Sápmi |

Sáhkabihtážat Yle Sámis: Deanu turistabivdu nohká odne ja oassi beaivvážis sevnnjoda lávvardaga

Dá leat vahku maŋimuš sáhkabihtážat.

Auringonpimennys Kajaanin taivaalla 20.3.2015.
Beaivvášsevnnjodeapmi Kajaanis 20.3.2015. Govva: Kalle Heikkinen / Yle

Deanu turistabivdu nohká

Guolleturisttaid guolástanbadji Deanus nohká odne borgemánu 10. beaivve. Guolleturisttaid guolástanbadji álggii geassemánu 10. beaivve.

Báikkálaš stággobivdiid guolástanbadji bistá gitta borgemánu 20. beaivvi rádjai.

Oassi beaivvážis sevnnjoda lávvardaga

Oassi beaivvážis sevnnjoda lávvardaga 11.8. Beaivvášsevnnjodeapmi oidno gaskabeaivvi sulaid, ja dat oidno buoremusat davimus Suomas ja heajumusat Mátta-Suomas. Nástedutkiid searvi Ursa muitala ahte Ohcejogas beaivvážis gokčo measta 31 % ja Helssegis fas 8 %.

Sevnnjodeami ii galgga geahččat njuolga amas čalmmit vaháguvvat, muittuha Nástedutkiid searvi Ursa.

Ovddit háve beaivvášsevnnjodeapmi oidnui Suomas belohahkii 20.3.2015 ja čuovvovaš háve dan oaidnit olles riikkas geassemánus 2021.

Olles beaivvášsevnnjodeami leat oaidnán Suomas maŋemus suoidnemánus 1990, ja čuovvovaš háve dát dáhpáhuvvá easka golggotmánus 2126.

Rádjejeagárkompaniija soalddátvuortnis dollojuvvo Avvilis

Lappi rádjegozáhusa rádjejeagárkompaniija soalddátvuortnisdilálašvuohta ordnejuvvo dán jagi Avvila valáštallangiettis. Dilálašvuohta ordnejuvvo lávvardaga 11.8.2018 diibmu 11.15.

Soalddátvurdnosa vurdnot 119 easkka álggahan soalddáha.

Roavenjárggas ordnejuvvo skuvlejupmi filbmasuorggis beroštuvvon olbmuide

Filbma- ja tv-buvttademiid mearri lassána Lappis, ja buvttadeamit dárbbašit ain eanet báikkálaš bargofámu iešguđet surggiid ámmátolbmuin.

Lappi vuovdalanfitnodat House of Lapland ja VMP varamiespalvelu Rovaniemi ordnejit filbmasuorggis beroštuvvan olbmuide Film Friendly –skuvlendilálašvuođa Roavvenjárggas 23.8.2018. Skuvlejupmi bistá sullii 4 diimmu.

Skuvlejumis muitalit earet eará iešguđetlágán audiovisuála buvttademiin ja vejolašvuođain, mo sáhttá ávkkástallat iežas ámmátdáiddu filbmasuorggi veahkehanbargguin.

Skuvlejupmái sáhttá ohcat 17.8. rádjái čujuhusas: www.vmp.fi.

Riekteministeriija neahttasiiddut almmustahtton sámegillii

Riekteministeriija neahttasiiddut leat dál almmustahtton davvisámegillii.

Riekteministeriija davvisámegielat neahttasiidduide beasat dáppe.

Beaiváduvvon 10.8.2018 dii 11:00: Lasihuvvon diehtu riekteministeriija sámegielat neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä