Sápmi |

Ruošša eiseválddit leat mearridan heaittihit árktalaš eamiálbmotsearvvi – Sámiráđi váldočálli atná dáhpáhusa surgadin

Organisašuvnna doarjjaolbmot oaivvildit, ahte heaittihemiin organisašuvnna Ruošša eiseválddit mávssahit sidjiide.

Sámeráđi presideanta Áile Jávo
Sámiráđi váldočálli Áile Javo lea fuolas Ruošša beale eamiálbmotovddasteaddjiid dorvvolašvuođas. Govva: Dan Robert Larsen / NRK

Moskova gávpotriekti lea gieskat mearridan heaittihit Árktalaš eamiálbmogiid olmmošvuoigatvuođasearvi CSIPN.

Eamiálbmotrivttiid doarjjaorganisašuvdna lea vuođđuduvvon jagis 2001 ja dan ulbmil leamaš doarjut eamiálbmogiid Davvi-Ruoššas ja Sibirijás. Organisašuvnna doarjjaolbmot oaivvildit, ahte heaittihemiin organisašuvnna Ruošša eiseválddit mávssahit sidjiide, čállá eaŋgalsgielat The Moscow Times -ođassiidu.

Árktalaš eamiálbmogiid olmmošvuoigatvuođasearvi CSIPN lea juo ovdalis leamašan Ruošša eiseválddiid čáhppes listtus, masa leat čoaggán organisašuvnnaid, main leat oktavuođat olgoriikkaide dahje leat ožžon ruhtadeami Ruošša olggobealde. Jagis 2012 vuođđuduvvon lágas sullii duhát searvvi leat namuhuvvon nu gohčoduvvon olgoriikaageantan Ruoššas.

CSIPN biddjui čáhppes listui jagis 2015. Mannan jagi searvi goittotge váldojuvvui eret eiseválddiid čáhppes listtus.

Eiseválddit mearridedje loahpahit searvvi láhkarihkkumiid dihte

Moskova gávpotriekti mearridii gaskavahku burgit eamiálbmotsearvvi ja loahpahit dan doaimma.

– CSIPN doaimma bisseheapmi addá searvái jápminduopmu, dadjá searvvi ášševuoddji Grigory Vaypan Kommersant business daily -neahttabláđđái.

Kommersant dieđuid mielde Ruošša vuoigatvuođaministeriija lei bivdán duopmostuolu heaittihit eamiálbmotorganisašuvnna danin, go searvi lea rihkkon máŋgga láhkai Ruošša searvelága.

Vaypan čilge, ahte sis leamašan gal báberbargguiguin muhtin váttisvuođat, muhto searvi lei juo divvugoahtán váttisvuođaid ovdal duopmostuolu mearrádusa.

CSIPN-searvvi jođiheaddji Rodion Sulyandziga namuha eiseválddiid mearrádusa dakkárin, mainna Ruošša eiseválddit geahččalit goahcat doaimmaid, mat eai leat eiseválddiid dáfus positiivvalaččat. Sulyandziga mielas eiseválddiid mearrádusa duohkin leat ekonomalaš intreassat.

Rodion Sulyandziga
CSIPN-searvvi jođiheaddji Rodion Sulyandziga. Govva: Ritva Torikka / Yle

– Árktalaš guovlu ja dan resurssat mearkkašit ollu Ruošša ekonomiijai. Danin fitnodagat oidnet eamiálbmogiid sin doaimmaid easttan, dadjá Rodion Sulyandziga.

– Mii leat suodjalan álbmogiid rivttiid viehka guhká. Mis leamaš vejolašvuohta gulahallat ja beassat mielde riikkaidgaskasaš lávddiide, main mii leat hállan rihkkumušaid birra.

Sámiráđi váldočálli ballá searvvi aktiivvaid dorvvolašvuođa beales

Moskova gávpotrievtti mearrádus heaittihit CSIPN-searvvi ii leat velá fámus ja das lea guoddalanáigi moadde vahku mearrádusa addima maŋŋá.

Sámiráđi váldočálli Áile Javo dadjá, ahte heaittihanođđasa lei váivi gullat, go searvi leamašan aktiivvalaš riikkaidgaskasaš lávddiin ja Ruoššas eai leat máŋga dán sullasaš eamiálbmotsearvvi.

Javo mielde Sámiráđđi leamaš oktavuođas CSIPN-searvvi ovddasteaddjiide áššis ja gullan, ahte searvvi aktiivvat eai leat áigumin vuollánit. Searvi sáhttá doaibmat dál vel dassážii, go guoddalanáigi lea jođus.

– Sii áigot guoddalit duomus ja figget juohke láhkai ealihit doaimma. Vaikko searvi heaittihuvvošiige, de áigot searvvi aktiivvat goittotge gávdnat mannu vuogi, man bokte áŋgiruššet eamiálbmogiid áššiid ovdii.

Javo dajai vuossárgga Buorre iđit Sápmi -sáddagis, ahte son lea fuolaš CSIPN-searvvi doaibmiid ja sin bearrašiid dorvvolašvuođas.

– Mii diehtit, ahte jus Ruošša eiseválddiiguin bearehaga nágge, de dat sáhttá leat váralaš. Mii jurddašit goittotge, ahte mađe eanet ášši oažžu riikkaidgaskasaš fuomášumi ja Ruošša eiseválddit oidnet, ahte mii čuovvut dili, de dáid olbmuide ii dáhpáhuva miige váralaččaid.

Guldal áššis eanet Yle Areenas.

11.11.2019 dii. 16:32 Divvojuvvon Áile Javo tittel. Ovdal namuhuvvui su leat Sámiráđi presideanta, muhto Javo leage Sámiráđi váldočálli.

Varrasamosat: Sápmi

Váldoođđasat

Varrasamosat

Muualla Yle.fi:ssä