Sápmi |

Ruoŧas ja Norggas ii leat máskaávžžuhus skuvllaide, muhto Lappis boarrásut oahppit geavahit máskka – "Válddán ovdal jo oaivebakčasa, go korona"

Ohcejohkalaš nuora guovttos oaivvildeaba, ahte máskka lea dehálaš geavahit vaikko máska sáhttáge dagahit muhtin váikkuhusaid.

Lappi badjeskuvllaid ja nuppi dási oahppit geavahit máskka vel dán vahkku ovdal čuoiganluomu álgima. Čuoiganluomu maŋŋá sii eai máhca lagašoahpahussii, baicca skuvla joatkašuvvá gáiddusin.

Suomas ávžžuhit geavahit máskka badjeskuvllain ja nuppi dási oahppolágádusain, jos guovllu koronavirusdilli lea leavvanmuttus dahje vearráneamen leavvanmuddui.

Ohcejohkalaš nuora guovttos áddeba máskka mearkkašumi, muhto leaba fuobmán muhtin váikkuhusaid, maid máska dagaha.

– Gal dat lea diená buorre, go goittotge korona lea viehka váralaš. Muhto gal dat lea vehá váivi guhkes beaivvi geavahit máskka, veháš goiká njálbmi, čotta ja njunni, muitala Ohcejoga sámelogahaga nuppi luohkká oahppi Ánte Tenoranta.

Elle Raudasoja
Elle Raudasoja oažžu máskkas oaivebakčasa. Govva: Xia Torikka / Yle

Tenoranta luohkkáskibir Elle Raudasoja fas lea vásihan, ahte oaivi sáhttá bávččastišgoahtit, go geavaha máskka olles beaivvi.

– Dat lea váivi ja unohas, go oaivi bávččasta, muhto gal mii leat buohkat boahtán dan bohtosii, ahte loahpaid loahpas dat lea hirbmat buorre.

Ruoŧas ja Norggas ii leat máskaávžžuhus skuvllaide

Norgga ja Ruoŧa ektui Suopma lea spiehkastat máskaávžžuhusainis. Ránnjáriikkaid skuvllain ii vel dárbbaš geavahit máskkaid.

Ruoŧas ii leat leamašan sáhkage das, ahte skuvllain galggašedje geavahit máskka. Ruoŧas leat dasa lassin maid eanaš joatkkaskuvllat gáiddusoahpahusas, ja Ruoŧa dearvvašvuođaeiseváldi lea ávžžuhan joatkit gáiddusoahpahusa ain jo cuoŋománu rádjai.

Norggas leat maid vihkkehallamin máskaávžžuhusa addima skuvllaide.

Ánte Tenoranta
Ánte Tenoranta deattuha, ahte máskka dagahan váikkuhusat leat liikká buorebu go ieš koronavirus. Govva: Xia Torikka / Yle

Ánte Tenoranta mielas lea dehálaš geavahit máskka vaikko dat leage unohas.

– Gal mun válddán oaivebákčasa ovdal go válddán korona, oaivvilda Tenoranta.

Guldal Ánte Tenoranta ja Elle Raudasoja jearahallama dás. Jietna: Xia Torikka / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä