Sápmi

Sääʹmmpihttsivuiʹm čuäʹjte kuärǥ – nuõrttsääʹmneezzan raʹjje jiijj video peäglvaž Pass the Brush -kååččast

Hannele Fofonoff Pass the brush
Nuõrttsäʹmmla raʹjje jiijjâs sääʹmmpiiutâsvideo. Govva: Erään kolttanaisen käsityöpäiväkirja

Sosiaaʹl mediast leävvan kåčč pohtt oummid õʹhtte koronaääiʹjest, mušttal sääʹmpiiutâsvideo čuõppâm Minna Moshnikoff.

Pirr maaiʹlm alggmeer lie čuäʹjtam jiijj äʹrbbpihttses sosiaaʹl mediast Pass the Brush kååččast. Uʹcc fiiʹlmin oummu vaajte takai pihttses määŋgeunnsaž da -kulttuursaž pihttsid. Vuâđđjurddjen lij, što täin videoin ǩieʹssed oummid õʹhtte vaiʹǧǧes koronaääiʹjin.

Nuʹtt še Sääʹmest lie šõddâm jeeʹresnallšem versioid kååččast. Jeäskka säʹmmla koolm riikkâst raʹjje õhttsaž video, Taarr beäʹlnn Alta vuuʹd säʹmmla õʹlmstâʹtte jiijj video, nuʹtt še juuʹlevsäʹmmla noʹrre jiijjâs pihttsid seämma videooʹje.

Täʹst šõõddi Minna Moshnikoʹffe miõll tuejjeed seämmanallšem video nuõrttsäʹmmlai pihttsin.

Kolttanaisen päähine ilman huivia.
Minna Moshnikoff noori sääʹmmneezznin piiutâsvideoid da čuõvi tõn õʹhtte. Govva: Katriina Laine / Yle

Jietna: Minna Moshnikoff noori sääʹmmneezznin piiutâsvideoid da čuõvi tõn õʹhtte. Kulddâl Moshnikooff mainstâʹttmõs Yle Areenast.

– Smiõʹttem, što lij päkk tuejjeed mij versio. Vueʹǯǯem mieʹldd õhttsa 17 video jeärrsin. Kåčč lij leämmaž nuʹtt peäglvaž da leävvan määŋg sâjja, nuʹtt ååskam tõt vaaikti tõõzz, mäʹhtt puârast oummu vuõʹlǧǧe mieʹldd tääzz, mušttal nuõrttsääʹmneezznin video noorrâm Minna Moshnikoff.

Ǩiõčč sääʹmmpiiutâsvideo Erään kolttanaisen käsityöpäiväkirja -seeiʹdin Youtubest.

Video: Erään kolttanaisen käsityöpäiväkirja - Minna Moshnikoff

Nuõrttsääʹmneezzan pirr Lääʹddjânnam čuäʹjte videoin mäʹhtt jeeʹresnallšem sääʹmmpihttâz vueiʹtte leeʹd. Moshnikoff raʹjji tän vääras še mâiʹd-ne aivv spesiaaʹl. Video tuâggast čueʹjj musikk da Moshnikoff jiõčč ceälkk jeäʹnnes, Satu Moshnikooʹff ǩeeʹrjtam tiivt.

– Neezzan, ǩeäk lie vuõlttääm muʹnne täid videoid lie nuʹtt fijnnâz. Juõʹǩǩʼkaž lij fiʹlmmjem jiijjâs jiiʹjjesnalla da piijjâm jiijj persoon mieʹldd. Muʹst aivv ââzz jåʹtte, ko ǩiõʹččem mâiʹd leäʹp vuäǯǯam äigga, särnn Mosnikoff.

Varrasamosat

Muualla Yle.fi:ssä