Sápmi |

Sáhkabihtážat Yle Sámis: Girjása čearru, Ohcejoga guolástanturisma ja Gollegiella-bálkkašumi evttohasásaheapmi

Dá leat vahku maŋimuš sáhkabihtážat.

Jietna: girjás girjas čearrru
Jietna
Girjása čearu ja Ruoŧa stáhta gearregastin joatkašuvvá. Guldal bearjadaga Yle Ođđasiid Sámis dás. Jietna: Yle Areena. Govva: SVT

Girjása čearu ášši Ruoŧa duopmostullui

Ikte duorastaga almmuhuvvui, ahte Girjása čearu ášši, mas čearru háliida hálddašanrievtti eatnamiidda Jiellevári guovllus Davvi-Ruoŧas, gieđahallo Ruoŧa alimus duopmostuolus.

Girjása čearru vuittii ođđajagimánus Ruoŧa stáhta, go gearregaste hoavvarievttis Davvi-Norrlánddas, Ubmis. Goittotge sihke Ruoŧa stáhta ja Girjása čearru váide ášši viidáset hoavvarievtti mearrádusa maŋŋá. Hoavvarievtti mielde čearus lea gal buoret riekti bivdui ja guolásteapmái go stáhtas, muhto čearus ii leat riekti stáhta lobi haga addit dan rievtti earáide. Danin čearru mearridii mannat viidáseappot áššiin.

Áššis muitala Ávvir-aviisa.

Ohcejogas guorahallet, mo ovddidit guolástanturismma

Ohcejogas ságastallet otne bearjadaga guolástanturismma ovddidanvejolašvuođain. Jurdda lea smiehttat vugiid ovddidit guolástanturismma namalassii eará čázádagain go Deanus ja dan oalgejogain.

Ohcejoga gieldda ealáhusaid ovddidanprošeakta, Meahciráđđehusa meahccebálvalusat ja Lappi guolástusguovddáš ordnejit áššis buohkaide rabas háleštandilálašvuođa. Dilálašvuohta álgá diibmu 12 Ohcejoga meahcásteaddjiid (Utsjoen Eränkävijät) stobus.

Vel geargá evttohit Gollegiella-bálkkašumi oažžu

Sámedikkiid ságadoallit ja sámeáššiid ministarat geigejit davviriikkalaš Gollegiella-giellabálkkašumi Oslos skábmamánus. Bálkkašupmi juhkkojuvvo dál gávccát háve.

Gollegiella-bálkkašupmi addojuvvo olbmui, guhte lea áŋgiruššan sámegielaid buorrin Norggas, Ruoŧas, Suomas dahje Ruoššas. Dainna hálidit váikkuhit sámegiela nannemii, ovddideapmái ja seailluheapmái.

Olbmot sáhttet dahkat evttohusaid bálkkašumi vuoitin. Evttohusaid oktan čálalaš čilgehusain galgá sáddet maŋimustá čakčamánu 9. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä