Säämi |

Säämist kyehti irâttâs čođâldittám kilelis mađhâšem meerhâ – Anne Karhu-Angeli: "Mij puoh rävisulmuuh kolgâp väldiđ ovdâsvástádâs luándu kyeskee aašijn"

Aanaarlâš irâtteijee Anne Karhu-Angeli illood kilelis mađhâšem meerhâ čođâlditmist.

Video: Anne Karhu-Angeli
Säämist láá taas räi tuše kyehti irâttâs, moh láá čođâldittám meerhâ. Aanaarlâš Anne Karhu-Angeli Angeli reindeerfarm -irâttâs lii nubbe tain. Video: Anja Kaarret / Yle

Onnáá peeivi lii ain eenâb já eenâb saahâ pirâsaašijn já kilelis eellimvyevist. Meid mađhâšemsyergist lii máhđulâš čođâldittiđ kilelis mađhâšem, Sustainable Travel Finland -meerhâ.

Säämist láá taas räi tuše kyehti irâttâs, moh láá čođâldittám meerhâ. Aanaarlâš Anne Karhu-Angeli Angeli reindeerfarm -irâttâs lii nubbe tain.

– Muu irâttâs finnij čoođâ Bussines Finland ohjelm, mon sij láá ornim ko sij halijdeh, ete Suomâ ličij uáivieennâm tain pištevâš mađhâšem aašijn, iätá Karhu-Angeli.

Karhu-Angeli mielâst taan ohjelm kannat čođâldittiđ. Sun ij čođâldittám taam tuše mađhâšeijei várás.

– Lii suottâsub porgâđ taam pargo ko tiäđám, et poorgâm puoh pyereest. Mij puoh rävisulmuuh kolgâp väldiđ ovdâsvástádâs luándu kyeskee aašijn já halijdâm čäittiđ ovdâmeerhâ iärásáid.

Ubâ Suomâst suullân 80 irâttâssâd láá čođâldittám meerhâ.

Karhu-Angeli lijkkoo pargosis ennuv, ko sun piäsá savâstâllâđ ulmuigijn já puáhtá porgâđ pääihist. Stuorrâ mađhâšemjuávhuh iä sii kuuvl kuittâg puáđi.

– Ij taan mii luodâ mieldi peesâgin linjáautoin, huámmášit Karhu-Angeli.

poro
Máttá-uvsun taat skippáár anneeđ áárvust kilelis mađhâšem? Ton piemmee kuittâg máttá. Govva: Anja Kaarret / Yle

Meerhâ finnim ij lah älkkee: "Toos kullojeh hirmâd maaŋgâh ereslágáneh ääših"

Kilelis mađhâšem meerhâ finnim ij lah kuittâg mihheen älkkees homáid. Anne Karhu-Angeli juuđij škovliittâspeeivijn já koolgâi čođâldittiđ vistig ruánáá aktiviteet -sertifikaat ovdil ko peesâi čođâldittiđ taan nube ohjelm.

Ruánáá aktiviteet sertifikaat muštâl, et irâttâs váldá ovdâsvástádâs puoh luándu kyeskee aašijn.

– Toos kullojeh hirmâd maaŋgâh ereslágáneh ääših. Ij lah tuše nuuvt, et šlajâttâlah tuu ruuskijd. Kalga leđe páihálijn ohtâvuođâst ennuv veikkâba nuuvt, et váldá uáppeid teehi keččâđ maggaar irâttâs taat lii. Iä lah tuše pirâsääših.

Aanaarlâš Anne Karhu-Angeli Angeli Reindeer farm-irâttâs lii finnim čoođâ kilelis mađhâšem -ohjelm. Sun muštâl maggaar taan ohjelm čođâttem lâi. Jietna: Anja Kaarret / Yle

Heli Hemgård
Bussines Finland haalijd ovdediđ kilelis mađhâšem Suomâst, náávt muštâl viestâdem hovdâ Heli Hemgård. Govva: Visit Finland

Business Finland avžut meid aaibâs tavemuu Laapi mađhâšemsyergi irâttâsâid servâđ

Business Finland viestâdem hovdâ Heli Hemgård mield škovliittâs ij lah vaigâd, mutâ toos kullojeh kritereh maid irâttâs ferttee tevdiđ. Taah kritereh väldih vuotân ekonomâlâš, ekologilâš, sosiaallâš já meid kulttuurlâš kilelisvuođâ.

– Mij avžuuttep meid aaibâs tavemus Laapi mađhâšemsyergi irâttâsâid servâđ, iätá Hemgård.

Taat kilelis mađhâšem -ohjelm ij lah lamaš kuhháá joođoost. Keessiv 2020 vuossâmuuh irâttâsah finnejii meerhâ. Korona tovâttâm tile keežild mađhâšemirâttâsâin lii lamaš asto uásálistiđ škovliittâsân, muštâl Hemgård.

Hemgård osko, et maŋgii mađhâšeijeeh halijdeh uuccâđ ovdâsvástádâslâš pääihi kuus mađhâšiđ. Tondiet lii-uv tehálâš ovdediđ kilelis mađhâšem Suomâst.

Lase Anarâš saavâid kuulah tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä