Sápmi |

Sáhkabihtážat Yle Sámis: Gihttelis jávkan olmmoš gávdnon ja duorastaga goardi báhkka

Dá leat duorastaga sáhkabihtážat.

Kadonnut
Boles lea fáhtten Minna Pätsi. Govva: Poliisi

Boles lea gávdnan Gihttelis jávkan nissona. Boles almmuhii ikte gaskavahku, ahte Minna Pätsi lea jávkan.

Su eai lean oaidnán mannan vahkuloahpa Gihttela márkaniid maŋŋá. Boles giitá olbmuid tipssain ja muitala, ahte lea fáhtten Pätsi.

Duorastaga goardi báhkka

Suomas lei gaskavahku buot lieggaseamos dálki Lappis. Soađegilis mihtidedje gaskavahku juobe 30,1 gráđa. Nie báhkka ii leat Suomas mihtiduvvon golmma jahkái. Otne joatkašuvvet Lappis báhkat, otnážii leat lohpidan máŋgga sadjái 30 gráđa báhkaid.

Menddo báhka dálkkis lea addon váruhus, muhto dat ii guoskka Ohcejoga, Anára ja Eanodaga.

Facebooka sáhttá geavahišgoahtit inuihttagillii

Sosiálamediabálvalus Facebook lea almmustahttán mannan vuossárgga siidduidis inuihttagillii, Nunavut beaivvi gudnin. Vuossárgga rájes Facebookkas lea sáhttán deaddit boalu “piugijara”, jus áigu liikot juoga áššis Facebookkas. Facebook álgá dál ráhkadit inuktut-gillii visot Facebook stivrenásahusaid ja boaluid, muhto fitnodagas ii leat máhttu jorgalit visot sániid inuktut-gillii, nuba dat dáhttu veahkki geavaheddjiin.

Inuktutgiela hállet Kanadas ja dat lea virggálaš giella ovdamearka dihte Nunavutas.

Riddu Riđđu –festivála álgá otne Gáivuonas

Riddu riđđu –festivála ordnejuvvo Gáivuonas 12.7-15.7. Riddu Riđđu -festiválas loaiddastit sámemusihkka stuorimus násttit ja eará máilmmiviidosaš eamiálbmotmusihkka, dáidda, teáhter ja dánsa.

Dán jagi stuorra nástin festiválas lea Mari Boine.

Festiválain maiddái muitalit jahkásaččat geat leat ođđa ofelaččat geat galget johttit miehtá Norgga muitaleamen sámiid birra. Ođđa ofelaččat almmustahttojuvvojit bearjadaga.

Beaiváduvvon 12.7.2018 dii 12:54: Beaiváduvvon diehtu das, ahte Gihttelis jávkan nisu lea gávdnon.

Varrasamosat: Sápmi

Váldoođđasat

Varrasamosat

Muualla Yle.fi:ssä