Sápmi |

Sáhkabihtážat Yle Sámis: Alla dási biraskongreassa Roavvenjárggas, Deanuleagi eanabargguin dahkkon plána

Loga dás maŋŋebárgga sáhkabihtážiid.

Jietna: Rástegáisá
Jietna
Deanuleagis leat geasi áigge njáskan duovdagiid oidnosii ja dál lea gárvvistuvvon maiddái eatnamiid dikšunplána. Guldal dás maŋŋebárgga Yle Ođđasiid Sámis. Jietna: Yle Areena. Govva: Linnea Rasmus / Yle

Alla dási biraskongreassa álgá Roavvenjárggas

Suoma Árktalaš ráđi ságajođihanáigodaga stuorámus birasdáhpáhus álgá otne maŋŋebárgga Roavvenjárggas. Árktalaš biodiversitehtakongreassa čohkke Roavvenjárgii sullii 450 áššedovdi. Biodiversitehtakongreassas lea sáhka árktalaš luonddu suodjaleamis ja luonddu suvdilis geavaheamis.

Árktalaš biodiversitehtakongreassa rahpá Suoma presideanta Sauli Niinistö. Dalán su maŋŋá sáhkavuoru doallá Suoma Sámedikki ságadoalli Tiina Sanila-Aikio. Viste-, energiija- ja birasministtar Kimmo Tiilikainen hovde kongreassa. Kongreassa álggus anárlaš Anna Morottaja ovdanbuktá livđe.

Njealji beaivásaš dáhpáhusa lágidit Árktalaš ráđi luonddusuodjalanbargojoavku CAFF ja Suoma birasministeriija. Seminára prográmma gávdno dáppe. Dáhpáhusa sáhttá čuovvut neahta bokte, liŋkkat gávdnojit dáppe.

Seamma oktavuođas, duorastaga ja bearjadaga, lágiduvvo maiddái árktalaš guovllu birasministariid deaivvadeapmi.

Deanuleagi eanabargguin dahkkon plána

Deanu geaidnoguora eanaeaiggádiin lea dál vejolašvuohta muitalit oaiviliid guovllu eanabargguin. Ohcejoga gielddas leat jo guhkit áigge sávvan, ahte Deanuleagi geaidnoguorra njáskojuvvošii. Dainna leat hálidan earret eará buoridit geaidnodorvvolašvuođa ja fidnet fiinna duovdagiid oidnosii.

Dál Deanuleahkái Biesjoga ja Nuvvosa gaskii lea gárvvistuvvon geaidnoguora eatnamiid dikšun- ja geavahanplána, man guovllu eanaeaiggádat sáhttet kommenteret skábmamánu 12. beaivvi rádjai. Plána lea dahkkon Ohcejoga gieldda Min eanadat -fidnu oktavuođas.

Otne lea Norgga Sámedikki šaddanbeaivi

Vuosttas Sámediggi, namalassii Norgga Sámediggi álggahii doaimmas 29 jagi dassái. Norgga Sámediggi bargagođii golggotmánu 9. beaivvi jagi 1989. Láhka Norgga sápmelaččaid parlamentáralaš orgánas, Sámedikkis, ásahuvvui juo jagi 1987.

Ruoŧa Sámediggi álggahii doaimmas jagi 1993 álggus ja Suoma Sámediggi jagi 1996.

Suomas dáhpáhuvvan vašširihkkosiin čohkkejit dieđu

Oskkoldagaid ovttasbargoorgána USKOT-forum ovttasbarggus Rihkusoaffargozihemiin čohkke almmuhusaid Suomas dáhpáhuvvan vašširihkkosiin. Almmuhusaid sávvet vašširihkkosiid oaffariin ja sin lagamuččain sihke sis, geat leat oaidnán vašširihkkosiid.

Almmuhusaid vuođul áigot ráhkadit raportta, mii lea oassi riekteministeriija hálddašan Against Hate -EU-fidnus. Almmuhusa sáhttá dahkat golggotmánu 15. beaivvi rádjai dáppe. Lassidieđut gávdnojit dáppe.

Varrasamosat: Sápmi

Váldoođđasat

Varrasamosat