Sápmi

Saaʹmi ouddoummuvaali võboršiiʹǩǩi piijjmõš älgg – vaal ââʹnet čõhččmannust

Kolttien luottamusmiesvaalit
Saaʹmi ouddooumažvaal riâššâd juõʹǩǩ kuälmad eeʹǩǩ. Govva: Vesa Toppari / Yle

Nuõrttsäʹmmla jiõnste tän čâhčča ođđ ouddoummust. Vaalpeiʹvv lij 20.9.2020.

Võboršiiʹǩǩi piijjmõš eeʹjj 2020 saaʹmi ouddoummuvaalid älgg täʹbbe 15. sueiʹnnmannu. Võboršiiʹǩǩi piijjmõš poott sueʹvet 15. påʹrǧǧmannu čiâss 12.00.

Saaʹmi ouddoummuvaal ââʹnet pâʹsspeeiʹv 20.9. Vaalin vaʹlljeet saaʹmi ouddoummu poʹdde 1.1.2021 – 31.12.2023.

– Saaʹmi ouddoummuvaali jäʹrjstummšest vääʹldet lokku koronavirusvueʹjj da valmštõõđat tõõzz, što äiʹǧǧtaaul vueiʹtet šiõtteed vueʹjjest šõõddi muttsi mieʹldd. ceälkk vaal-luʹvddkååʹdd saaǥǥjååʹđteei Hanna-Maaria Kiprianoff.

Sääʹmlääʹjj 48 § nuuʹbb pääiʹǩ mieʹldd ouddoummuvaalin jiõnstemvuõiggâdvuõttneeʹǩǩ lie Aanar kååʹddest 51 peiʹvved ouddâl vaalpeeiʹv jälsteei tiuʹddvälddsaž sääʹm da sij pieʹllkueiʹm. Vaalin jiõnstemvuõiggâdvuõttniiʹǩǩi loǥstõõǥǥ lie tääʹrǩstemnalla 15.8. – 20.9.

Võboršiiʹǩǩin täʹrǩǩeet vaalââʹntemvuõđ ǩiõlltääid peäʹlest

Čõõuč vaali vääras võboršiiʹǩǩi ǩiõlltäidd pueʹtted eʹpet tääʹrǩsted. Vaal-luʹvddkååʹdd åålǥpeällsaž äʹšštobddijoukk tääʹrǩast tän eeʹjj saaʹmi ouddoummuvaalin pukin võboršeʹǩǩen pijjum oummin vaalââʹntemvuõđ nuõrttsääʹmǩiõl ǩiõlltääid peäʹlest.

– Äʹšštobddijooukâst lie nuõrttsääʹmǩiõl siltteei. Vaalââʹntemvuõđ tääʹrǩstet seämma peeiʹv, ko võboršiiʹǩǩi piijjmõš lij puuttam, mušttal Kiprianoff vaal-luʹvddkååʹdd teâđtõõzzâst.

Mõõnni vuâra saaʹmi ouddoummuvaali vaal-luʹvddkåʹdd mieʹrrii riâššâd ǩiõllteestid pukid ouddooumažvõboršiiʹǩǩid.

Saaʹmi ouddoummuvaal vaʹlljeemõhttõõzz aalǥtemäʹššǩiiʹrjid ouʹdde Saaʹmi siidsåbbar koontâr Čeʹvetjääuʹrest, vaal-luʹvddkååʹdd saaǥǥjååʹđteei Hanna-Maaria Kiprianoff Čeʹvetjääuʹrest da vaal-luʹvddkååʹdd väärrsaaǥǥjååʹđteei Tauno Haltta Njeäʹllmest.

Varrasamosat

Muualla Yle.fi:ssä