Sápmi |

Sáhkabihtážat Yle Sámis: Almmái heavvanii Eanodagas, oktiibuot 11 guovžža godde Anáris ja Barents girkuidráđđi Anáris

Dá leat vahku vuosttas sáhkabihtážat.

Jietna: Karhu lähikuvassa Martinselkosen eräkeskuksessa Suomussalmella.
Jietna
Guovžabivdu nogai boazodoalluguovllu nuorttabealde lávvardaga. Gulda dás vuossárgga Yle Ođđasiid Sámis. Jietna: Yle Areena. Govva: Kaisu Jansson / Yle

Vuoras almmái heavvanii Eanodagas

79-jahkásaš eanodatlaš almmái lea heavvanan Eanodaga Ullajávrris. Boles ja gádjunlágádus ožžo bearjadatveaigin dieđu, ahte guokte olbmo leigga gahččan fatnasis ja dušše nubbi lei beassan gáddái. Gádjunlágádusa buokči gávnnai heavvanan albmá maŋŋelabbos.

Anáris godde 11 guovžža dán bivdobajis

Guovžabivdu lea nohkan boazodoalloguovllu nuorttabealde, go 75 guovžža dihtoearri dievai lávvardaga. Dalle godde Anár guovllus vel guokte guovžža, nuppi Čeavetjávrris ja nuppi Bárttehis. Oktiibuot Anáris godde dán bivdobajis 11 guovžža.

Oarjjabealde boazodoalloguovllu leat ain 11 guovžža gottekeahttá ja doppe bivdu joatkašuvvá golggotmánu lohppii, jos bivddu dihtoearit eai dieva ovdal dan.

Barents girkuidráđđi Anáris – Seminára maŋŋebárgga

Barents guovllu risttalaš girkuidráđđi SKKB čoahkkana otne vuossárgga Anárii. Maŋŋebárgga Barents girkuidráđđi lágida buohkaide rabas Sápmelaččaid girkolaš eallin -seminára sámekulturguovddáš Sajosis diibmu 13:00–17:30.

Sáhkavuoruid semináras dollet earret eará Oulu bismagotti bisma Samuel Salmi, Eurohpá girkuid konferánssa váldočálli Heikki Huttunen, Norgga sápmelaččaid girkoráđi váldočálli Risten Turi Aleksandersen ja Anára girkohearrá Tuomo Huusko.

Semináras buktet ovdan maiddái báikkálaš searvegottiid sámebarggu. Seminára maŋŋá diibmu 18 Anára girkus lágiduvvo ekumenalaš eahketipmilbálvalus.

Barents guovllu risttalaš girkuidráđđái gullet Oulu evangelalaš-luteralaš girku ja Oulu ortodoksalaš bismagoddi Suomas, Lujávrri bismagoddi Ruoŧas, Nord-Hålogaland ja Sör-Hålogaland bismagottit Norggas, Arkangela, Murmánska ja Petroskoi bismagottit Ruoššas ja Inkeri luteralaš girku Gárjila dásseválddis.

Árktalaš mátkkoštanseminára Roavvenjárggas

Roavvenjárgga Arktikumis lágiduvvo otne vuossárgga Árktalaš mátkkoštanseminára. Seminára álggaha nu gohčoduvvon Arktinen kestävä matkailudestinaatio -prošeavtta, man Business Finland / Visit Finland ollašuhttá ja bargo- ja ealáhusministeriija stivre. Prošeavttain hálidit ollašuhttit Suoma ráđđehusa árktalaš politihka ulbmila suvdilis turismma ovddideamis.

Semináras áigot muitalit prošeavtta álgodoaimmaid bohtosiin ja ovdanbuktit Lappi turismaealáhusa organisašuvnnaid ja prošeavttaid jurdagiid bistevaš turismaealáhusa dehálašvuođas ja das maid dat gáibida.

Earret eará Kirsi Suomi Sámedikki Kultuvrralaččat vásttolaš sámeturisma -fidnus doallá sáhkavuoru vásttolaš ja ehtalaččat suvdilis sámeturismma doaibmaprinsihpain.

Sámedikki stivra deaivá olbmuid Gárasavvonis

Sámedikki stivra ordne olbmuide ságastallandilálašvuođa Gárasavvonis otne vuossárgga. Dilálašvuohta lea Gárasavvon kapeallas diibmu 18–20. Dilálašvuođa ulbmilin lea deaivvadit guovllu sápmelaččaiguin ja ságastallat áigeguovdilis áššiin.

Sámedikki stivra ordne čuovvovaš ságastallandilálašvuođaid skábmamánu 5. beaivve Ohcejogas ja juovlamánu 4. beaivve Anáris.

Varrasamosat: Sápmi

Váldoođđasat

Varrasamosat

Muualla Yle.fi:ssä