Sápmi |

Sáhkabihtážat Yle Sámis: A-studio joatká otne sámetemáin ja njealjis ohce Sámedikki dieđiheaddjin

Dá leat gaskavahku sáhkabihtážat.

A-STUDIO logo.
Gaskavahku 14.2.2018 A-studio fáddán lea sámiid ja stáhta gaskasaš duohtavuođa- ja soabadallanproseassa. Govva: yle

A-studios ságastallet otne duohtavuođa ja -soabadallanproseassas

Suoma riikkaviidosaš TV-prográmma A-studio joatká sámetemá gieđahallama. Otná sáddaga oktan fáddán lea sámiid ja stáhta gaskasaš duohtavuođa ja -soabadallanproseassa. Studioguossin prográmmas leaba Suoma Sámedikki ságadoalli Tiina Sanila-Aikio ja máilmmipolitihka professor Teivo Teivainen. A-studio oidno Yle TV1:žis diibmu 21 rájes.

Njeallje ohcci Sámedikki dieđiheaddjin

Sámedikki dieđiheaddjin leat ohcan njealjis. Barggu ohce Terhi Harju, Jukka Seilonen, Helga West ja okta ohcci, guhte ii háliidan namas almmolašvuhtii. Ohcanáigi bargui nogai vuossárgga. Sámediggi bálkáha jahkái 2018 mearreáigásaš dieđiheaddji, gii boahtá plánet ja ollašuhttit Sámedikki dieđiheapmái gulli áššiid.

Sámediggi
Govva: Vesa Toppari / Yle

Ohcejogas ordnejuvvo vuosttašveahkkekursa iešsoardimiid eastadeapmái

Ohcejoga gieldda Eallin-fidnu ordne Suoma vuosttaš nu gohčoduvvon vuosttašveahkkekurssa iešsoardimiid eastadeapmái boahtte mánus. Guovtti beaivásaš kursa ordnejuvvo Ohcejoga searvegoddedálus njukčamánu 21. ja 22. beivviid ja dat lea oassálastiide nuvttá.

Kursii galgá almmuhit iežas ovddalgihtii njukčamánu čihččet beaivvi rádjai. Almmuhemiid váldá vuostá Minna Pieski Ohcejoga gielddas. Kursii váldet eanemustá 30 olbmo ja oassálastit váldojuvvojit kursii almmuhanortnegis.

utsjoen kunta

Ohcejoga gielda ii doarjjo čáhcebohtalastinfidnu Suttesjoga guvlui

Ohcejoga gielddaráđđehus nannii ikte gieldda cealkámuša Suttesjoga čáhcebohtalastinfabrihka eanaláigoohcamušas Meahciráđđehussii. Gielddaráđđehus cealká maiddái, ahte oasusfitnodatsearvvi doaibmit ja Meahciráđđehus galget ráđđádallat čáhceváldinprošeavtta vuođđudeamis eará guvlui go Suttesjoga guvlui.

Ággan lea dat, Suttesjoga guovlu lea kulturhistorjjálaččat ja luonddu dáfus dehálaš guovlu, maid čáhcebohtalastinfabrihka oalle sihkkarit áittášii ja heajudivččii. Maiddái dat váikkuhii cealkámuššii, go badjel čuođi báikkálaš olbmo leat ovdanbuktán, ahte sii vuostálastet fidnu garrasit.

Varrasamosat: Sápmi

Váldoođđasat

Varrasamosat

Muualla Yle.fi:ssä