Sápmi |

Ruoŧas gártet doallat 15 000 bohcco áiddiid siste – sivvan golbma Suoma-Ruošša gumppe

Ruoŧas leat máksán boazodoalliide Suoma-Ruošša gumpppiid dihte jo miljovnnaid ruvnnuid ovddas buhtadusaid.

Susi Ähtärin eläinpuistossa
Suomas dahje Ruoššas Ruŧŧii johtán gumppet dagahit stuorra ruđalaš dáhpagiid Ruoŧa čearuide. Govva: Pasi Takkunen / Yle

Golbma Suoma-Ruošša gumppe leat dagahan stuorra váttisvuođaid Ruoŧa boazodoalliide, muitala Ruoŧa sámeradio. Dát gumppet leat DNA-iskosiin duođaštuvvon leat namalassii Suoma-Ruošša gumpenális.

Dál 15 000 bohcco borret daid dihte fuođđariid, eaige leat dálveguohtumiin. Čearut eai duostta johtit dálveguohtumiidda, go ballet gumppiid speadjagoahtit.

Suoma-Ruošša gumppiid dihte Ruoŧa stáhta luonddugáhttendoaimmahat lea máksán boazodoalliide miljovnnaid ruvnnuid ovddas buhtadusa barggus ja fuođđargoluin, muitala Ruoŧa Sámeradio.

– Čearut sáhttet šaddat dál ruđalaš váttisvuođaide. Ii mange čearus leat ruhta biebmat bohccuid ná gumppiid dihte, muitala Jonas Stenberg Kikkejaur čearus.

Luokta-Mávas čearru lea aiddo dál rátkimin Árviesjávrri ja Johkamohki gaskkas. Boazodoalli Lars Ánde Bær ballá, ahte guovllus lea vel njealjátge gumpe.

– Ruoŧa riikkabeivviid mearrádusa mielde Ruoŧas spiret eai galggašii leat boazodoalloguovllus. Dál gumppet rihkkot dan mearrádusa, muitalii Bær davviriikkalaš Buorre iđit Sápmi -radiosáddagis maŋŋebárgga.

SR sameradion ja SVT dieđuid mielde 15 000 bohcco fuođđarat bohtet máksit 15 miljovnna ruvnnu. Dasa galgá vel lasihit eará goluid, dego fuođđariid geaseheami ja nu viidásabbot.

Ruoŧa stáhta háliida dál sirdit dán golbma Suoma-Ruošša gumppe Mátta-Ruŧŧii. Stáhta hálida sirdit gumppiid, daningo dan mielas gumppet leat genetihkkalaččat dehálaččat davviriikkalaš gumpenállái. Váttisvuohta goit lea, go heajos siivvu dihte daid eai leat gávdnan.

Maŋimuš gumppet leat dihtton Svaipa čearu eatnamiin, gos dat ledje goddán ovcci bohcco.

Varrasamosat: Sápmi

Váldoođđasat

Varrasamosat

Muualla Yle.fi:ssä