Sápmi |

Ruvkemášenat jođus Gállogii - Jokkmokk Iron Mines bávkališgoahtá otne

Ruvkefitnodat Jokkmokk Iron Mines áigu bávkališgoahtit otne Gállogis Davvi-Ruoŧas. Stuimmit dušše sturrot guovllus, go boles lea váldán gitta máŋggaid miellačájeheaddjiid ja caggan geainnu guvlui, gos fitnodat áigu bávkalit.

Gállok
Boles lea váldán máŋggaid miellačájeheaddjid gitta Gállogis. Govva: Henrik Blind

Ruvkefitnodat Jokkmokk Iron Mines áigu bávkališgoahtit otne gaskavahku Gálloga guovllus Johkamohkis. Dálá dieđu mielde ruvkefitnodat galggai bávkalit vuosttas geardde diibmu 9.00, muhto Ruoŧa Sámeradio mielde mášenat ledje jođus guvlui easka diibmu 11.17 Suoma áigge.

Ruvkefitnodat Jokkmokk Iron Mines galggai jo vahku dassái bávkališgoahtit guovllus, muhto gárttai maŋidit bávkalemiid, go Jåhkågasska čearru váidalii, ahte lea ožžon dieđu menddo maŋŋidit.

Boles váldán gitta máŋggaid aktivisttaid

Boles lea váldán máŋggaid miellačájeheaddjiid gitta ja caggan dál aktivisttain geainnu guvlui, gos ruvkefitnodat áigu bávkalit.

Guovllus leat sullii 20 miellačájeheaddji ja sápmelačča. Bolesis leat báikki alde bolesbiilla lassin guokte minibusse, main gitta váldon miellačájeheaddjit dál čohkkájit. Boles ii leat váldán gitta ráfálaš miellačájeheaddjiid.

Ruoŧa Sámeradio dieđuid mielde okta aktivista lei leikon bensena iežas ala ja áigon cahkkehit iežas, muhto boles gearggai váldit su maid gitta.

Securitas gáikkui aktivisttaid dáidaga

Fáktabálvalusfitnodat Securitas gáikkui árrat gaskavahkkoiđit dáidaga, man báikkálaš dáiddarat ledje ráhkadan vahkuloahpa bargobájiin Gállogis. Lars Guttorm Blind imaštallá, gii lea gohččon Securitas bargat dan. Securitas fávttat eai kommentere ášši.

Varrasamosat: Sápmi

Váldoođđasat

Varrasamosat

Muualla Yle.fi:ssä