Kaikki talviolympialaisista!
Sápmi |

Sáhkabihtážat Yle Sámis: Girjjás váidá hoavvarievtti duomu ja árktalaš álgoálbmogat vuođđudit filbmafoandda

Dá leat vahku maŋimuš sáhkabihtážat.

Čieža sámi muitalusa
Govva: Skábmagovat

Sameradion & SVT Sápmi: Girjjás váidá hoavvarievtti duomu

Girjjis čearru lea mearridan váidit hoavvarievtti duomu alimus riektái, muitala Sameradion & SVT Sápmi. Bajit Norrlándda hoavvariekti almmuhii Girjása ja stáhta gaskasaš ášši duomus 23.1.2018.

Guokte jagi áigi celkkii Jiellevári diggeriekti, ahte čearus lea oktovuoigatvuohta hálddašit smávvafuođđobivddu ja guolásteami čearu boazodoalueatnamiin Jiellevári duoddariin. Hoavvariekti goitge rievdadii duomu. Dan mielas čearus lea gal buoret riekti bivdui ja guolásteapmái go stáhtas, mii lea eananeaiggát.

Čearus ii leat goitge riekti stáhta lobi haga lotnut dan rievtti earáide. Danin čearru lea dál mearridan mannat viidáseappot áššiin.

– Mis lea riekti, muhto eat beasa hálddašit dan, iežamet rievtti, lohká Girjása ságadoalli Matti Berg.

Árktalaš álgoálbmogat vuođđudit oktasaš filbmafoandda

Árktalaš guovlluid álgoálbmogat leat mearridan vuođđudit filbmafoandda vel dán jagi áigge, muitala APU-bláđđi. Foanddas leat guokte váldoulbmila: doarjut davviálbmogiid iežas muitalanbuvttadeami ja fállat ođđa vejolašvuođaid earenoamážit boaittobealguovlluide gos gillájit doaivvuhisvuođas ja juobe iešsoardimiin.

Filbmafoandafidnu jođiha riikkaidgaskasaš sámi filbmainstituhtta ISFI Guovdageainnus ovttasbarggus Ruonáeatnama ja Kanada Nunavut filbmainstituhtaiguin. Fondii leat searvamin davviriikkaid lassin Kanada ja Ruošša davimus guovllut, Ruonáeana ja Alaska.

ISFI filbmakomissár Liisa Holmberg muitala APU-bláđis, ahte filbmafoanddain geahččalit oažžut árktalaš guovlluid álgoálbmogiid filbmadoaimma bistevažžan. Holmberg mielde iežas filbmafoandda bokte filmmaid ráhkadeapmi ii livčče šat stáhtaid ruhtadeami duohken.

Ulbmilin lea čoaggit viđa jagis 20 miljovnna euro, ja dan ruhtasupmi investerendietnasiiguin (su. sijoitustuotto) lea de dárkkuhus doarjut filbmadoaimma ja skuvlejumi.

Holmberg mielde eanemus ávki foanddas lea árktalaš guovllu doaresbeale giliide, gos nuorat ožžot vejolašvuođa eallimii. Ulbmilin lea gávdnat sevdnjes boahtteáigái čuovgga, ahte sii maiddái fuomášuvvojit ja sin eallimis maid lea mearkkašupmi, dadjá Holmberg.

Skábmagovain ledje eanet geahččit go goassige ovdal

Mannan vahkuloahpa ordnejuvvon eamiálbmogiid filbmafestivála Skábmagovat geasuhii 4335 guossi. Dat lea Skábmagovaid ođđa geahččiolahus. Ovddit olahus lei 4200 jagis 2013.

Buot eanemus geahččit ledje lávvardaga Sajosis Davvi muitalusat -čájáhusas, mas čájehedje Sámi bagadalliid ođđaseamos oanehisfilmmaid. Auditoriai galggai lasihit golbma beaŋkaráiddu ja das fuolakeahttá eai buohkat čáhkan sisa.

Festivála váldotemán ledje dán jagi Davvi-Amerihká ja Ellos eallin. Temá ulbmilin lei loktet oidnosii álgoálbmogiid rivttiid.

