte oktiiheivehit.

Duopmostuolu mielde ráđđehus ii lean dahkan mearrádusa ealáhusaid gaskka ja sáddii ášši ruovttoluotta stáhta gieđahallamii. Dál ráđđehus lea mearridan prioriseret nihkkelruvkke.

Rönnbäckena ruvkke vuostálasti organisašuvdna "Stoppa gruvan i Rönnbäck i Björkvattsdalen" mielde ruvkeguovlu boađášii leat Ubmi gávpoga sturrosaš. Ruoŧa sámeguvlui leat plánen máŋggaid earáge ođđa ruvkkiid.

Varrasamosat: Sápmi

Váldoođđasat

Varrasamosat

Muualla Yle.fi:ssä