Säämi |

Säämi muusikkuávdáš uárnee nelji live stream -konsert kesimáánust – Wimme Saari: “Liihân tot váhá komálâš, ko keččeeh iä lah pääihi alne"

Säämi muusikkuávdáá live stream -konsertijd puáhtá čuávvuđ neetist liiŋkâ peht, kost peri.

Ulla Pirttijärvi, Wimme, Suommkar, Ante Aikio
Säämi muusikkuávdáá live stream -konsertijn láá fáárust Ulla Pirttijärvi & Ulda, Ante Aikio, Wimme & Rinne já Suõmmkar. Govva: Ante Aikio, Tuupa Records Oy, Mari Korpimäki, YLE/Vesa Toppari,

Säämi muusikkuávdáš uárnee live stream- konsert neljii kesimáánu ääigi. Jyehi tove konsertist lii fáárust artist teikkâ muusikjuávkku.

Säämi muusikkuávdáá vuávájeijee Oula Guttorm muštâl, ete Säämi muusikkuávdáá tooimâ ulmen lii orniđ konsertijd, mutâ tääl ko koronavirus tile keežild tot ij lah máhđulâš, te sij meridii orniđ live stream -konsertijd.

Live stream- konsert puáhtá čuávvuđ kost peri, ko peri lii mottoom piergâs moin peesâ lehâstiđ live stream -liiŋkâ. Guttorm osko, ete konsertrááiđui artisteh mättih lávluđ meid kameraid.

– Tiäđust-uv tot sáttá leđe uđđâlágán feerim, mutâ taah artisteh láá hárjánâm artisteh, kiäh láá ráhtám maaŋgâlágánijd konsertijd. Tääl sij tuše oovdânpyehtih konsert kameraid iäge keččeid.

Kuldâl Oula Guttorm sahhiittâllâm täst.


Wimme Saari
Wimme Saari piäsá vuot porgemáánust táválâš konsertijd juoigâđ. Govva: Inger-Elle Suoninen / Yle

Frans Wilhelm Saari ađai Wimme Saari lii fáárust Säämi muusikkuávdáá konsertrááiđust 24. peeivi kesimáánu. Sun lii hárjánâm toollâđ konsertijd, kost iä lah ulmuuh pääihi alne kuldâlmin. Liijká tot lii suu mielâst komálâš ko keččeeh iä lekken pääihi alne.

– Kale tot mana ko munhân laaviim ain vuáijuđ jieččân maailmân ko juoigâškuáttám, jiemhân mun uáini láá-uv tobbeen ulmuuh, sun muštâl.

Saari muštâl, ete porgemáánust sun piäsá vuot lávluđ já juoigâđ táválijn konsertijn. Ovdil porgemáánu sun kuittâg áigu väzziđ, kuvviđ já sáttá meid paddiđ uđđâ muusik, tääl ko lii asto.

Kuldâl Wimme Saari sahhiittâllâm täst.

Varrasamosat: Säämi

Váldoođđasat

Varrasamosat

Muualla Yle.fi:ssä