Sámi musihkkaakademiija -fidnui ohcet prošeaktajođiheaddji

Ohcejohkii ohcet mearreáigásaš prošeaktajođiheaddji Sámi musihkkaakademiija -fidnui. Sámi musihkkaakademiija ulbmilin lea nannet sámemusihkka ealáhussan. Prošeavtta jođiha Ohcejoga gielda ja prošeavtta ovttasbargoguoibmin leat Sámi oahpahusguovddáš ja Sámi allaskuvla. Sámi musihkkaakademiijai juolluduvvui gieskat prošeaktadoarjja Eurohpá guovloovddideami (EAKR) ja Interreg Sámi -ruhtarájuin. Prošeakta bistá guokte jagi, man áiggis lágidit vuosttas ja nuppi jagi oahpahusa.

Prošeaktajođiheaddji galgá vástidit fidnu hálddašeamis, stivremis ja ollašuhttimis ovttas eará bargiiguin. Prošeaktajođiheaddji bargui gullá maiddái rekryteren, márkanastin ja dieđiheapmi, ja prošeaktajođiheaddji galgá maiddái fuolahit oahpahusa geavatlaš áššiid dego oahppomátkkiid ja loaiddastemiid ordnen.

Ohcanáigi bargui nohká 16. beaivve. Lassedieđuid barggus addá Ohcejoga gieldda ovddidan- ja ealáhushoavda Eeva-Maarit Aikio.

Muitte ohcat Sámi Game Jam –dáhpáhussii

Ohcejogas Áilegas-guovddážis ordnejuvvo 21.-25-2-2018 Sámi Game Jam –speallodáhpáhus. Dáhpáhusa áigge spealut ráhkaduvvojit álgojurdagis gitta gárvves speallun. Temán leat earret eará gávcci jagiáiggi álbmot, máidnasat, sápmelaččat sámeguovllu olggobealde, davviguovlu, gielat, aktivistat, stereotiippat ja etnostreassa.

Dáhpáhussii bovdejit hárjánan speallohutkkiid sihke speallohutkamis beroštuvvan sápmelaččaid. Almmuhanáigi nohká lávvardaga guovvamánu 3. beaivve diibmu 16. Almmuhit sáhttá Sami Game Jam -neahttasiiddus.

THL: Davvi-Suomas eanemusat mánáid givssidedje Anáris ja Muonás

Suoma Dearvvasvuođa ja buresveadjima lágádus (THL) lea guorahallan skuvlagivssideami. Guorahallama vuođul sáhttá dadjat, ahte Davvi-Suomas eanemus mánát givssiduvvojit Muonás ja Anáris. Gaskamearalaččat Suomas vuolledási mánáin 7,3 proseantta givssiduvvojit, ja go mánát mannet viidáset badjedássái, de givssideapmi unno.

THL gažadeapmái Muonás vástidan badjedási mánáin 15,8 proseantta muitaledje, ahte leat vásihan davjá givssideami. Anáris fas vuolledási ohppiin 15,3 proseantta ledje vásihan givssideami unnimusat oktii vahkus, badjedási bealde lohkun lei dušše 4 proseantta. Dearvvasvuođa ja buresveadjima lágádusa mielde maiddái Ohcejogas lea oalle olu givssideapmi, daningo doppe vuolledási ohppiin 13,3 proseantta leat vásihan givssideami. Dutkamuša mielde gánddat givssiduvvojit eanet go nieiddat.

Áššis muitala Lapin Kansa -aviisa.

Beaiváduvvon 2.2.2018 dii 9:33: Lasihuvvon ođas Sámi Game Jam -dáhpáhusas.

Beaiváduvvon 2.2.2018 dii 14:17: Lasihuvvon ođas Girjjás-čearu váidagis. Bajilčálus "Árktalaš álgoálbmogat vuođđudit filbmafoandda ja Sámi musihkkaakademiija -fidnui ohcet prošeaktajođiheaddji" rievdaduvvon hápmái "Girjjás váidá hoavvarievtti duomu ja árktalaš álgoálbmogat vuođđudit filbmafoandda".

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä