Sää´mjânnam |

Saaʹmi aazztemprääʹznka ooʒʒât jååʹđteeʹjid – prääʹzniǩ plaaneet õõuveäkka puk säʹmmlaivuiʹm

Saaʹmi siidsåbbar da kultturfoond konttrest riʹjttai tuâj, ko nuõrttsäʹmmlai aazztummuž 70 eeʹjj prääʹzneǩ lij juʹn âlddan jåtlânji.

Kolttasaamelaisten asuttamisjuhlan 70-vuotisjuhlat
Aazztemprääʹžneǩ teemman lij Õõutveäkka da tõnʹt pukid haaʹleet mieʹldd jõnn prääʹzneǩ peeiʹv plaanummša. Govva: Saaʹmi kultturfondd

Nuõrttsaaʹmi aazztem 70-eeʹjjprääʹzneǩ prääʹzkjet sueʹvet 24. påʹrǧǧmannu Čeʹvetjääuʹrest. Ååʹn jiõčč prääʹznka da jeäʹǩǩeskonsertta ooʒʒât õhttseʹžže neellj jeeʹres âkksa reʹttvõs jååʹđteei, mušttal saaʹmi siidsåbbar piisar Terhi Harju.

– Siõmnai siõmmnai kâʹl tobdd, što lij jeänab da jeänab tuâj. Ooʒʒâp ââʹn neellj jeeʹres âkksa jååʹđteei peiʹvvprääʹznka da jeäʹǩǩeskonseʹrtte. Jååʹđteei vueiʹtte leeʹd sääʹm- da lääʹddǩiõllsa, mušttal Harju.

Saaʹmi siidsåbbar piisar Terhi Harju.
Saaʹmi siidsåbbar Terhi Harju tuâivat puk mieʹldd plaaʹneed da riâššad påʹrǧǧmannu jõnn prääʹzniǩ. Govva: Hanna-Maaria Kiprianoff

Prääʹzniǩ reâššmõš da plaanummuž lie tuõʹđi pueʹrr sââʹjest juʹn da prograamm haaʹleet tuejjeed õõutveäkka säʹmmlaivuiʹm.

Jååʹđteei lââʹzzen prääʹznka ooʒʒat še jiõččtäättlaž tuâjjlaid veäʹǩǩen prääʹzniǩ riâššmõõžžin ouddâl da mâŋŋa prääʹzneǩ da tõn poodd.

– Nääiʹt mij haaʹleep väʹldded oummid mieʹldd tän prääʹzniǩ raajjma, ko tät teemm lij še "Õõutveäkka", de nuʹt tuejjeep õõutveäkka tän prääʹzniǩ ouʹdde tuâj, särnn Harju.

Vueʹrddet jõnn šõddmõõžž

Nuõrttsäʹmmlai aazztummšest šâdd påʹrǧǧmannust 70 eeʹǩǩed. Vääini mâŋŋa nuõrttsäʹmmla aazzteš Čeʹvetjääuʹr vuuʹd lââʹzzen še Njeäʹllem da Keväjääuʹr vuuʹdid. Tõn mâŋŋa tän peeiʹv leät prääzkjam lååieeʹjj kõõskin.

Påʹrǧǧmannu prääʹzniǩ programm iʹlla veâl obbnes õlmstâʹttum, leâša prääʹzneǩpeiʹvv älgg ortodookslaž liturgiain tueʹlää da jiõčč prääʹzneǩ lij čiâss 14.00 ääʹljeeʹl Čeʹvetjääuʹr škooul pirrõõzzâst. Peiʹvv poott jeäʹǩǩeskonsertta, kååʹtt älgg čiâss 19.00.

Saaʹmi siidsåbbar piisar Terhi Harju leäi mieʹldd Dearvva! Tiõrv! Tiervâ! -vuõlttõõzzâst mušttleʹmmen jeänab, mâiʹd vueʹrddet nuõrttsäʹmmlai aaztummuž 70 eeʹjj prääʹzneʹǩpeeiʹvest.

Obb programm õlmstâʹtted puõʹtti neäʹttli ääiʹj.

Saaʹmi siidsåbbar piisar vuârdd jiõčč tän prääʹzneǩ jiânnai, ij-han säʹmmlain leäkku leämmaž jiânnai šõddmõõžž jiijj õhttõõzz seʹst.

– Jie-han meeʹst leäkku nuʹt jiânnai leämmaž näkkam šõddmõõzz, ko pâi juõʹǩǩ lååi eeʹǩǩ. Lij-han tõt jõnn šõddmõs, ko pâi juõʹǩǩ lååǥǥad eeʹjj riâššât. Juõʹǩǩ vueʹrdde tõn jeänab teâđast juõʹǩǩ vuâra, mon ååskam. Jiânnai täʹst lij tuâjj riâššad prääʹzneǩ.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä