Koe uusi yle.fi
Sápmi |

Sáhkabihtážat Yle Sámis: Anne Kirste Aikio Sámedikki gielladorvočállin ja geatkebivddu spiehkastatlobiid guorahallet ministeriijas

Dá leat maŋŋebárgga sáhkabihtážat.

Anne Kirste Aikio
Anne Kirste Aikio válljejuvvui gielladorvočállin Sámedikki dievasčoahkkimis 18.12.2017. Govva: Vesa Toppari / Yle

Anne Kirste Aikio válljejuvvui Sámedikki gielladorvočállin

Suoma Sámediggi válljii ievttá dievasčoahkkimis Anne Kirste Aikio Sámedikki gielladorvočállin ja Piia Nuorgam várresadjái. Guđas ledje ohcan virggi.

Gielladorvočálli váldobargun lea gohcit ja čuovvut sámi giellalága ollašuvvama, juohkit dieđu sámi giellalágas ja sámiid gielalaš vuoigatvuođain, rávvet ja oahpistit sámeálbmoga ja virgeoapmahaččaid sámi giellalága heiveheamis. Gielladorvočálli doaibmá gielladoaimmahaga hoavdan ja giellaráđi áššemeannudeaddjin.

Geatkebivdui guorahallet fas spiehkastatlobiid – WWF čoaggán namaid bivddu vuostá

Eana- ja vuovdedoalloministeriijas leat guorahallamin spiehkastatlobiid geatkebivddu várás boahtte giđđii. Luonddusuodjalanorganisašuvdna WWF lea čoaggán ovttas eará organisašuvnnaiguin badjel 14 000 suopmelačča nama getkkiid spiehkastatlohpebivddu vuostá. Adreassa sii adde bearjadaga eana- ja vuovdedoalloministeriijai.

Dán jagi álggus mieđihuvvojedje gávcci spiehkastatlobi – vuosttaš háve 35 jahkái. Spiehkastatlobiid leat mieđihan, vai sáhttet geahpedit boazovahágiid. Diibmá eana- ja vuovdedoalloministeriijai almmuhedje 2 800 geatkki goddán bohcco. Borasspirebuhtadusaid ministeriija mávssii 6,4 miljon euro.

Geatki lea leamašan ráfáidahtton Suomas jagi 1982 rájes. Árvalit, ahte Suomas leat sullii 220-250 geatkki, main čuođi ellet boazodoalloguovllus.

Árktalaš guovlluid eamiálbmogiid gobmemáidnasiin dahkko filbmaráidu

Internašunála sámi filbmainstituhtta ISFI ja York universitehta Kanadas leaba álggahan filbmaovttasbarggu. Ulbmilin lea čohkket árktalaš guovlluid álgoálbmogiid gobmemáidnasiid nu, ahte dáid sáhtašii ráhkadit filbmaráidun.

ISFI ohcá sihke gobmemáidnasiid ja eamiálbmot čálliid, máinnasteddjiid ja filbmadahkkiid ollašuhttit balddonas, imašlaš ja issoras filbmaráiddu. Oktavuođa sáhttá váldit ISFI filbmakonsuleanta Liisa Holmbergii čujuhussii liisa(a)isfi.no.

Eanodaga giellabeassi álggaha viimmat doaimmas

Eanodaga gieldda vuosttas giellabeassi álggaha doaimmas jagi álggus Heahtás. Giellabeassái čáhket oktiibuot 5 máná, sis njealjis ollesáigge dikšui ja okta oasseáigásaš dikšui.

Eanodaga gielda lea geahččalan oččodit giellabeassedoaimma johtui dán čavčča, muhto ii dan rádjái lihkostuvvan gávdnat dasa bargiid.

Maŋimuš beaivi ohcat Sámiráđi kulturdoarjagiid

Odne 19.12. lea áigemearri ohcat kulturdoarjagiid ja dáiddalaš bargostipeandda Sámiráđis. Sámiráđđi doarju juohke jagi miehtá Sámi iešguđetlágan dáiddalaš surggiid, dego duoji, dáidaga, musihka, čáppagirjjálašvuođa ja filbmasuorggi. Dasa lassin Sámiráđđi juolluda golbma 200 000 kruvnnu sturrosaš dáiddalaš bargostipeandda.

– Kulturdoarjaga ulbmilin lea doarjut ja ealáskahttit sámiid kultureallima ovttasbarggu riikkarájáid rastá ja doarjut dáiddaláš prošeavttaid ja doaimmaid, dadjá Sámiráđi kulturossodaga hoavda Christina Hætta.

Beaiváduvvon 19.12. dii 14:31: Lasihuvvon diehtu Sámiráđi kulturdoarjagiin.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä