Sápmi |

Sáhkabihtážat Yle Sámis: Anáris ja Ohcejogas dahket johtolatdorvvolašvuođaplána ja boaldámušávdnasat leat dál divrasat

Dá leat disdaga Sáhkabihtážat.

Jietna: Kaksi viidenkymmenen euron seteliä.
Jietna
Jietna: Yle Areena

Johtolatdorvvolašvuođaplána dahkko Anáris ja Ohcejogas

Anára ja Ohcejoga gielddat ovttas Lappi EJB-guovddážiin leat álgán dahkat johtolatdorvvolašvuođaplána. Plánas ovdanbuktojuvvojit doaibmabijut, mat buoridit johtolatdorvvolašvuođa. Ulbmilin lea dahkat evttohusaid dakkár johtolatbirrasa buoridandoaimmain, mat leat veahá smávit ja maid sáhttá dahkat jođánit. Anára ja Ohcejoga gielddat ovttas EJB-guovddážiin bivdetge olbmuid vástidit gažadeapmái, maid bohtosiid de geavahit ávkin go plánejit doaibmabijuid johtolaga buorideapmái. Konsuleantan fidnus doaibmá Ramboll Finland Oy.

Anárii 10 000euro ja Soađegillái 26 000 euro Liikkuva koulu -fidnu prográmmaide

Lappi guovlohálddahusdoaimmahat AVI lea mieđihan 375 700 euro oktiibuot 15 Lappi guovllu gildii Liikkuva koulu -fidnu prográmmaide. Sámiguovllu gielddain Anára gielda oaččui 10 000 euro vuođđoskuvllafidnui ja Soađegillái mieđihedje 10 000 euro vuođđoskuvllafidnui ja logahahkii 16 000 euro.

Liikkuva koulu -fidnu ulbmilin lea oažžut ohppiid loaktit skuvllas ja lihkadit. Sávaldahkan lea ahte vuođđoskuvlaoahppit lihkadit unnimustá diimmu beaivvis.

Roavvenjárgga gávpot bivdá oainnuid das, gos gávpoga sámegielat árrabajásgeassin galggašii ordnet

Roavvenjárgga gávpot háliida diehtit sámegielat mánáidgárddi ja giellabeassemánáid vánhemiid oainnu das, gos mánáidgárdi ja giellabeassi galggašii leat. Roavvenjárgga gávpoga neahttasiidduin sáhttá fitnat vástideame gažadeapmái. Gažadeapmi lea dárkkuhuvvon Roavvenjárgga sámegielat beaivedivššu ja davvisámegielat giellabeasi dálá áššehaččaide ja sidjiide geat vejolaččat dohko ohcet ja leat beroštuvvan áššis. Gažadeapmái lea vejolaš fitnat vástideame vel dán vahkku áigge.

Njávdámis ávvudit Ä´vv -nuortalaš musea ovtta jagi doaimma

Njávdámis ávvudit 16. beaivve geassemánu dan, go Ä´vv -nuortalaš musea lea doaibman jagi. Jagi áigge badjelaš 3 700 olbmo leat oaidnán museačájáhusa, mii muitala nuortalaččaid eallinvugiin ja historjjás. Ä´vv musea ávvuda jagi guhkkosaš bálgá govvačájáhusain, duodječájáhusain ja leu´ddin.

Eanodagas fállet vuolleskuvlaahkásaš mánáide geassedoaimma

Eanodaga gieldda nuoraiddoaibma fállagoahtá vuolleskuvlaahkásaš mánáide geassedoaimma, gos mánát besset speallat ja stoahkat skuvlla šiljus, birrásis ja valáštallansáles.

Geassedoaibma ordnejuvvo Heahtás, Gárasavvonis, Gilbbesjávrris ja Bealdovuomis. Ovdalge Eanodagas lea ordnejuvvon seammasullasaš doaibma, muitala Eanodaga astoáigge čálli Inka Alapuranen.

STT: Boaldámušávdnasiid haddi lea badjin

Jus leat vuolgime geasseluopmotuvrii biillain nu boaldámušávdnasat borret buori oasi mátkebušeahtas. Boaldámušávnnassuorggi golaheaddjihaddečuovvumis boahtá ovdan,ahte 95-oktána bensiinna golahanhaddi lei miessemánus gaskamearálaččat 1,5 euro lihteris.

Maŋimus boaldámušávdnasiid haddi lea leamašan ná badjin jagi 2017 álggus ja jagis 2015 boaldámušat ledje vel divraset. Boaldámušávdnasiin leat lávvordaga máksán eanemus Eanodagas, doppe boaldámuša lihterhaddi lei 1,7 euro.

Maiddái diesela haddi lea badjin. Golaheaddjihaddi lea olles dán jagi leamašan badjel 1,3 euro lihtteris. Eanodagas lei lávvordaga maiddai divraseamos diesel, lihtteris mákse 1,57 euro.

Boaldámušaid hattit sáhttet vel geasi mielde loktanit, árvvoštallá St1 fitnodaga beaivválašjođiheaddji Mika Wiljanen. Boaldámušaid dárkilis hatti lea váttis diehtit ovddalgihtii. Haddái váikkuha nu máŋga ášši. Maŋimus áiggiid boaldámušaid haddi lea lokten dat, go oljju haddi ja dollára kursa leat loktanan.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä