Sápmi |

Sáhkabihtážat Yle Sámis: City Sámit -searvvi prošeavttaid dárkkistusdoaimmat gárvásat, Eurohpa kommišuvdna evttoha ruovdegeaidnumáđiija Gironis Narvikii

Dá leat maŋŋebárgga sáhkabihtážat Yle Sámis.

Inka Musta Helssegis gáktebeaivve 2015.
Govva: Helga Siljander / Yle

Oahpahus- ja kulturministeriija lea ožžon gárvvisin City Sámit -searvvi prošeavttaid dárkkistusdoaimmaid. Dárkkistusdoaimmaid vuolde leamašan City Sámiid giellabeassedoibmii mieđihuvvon veahkkeruđat ja kulturguovddážii mieđihuvvon prošeaktaruđat.

City Sámit -searvvi ságadoalli Inka Musta muitala, ahte ministeriija lea sádden searvái cealkámuša, mas ledje vel moadde gažaldaga, muhto loahpalaš mearrádus áššis ii leat vel dahkkon.

Oahpahus- ja kulturministeriija erenoamášplánejeaddji Mikko Cortés-Téllez muitala Yle Sápmái, ahte čuovvovažžat ministeriija mearrida, galgágo searvi máksit ruđaid ruovttoluotta ja jos galgá, de man olu.

Dárkkistusdoaimmaid čađahan virgeolbmot mearridit áššis vejolaččat juo dán vahkus.

Ministeriija bokte ášši ovdána dasto nu, ahte jos dat mearridit, ahte searvi galgá máhcahit ruđaid, de daid bivdet máksit ruovttoluotta, ja jos dan eai bastte dahkat, de vealggi galget bearrat.

Eurohpa kommišuvdna evttoha ruovdegeainnufierbmádahkii oktavuođa Narvikii

The Barents Observer muitala, ahte Eurohpa komiššuvdna lea evttohan 43 miljardda euro investeremiid Eurohpa johtolatinfrastrukturii oassin EU bušeahttaevttohusas jagiide 2021-2027. Nu gohčoduvvon Eurohpa viidosaš johtolatfierpmi (TEN-T) viiddideapmi lea gaskasaš oassi ruovdegeainnujohtolaga investeremiid.

Evttohussii gullet váldofierbmádagat ja daid mielde maid oktavuohta Norgga Narvikii.

– Skandinaviija-Gaskameara -manahaga evttohuvvo viiddideapmi ovttastahttá Ruoŧa Luleå ruoŧŧelaš váldopoarttat Ruŧŧii ja Narvikii, Norgii. Goabbáge dáiguin ii leat vel mielde fierbmádagas. Evttohuvvon viiddideapmi ávaštalla arktalaš politihka stuorru mearkkašupmi, čállá Eurohpa komiššuvdna evttohusastis.

Norgga johtolatministtár Kjetil Solvik Olsen lea álmmuhan komiššuvdnii, ahte son doarjju ruovdemáđiija sirdima Ruoŧas Narvikii EU-váldojohtolatfierbmádahkii.

Norga ii leat Eurohpa uniovnna láhttu ja sáhttá evttohusain maiddái leahkit válditkeahttá oasi njuolgga EU bušeahttaárvalussii, muhto Norgga ruđaiguin Norgga bealde EU fállá mearkkašahtti ruhtadeami ruovdemáđiija beaivedeapmái Ruoŧabeal ráji.

Euroopan komission ehdottamat rautatiet Pohjois-Eurooppaan.
Govva: Euroopan komissio

Bismá válgapánela Anára searvegotteviesus dán vahkkus

Oulu bismágotti bismá válgapánela ordnejuvvo Anára searvegotteviesus dán vahku lávvordaga, geassemánu 16. beaivve. Válgapánela jođiheaba Erva Niittyvuopio ja Ánne Kirste Aikio.

Dilálašvuohta streamejuvvo bismágotti neahttasiidduide. Bismáevttohasat leat Jukka Hautala, Jukka Keskitalo ja Niilo Pesonen. Dálá bismá Samuel Salmi báhcá ealáhahkii skábmamánu vuosttaš beaivve. Salmi lea doaibman bismán jagi 2001 rájes.

Bismáválggaid vuosttaš jienasteapmi čađahuvvo borgemánu 15. beaivve.

Sámediggi ohcá doaibmalatnjafuolaheaddji sadjásačča Sajosii

Sámediggi lea almmuhan ohcanlahkái Sajosa doaibmalatnjafuolaheaddji doaimma. Bargu lea mearreáigásaš ollesáigge bargu áigái 30.7.2018 - 31.5.2019.

Sajosa doaibmalatnjafuolaheaddji bargguide gullet fáktameaštára barggut, áššehasbálvaleapmi infos, čoakkimiid ja dáhpáhusaid ordnemii gullevaš barggut ja lanjaid doallan buhtisin.

Gelbbolašvuođagáibádussan leat earret eará sámegiela dáidu ja barggu eaktudan skuvlejupmi.

Ohcamušaid galgá doaimmahit Sámedikki čállingoddái 29.6.2018 diibmu 16.00 rádjai. Dieđáhusa áššis gávdno Sámedikki neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä