Sápmi |

Sáhkabihtážat Yle Sámis: Elle-Maaret Näkkäläjärvi válljejuvvui Anára skuvla rektorin ja Ivalo-ráiddus vihkkehallet nuppi baji

Loga dás vahku maŋimuš sáhkabihtážiid.

Jietna: Elle-Maaret Näkkäläjärvi
Jietna
Jietna: Yle Areena

Anára skuvlla rektorin lea válljejuvvon anárlaš Elle-Maaret Näkkäläjärvi. Anára čuvgehuslávdegoddi válljii Näkkäläjärvi ovttamielalaččat rektorin jearahallamiid maŋŋá. Válljen dahkkojuvvui čuvgehuslávdegotti badjelmearálaš čoahkkimis duorastaga 3.5.2018.

Válljema ággan lei gelbbolašvuohta vuođđooahpahusa rektorin, guhkes vásáhus oahpaheaddjin, vásáhus vuođđooahpahusa hálddahusas ja jearahallamiin ovdanboahtán áššit, čállá Anára čuvgehushoavda Ilkka Korhonen mediadieđáhusas.

Näkkäläjärvi hállá davvisámegiela. Son válljejuvvui dán vahku álggus maiddái Sámi oahpahusguovddáža veahkkerektorin.


Árktalaš ráđis skuvlejit eamiálbmotnuoraid mearrideaddjin

Eanodatlaš Rosa-Maren Magga lea okta dan guđa eamiálbmotnuoras, geat leat mielde njealje jagáš fidnus, mas eamiálbmot nuorat ohppet váikkuheami Árkalaš ráđis.

Fidnus nuorat leat oassálastán sierra čoahkkimiidda ja áššedovdi logaldallamiidda árktalaš guovlluin. Nuorat lea čoahkkan golbmii: Nuukis Ruonáeatnamis jagis 2015, Anáris 2017 ja Levis giđđat 2018. Skuvlejupmi loahpahuvvui ON bissovaš foruma čoahkkimis New Yorkas.

Fidnu duogábealde leat Ruonáeatnama inuihttaorganisašuvdna ICC Greenland ja Sámeráđđi. Fidnu ruhtada Davviriikkaid ministerráđđi, dieđiha olgoministeriija.


Sámedikki ságadoalli sávvá Yle giddet fuomášumi eamiálbmottemáide

Sámedikki ságadoalli Tiina Sanila-Aikio sávvá, ahte Yle gidde boahtte áiggis eanet fuomášumi eamiálbmogiidda guoski temáide lasihan dihte suopmelaš olbmuid dieđu áššis.

– Medias lea stuorra ovddasvástádus miellagovaid ráhkadeamis ja mearrádus sirdin prográmma Elävä arkistoi lea rivttes čoavddus, dadjá Sámedikki ságadoalli Tiina Sanila-Aikio.

Ášši boahtá ovdan dieđáhusas, man Sanila-Aikio lea sádden media.


Ivalo-ráiddus vihkkehallet ráhkadit nuppi baji

Ivalo-ráidui leat smiehttagoahtán nuppi baji, muhto nubbi badji ii leat sihkkar ruhtadeami geažil, muitalit Yellow Film and TV -buvttadanfitnodagas.

Näyttelijät Joi Johannsson ja Iina Kuustonen Ivalo -tv-sarjan kuvauksissa Kaunispään huipulla Inarin Saariselällä 6. helmikuuta 2018.
Näyttelijät Joi Johannsson ja Iina Kuustonen Ivalo -tv-sarjan kuvauksissa Kaunispään huipulla Inarin Saariselällä 6. helmikuuta. Govva: Tarmo Lehtosalo / Lehtikuva

– Dábálaččat tv-ráidduin dahket eanet go ovtta baji, danin lea lunddolaš vihkkehallat čuovvovaš baji maiddái, dadjá tv-ráiddu buvttadeaddji Jarkko Hentula.

Ivalo-ráiddu govvejedje Anár ja Ohcejoga gielddain dán giđđadálvvi. Ráidu álgá dán jagi loahpas Elisa Viihde -bálvalusas, ja dan čájehit maŋŋelabbos maid Yles.


Maŋimuš beaivi almmuhit iežas Sámi njálmmálaš árbevieruid -konferánsii

Bearjadaga lea maŋimuš beaivi almmuhit iežas Sámi njálmmálaš árbevieruid -konferánsii. Konferánssa ulbmilin lea hábmet oktasaš vuođu sámi dáidda- ja kultursektorii, mii guoská sámi ealli njálmmálaš árbevieru ovddasvástáduslaš ja ehtalaččat beaktilis geavaheami ja suodjaleami.

Milja Guttorm
Govva: Timo Nykyri / Yle
Konfereansa lea rabas buohkaide ja earenoamážit ohcalit dáiddáriid, virgeolbmuid ja eará berošteddjiid. Almmuhemiid váldá vuostá gávpotsápmelašvuođa leanadáiddár Milja Guttorm, milja.guttorm(at)taike.fi

Varrasamosat: Sápmi

Váldoođđasat

Varrasamosat