Sápmi |

Sáhkabihtážat Yle Sámis: Feodoroff álggaha ovdaolmmožin ja báŋkkut gitta streaikka geažil

Loga das duorastaga sáhkabihtážiid.

Veikko Feodoroff
Govva: Vesa Toppari / Yle

Feodoroff álggaha ovdaolmmožin

Boazodoalli Veikko Feodoroff álggaha nuortalaččaid ovdaolmmožin boahtte jagi álggus. Davvi-Suoma hálddahusriekti lea dahkan gaskaboddosaš mearrádusa áššis, man mielde Feodoroff beassá álggahit dán doaimmas.

Nuortalaččaid ovdaolmmošválgga válgalávdegoddi mearridii čakčamánus, ahte Feodoroff válljejuvvo njuolga ovdaolmmožin, go dušše son oassálasttii válgalávdegotti ásahan gielladáidoiskosii.

Válgalávdegotti mearrádusas goit váide guokte eará evttohasa, Tanja Sanila ja Sergei Kp. Fofonoff. Vástádusastis válgalávdegoddi geahččá, ahte nuortalaččaid áššiid dikšun ii oaččo gaskkalduvvat dán váiddaproseassa áigge. Hálddahusriekti searvvai dán mearrádussii.

konttori suljettu -kyltti
Govva: Jussi Nukari / Lehtikuva

Streaika gidde báŋkkuid otne ja ihttin

Stuorra oassi Suoma báŋkokantuvrrain lea gitta otne ja ihttin ruhtasuorggi bargostreaikka dihte. Dál lea vuordimis ahte áššehasat galget vuordit bálvalusa guhkit áigge go dábálaččat. Neahttabáŋkkut gal doibmet streaikka áigge, muhto muhtin boatkkagat soitet šaddat. Bargoriiddu soabadallama jotket boahtte maŋŋebárgga.

Mies niistää nenäänsä.
Govva: Henrietta Hassinen / Yle

Influensa ollen davás

Influensa lea ollen Davvi-Supmii. Davvi-Suomas njommot dál sihke A- ja B-influenssavirusat. Influenssaboahkuhus suodjala A-virusa vuostá. B-virus, mii dál njoammu, ii leat seammalágan go man vuostá leat boahkuhan dearvvašvuođaguovddážiin.

Vejolaš ohcat stipeandda

Johkamohkis lea vuođđuduvvon ođđa Team Lapland -foanda, mii áigu vuosttažettiin juolludit ođđa Sápmi Art -nammasaš stipeanddaid sámi dáiddáriidda oktiibuot 50 000 Ruoŧa kruvnno ovddas. Dát supmi juhkkojuvvo golbma dáiddára gaskkas.

Stipeandda sáhttet ohcat sápmelaš govva-, duodje- ja musihkkadáiddárat Ruoŧas, Norggas ja Suomas ođđajagimánu 15. beaivvi rádjai neahttasiiddus www.sapmiart.com. Vuosttaš stipeanddat juolluduvvojit Johkamohki dálvemárkaniin guovvamánus.

Varrasamosat: Sápmi

Váldoođđasat

Varrasamosat

Muualla Yle.fi:ssä