Sápmi

Ruotnasat šiljus tallearkka ala – Konišjávrri gáttis šaddet tomáhtat, águrkkat, ruoná diehppegálat ja olu eará

Anne Karhu-Angeli.
Anne Karhu-Angeli bearrašis leat beassan dán gease herskkostallat rušppiiguin, maid leat ieža šaddadan muorralođáin šiljus. Govva: Inger-Elle Suoninen / Yle

Karhu-Angeli bearraša šiljus šaddet tomáhtat, águrkkat, geassegurbbehat, ruonádiehppegálla ja olu eará.

Anára girkosiidda lahkosiin Konišjávrri gáttis anárlaš Anne Karhu-Angeli šaddada šiljustis iešguđetlágan ruotnasiid. Alit viesu duohken gávdno semeanttas dahkkon lasttain ráidu. Daid mielde go vázzá, gávdná iežas šaddogárddis. Šiljus leat ruotnasat ja muorjjit ja daid bálddas lea vel šaddovistinai.

Dán šaddogárddis Karhu-Angeli oažžu tallearkka ala earret eará iešguđetlágan tomáhtaid ja águrkka, geassegurbbeha, lastagálla, ruoná diehppegála, rabárbera, saláhta, rušppi, buđehiid, urttaid ja iešguđetlágan murjjiid. Su bearaš lea ieš šaddadan dáid šattuid siepmaniin.

Anne Karhu-Angelin kasvimaa.
Ruotnasat leat álggos illun čalmmiide, go dain leat stuorra lasttat ja lieđit ja maŋŋel vel hervejit biebmobeavddi iešguđet fearggaiguin. Govva: Inger-Elle Suoninen / Yle

Ruotnasiid šaddadeapmi gáibida čielggadanbarggu

Stuorámus oassi Anne Karhu-Angeli šilju šattuin šaddá muorralođáin dahje šaddadanseahkain makkárge suoji haga. Šaddovisttis sus leat tomáhtat ja águrkkat.

Tomaatti.
Tomáhta Karhu-Angeli lea šaddadan álggos siste ja dál dat leat šaddovisttis. Govva: Inger-Elle Suoninen / Yle

Davvin sáhttet maiddái geasset leat oalle čoaskkes dálkkit. Mot de diehtá ja máhttá dikšut ruotnasiid nu, ahte dat girdet maiddái davviguovllus?

– Gal mun lean váldán čielgasa, ahte maid miiget dárbbaša. Lean lohkan girjjiid ja lean Facebookas muhtin joavkkuin. Daid šattuin main lean beroštan, lean váldán čielgasa maid dat dárbbašit, muitala Karhu-Angeli.

Go siepmaniid gilvá šaddadanlođáide olggos, nu galgá šattuin leat álggos suokka alde, go Sámis leat nu galbma dálkkit. Gállašattuin galggalii leat čađat suokka alde, muhto Karhu-Angeli lea váldán eret dan, go dat šadde nu stuorrán.

Son lea šaddadan dušše geassegurbbeha, tomáhta ja šattovisteágurkka viesus, ovdal go lea dolvon daid olggos dahje šaddovistái. Eará ruotnasiid son lea gilván njuolga šaddadanlođáide ja seahkaide olggos.

Kesäkurpitsa.
Geassegurbbehiin Karhu-Angeli bearaš lea beassan herskkostallat jo dán gease ja velnai ruotnasat saddet. Govva: Inger-Elle Suoninen / Yle

Karhu-Angeli rávve, ahte áhkus gánneha jearrat. Son lea iežas áhkus ožžon rávvaga, ahte guollebázahusaid gánneha bidjat rabárberii.

– Áhkuin galgá jearrat – sis, geat leat šaddadan šattuid.

Maiddái geahččalemiin gávdná buot buoremus vuogi. Geassegurbbehiid buohta Karhu-Angeli fuomášii, ahte muorralođas dat orrot šaddame buoremusat.

– Dat orru, ahte lea leamašan buorre geassi, ahte bures lea šaddan, muhto suvragurka mus ii birgen bures. Dan galgá geahččalit muhtin eará eatnamii bidjat boahtte gease.

Dán geasi Karhu-Angeli bearrašis leat beassan borrat jo saláhta, tomáhta, rušppi, rabárbera, geassegurbbeha ja muhtin urttaid, muhto ruoná diehppegálla ja fenkola šaddet vel vuordit.

Parsakaali
Ruoná diehppegálla ii beasa vel čoaggit. Govva: Inger-Elle Suoninen / Yle

Guldal dá Anne Karhu-Angeli jearahallama. Jietna: Inger-Elle Suoninen / Yle

Dán áššis oainnát lasi Ylen aamu -iđitprográmmas Yle TV1:žis diibmu 8.25 sulaid.

Varrasamosat

Muualla Yle.fi:ssä