Sápmi |

Sáhkabihtážat Sámis: Turisttabusse vujii badjel luotta, vahkkoloahpa muohttá ja Kaamosjazz-festivála sámeartistat

Loga dás vahku maŋimuš sáhkabihtážiid.

Mies lapioi lunta auton edessä lumimyrskyssä.
Govva: Claudio Bresciani / EPA

Turistabusse badjel luotta Gilbbesjávrris

Turistabusse vujii badjel luotta ikte čieža áigge eahkes Norgga ja Suoma rájá lahkosiin, Gilbbesjávrris. Busse lei jođus Norgga bealde Levii.

Lappi gádjunguovddáža mielde busses ledje singaporelaš 30 turistta. 2 turista roasmmohuvve, muhto eaba goittotge vearrájit.

Skábma álgimin Sámis

Sámis lea álgimin skábma nappo dat áigi jagis, go beaivváš ii badján horisontta bajá beallái.

Suoma Sámi davimus gilis Njuorggámis skábma álgá dán vahkus nappo lávvardaga 26.11. Njuorggámis skábma bistá gitta ođđajagimánu 17. beaivvi rádjái. Anáris skábma álgá juovlamánu 2.beaivve, Heahtás juovlamánu 6. beaivve ja Vuohčus juovlamánu 8. beaivve. Soađegilis skábma goit ii bistte go njeallje beaivve nappo juovlamánu 20. beaivvis gitta juovlaruohta rádjái.

Kaamosjazz-festivála sámeartisttat

Kaamosjazz-festivála lea álgán duorastaga 23.11. Suoločielggis ja bistá sotnabeaivvi 26.11. rádjai.

Festivála oktavuođas Ulla Pirttijärvi doallá Ulda-joavkkuin konsearttaid bearjadaga Suoločielggis. Lávvardaga joavku lea Sajosis dii 19.

Ulla Pirttijärvi-Länsman
Ulla Pirttijärvi loaiddasta Ulda-joavkkuinis lávvardaga Sajosis. Govva: Privahtta

Niillas Holmberg ja Roope Mäenpää loaiddasteaba Suoločielggis lávvardaga Aurora tupas diibmu 22.00. Soai leaba maiddái guossin Naftule’s Band -joavkku konsearttain Holiday Club Saariselkäs diibmu 13.00, 16.00 ja 17.00. Soai loahpaheaba olles festivála sotnabeaivve Suoločielggi kapeallas Niillas Holmberg Ensamble -joavkkuin diibmu 12.00.

Geahča Kaamosjazz-festivála prográmma dás.

Sámi árbevirolaš dieđu bálkkašupmi juhkkojuvvo lávvardaga

Sámi árbevirolaš dieđu bálkkašumi jagi 2017 juohkindilálašvuohta ordnejuvvo lávvardaga 25. beaivve, dii 16 Njellima meahccehoteallas.

Dilálašvuohta lea buohkaide rabas. Prográmma sisdoallá bálkkašumi geigema, somás ovttastallama ja kulturprográmma, mas earet eará Anna Lumikivi ja Hanna-Maaria Kiprianoff leuddesteaba. Dilálašvuođas lea gáfestallan ja smávvaborramuš.

Váruhit fuones siivvus vahkkoloahpa áigge – soaitá muohttit juobe 30cm jándoris

Dálkeeinnostusa mielde olles Davvi-Suomas muohttá ollu bearjadaga. Oarje-Lappis sáhttá muohttit juobe 30 cm jándoris ja nuortelabbos 10-15cm, muitala Lapin Kansa -áviisa.

Mátta-Lappis firte bearjadat eahket muhto Davvi-Lappis muohttá gitta sotnabeaivái.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä