Sää´mjânnam |

Saakk-kooska Yle Sääʹmest: Aanrõšǩiõl ǩeʹrjjtummuž tuʹtǩǩeet, defibrillaattorid Suäʹđjel uʹcc siidid da Peppi Peddjueʹlǧǧ jåått sääʹmsiidin

Täʹst kaaunak piâtnâc saakk-kooskaid.

Jietna: Anarâškielâ seervi saavâjođetteijee Marja Liisa Olthuis
Jietna
Ǩiõlltuʹtǩǩeei da universitett lehttor Marja-Liisa Olthuis täätt oummid ǩeeʹrjted 10-15 ciâlkki mainnsid aanrõšǩiõl ǩeeʹrjteejai ǩiõlâânnmõõžž tuʹtǩǩummuž vääras. Kulddâl lââʹzz piâtnâc ođđsin. Jietna: Yle Areena


Aanrõšǩiõl ǩeeʹrjteejai ǩiõllâânnmõõžž haaʹleet tuʹtǩǩeed

Ǩiõlltuʹtǩǩeei Marja-Liisa Olthuis, Trond Trosteruud da Hanna Outakoski lie tuʹtǩǩeʹmmen, mäʹhtt aanrõšǩiõllsa lie mättjam ǩiõl, mäʹhtt ärvvtõõllâd ǩiõllsilttõõzzâz da mäʹhtt sij ǩeeʹrjte aanrõšǩiõl.

Ǩiõlltuʹtǩǩeei äigga ǩeeʹrjted teemm pirr artikkel, mõõzz sij nåʹrre oummuin vuäŋkõs, nuʹt 10-15 ciâlkki kokksaž mainnsid ääʹšš pirr. Marja-liisa Olthuis mieʹldd artikklest haaʹleet vuäǯǯad vueiʹnnemnalla alggmeeražǩiõl, mâʹte aanrõšǩiõl ǩeeʹrjtummuž sââʹjj.

Uʹcc siidid haʹŋǩǩeet defibrillaattorid da škooultet oummid tõi âânnmõʹšše

Suäʹđjel kåʹdd uʹcc siidid ääiǥče haʹŋǩǩeed defibrillaatorid da pueʹreed siidi oummui vuõssveäʹǩǩsilttõõzzid jieʹttsââʹjest. Suäʹđjel kåʹddhalltõs lij ooʒʒam projeʹkttteäggtõõzz, mõin haʹŋǩǩeed kuuđ siʹjdde defibrillaattorid da škooulted täi âânnmõõžž.

Projeʹkttteäggtõõzz lij ooccâm väjja 16 000 euʹrred teäggtõõzz Leader Pohjoisin Lappi -õhttõõzzâst. Haʹŋǩǩõõzz äiʹǧǧpoʹddjen lij plaanuum 1.12.2018-30.6.2020. Projeʹktte lie iʹlmmtam Lokka, Moskuvaara, Riipi, Sassali, Seitajärvi da Syväjärvi siid.

Peppi Peddjueʹlǧǧ jååʹtt neäʹttel-looppâst Lääʹddjânnam beäʹlnn Sääʹmest

Beaivvaš -teatter päärnaiteatterčuäʹjtõs Peppi Nallesuohku (sä. Peppi Peddjueʹlǧǧ) lij tän neäʹttel-loopp ääiʹj jååttmen Uʹcjooǥǥâst, Aanrest da Vuõččust. Vuõssmõs sääʹmǩiõllsaž Peppi Nallesuohku čuäʹjtõs lij tän räjja leämmaž sami peäglvaž.

Tâʹvvsääʹmǩiõʹlle čuäʹjtum päärnaiteatterčuäʹjtõs lij vueiʹnnemnalla Uʹccjooǥǥâst piâtnâc 12.10 čiâss 18:00 Uʹccjooǥǥnjääʹlm škooulâst, Aanrest sueʹvet 13.10.čiâss 17:00 sääʹmkultturkõõskõs Sajooʹzzâst di Vuõččust vuõssaarǥ 15.10. čiâss 18:00 Vuõčču škooulâst.

Sääʹmǩiõllsaž musikkmessu Uʹccjooǥǥ ceerkvest

Uʹccjooǥǥ ceerkvest riâššât puõʹtti pâʹsspeeiʹv 14.10 tâʹvvsääʹmǩiõllsaž musikkmessu. Mieʹldd lie sääʹmpapp Mari Valjakka, Erva Niittyvuopio, Annukka Hirvasvuopio-Laiti da Anna Näkkäläjärvi-Länsman di sääʹmǩiõllsaž risttmättškooul Masai-joukk. Ceerkavkaaʹffin prääzkjet Erva Niittyvuopio valljummuž eeʹjj paaʹppen.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä