Sápmi |

Sáhkabihtážat Yle Sámis: Eana fierran Kárášjoga guovllus, Ruoŧa SPR ságajođihanvuorru álgá

Dá leat disdaga Sáhkabihtážat.

Jietna: Eana fierran NRK Finnmark
Jietna
Eana fierai Kárášjoga ja Gáregasnjárgga gaskasaš luotta lahkosiin, muitala NRK Finnmárku. Guldal disdaga radioođđasiid dás. Jietna: Yle Areena. Govva: NRK Finnmark -neahtasiidu

Lobihis riikkarájá rasttildeami ovdadutkan heitojuvvon

Lappi rádjegozáhus lea dutkan eahpiduvvon guovloloavkašuhttima, mas Norgga soahteveaga ossodat lea skuhteriiguin rasttildan lobi haga riikkarájá Norggas Supmii ja ruovttoluotta Norgii. Dát dáhpáhuvai 5.4.2018 Eanodaga duottarguovllus. Dáhpáhus bođii dihtui Norgga soalddateiseválddi dahkan almmuhusas.

Ovdadutkamis ožžon čielggadeami vuođul guovloloavkašuhttin leamašan unni ja ii leat bistán guhká. Ášši leat gieđahallan Norgga ja Suoma gaskkas diplomáhtaluodduid mielde. Ovdadutkan lea heitojuvvon alaguoddi mearrádusain.

– Ovdadutkama joatkin livččii leamašan eahpevuogálaš dan ektui, makkár ášši lea ja makkár čuovvumušat das vejolaččat livčče šaddan, muitala Lappi rádjegozáhus dieđáhusastis.

Eana fierran Kárášjoga guovllus

Eana fierai Kárášjoga ja Gáregasnjárgga gaskasaš luotta lahkosiin, muitala NRK Finnmárku. Eana fierran dáhpáhuvai sullii 20 mehter eret luottas. Máŋggain sajiin Norggas lea eananfierranvárra dál go muohta suddá. NRK Finnmárkku neahttasiidduin sáhtát geahččat video báikkis, gos eananfierran lea dáhpáhuvvan.

Sámi parlamentáralaš ráđi ságajođihanvuorru sirdašuvvá Norggas Ruŧŧii

Sámi parlamentáralaš ráđi ságajođihanvuorru álgá Ruoŧa Sámedikkis 16.5. Bargu bistá uhcimusat 16 mánu ovddasguvlui. Áigodaga sáhttá guhkidit dárbbu mielde. Sámediggi Suomas joatká jođiheami dan maŋŋá.

Sámi parlamentáralaš ráđis lea odne dievasčoahkkin Kárášjogas. Sámediggi Norggas lea jođihan Sámi parlamentáralaš ráđi 22. beaivve čakčamánu 2016 rájes gitta otná beaivái. Presideantadoaimma leaba Vibeke Larsen ja Aili Keskitalo juogadan.

Helssegis ságastallet kultuvrralaš ávkkástallamis

Helssegis lágidit dán vahkus StopHatredNow 2018 -dáhpáhusa, gos ságastallet earet eará kultuvrralaš ávkkástallamis. Otne eahkes lea panelaságastallan kultuvrralaš ávkkástallamis Ateneumis, mas lea mielde maid Jagi Sápmelaš Pirita Näkkäläjärvi.

Dáhpáhus lea máŋgga dáiddainstitušuvnna ja interkultuvrralaš organisašuvnna ovttasbargu, man ulbmilin lea fállat ságastallama, dieđu ja bargoreaidduid máŋggaláganvuođas.

Lappi boazo- ja guollebeaivvit álget gaskavahku

Luosa máhcaheapmi dahkujávrriide, boazodoalu gánnáhahttivuohta, guohtuneatnamat ja guolle- ja boazoturisma ságastahttet Lappi boazo- ja guollebeaivvit, mat álget ihttin. Dáhpáhus lea Arktikumis Roavvenjárggas. Dáhpáhusa ordnejit luondduriggodatguovddáš Luke, Kemijoki Oy, Bálgosiid ovttastus ja Meahciráđđehus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä