Sápmi |

Sáhkabihtážat Yle Sámis: Heasttat, čuovgagraffiti ja escape room Anáris Game Over -dáhpáhusas ja Moratoria ceggejuvvo vuot Čearretsullui

Dá leat vahku maŋimuš Sáhkabihtážat Yle Sámis.

Jietna: Moratorio
Jietna
Guldal bearjadaga Yle Ođđasiid dás. Jietna: Yle Areena.

Deanu bivdu lea álgán

Gaskaija rájes báikki olbmot leat ožžon bivdigoahtit stákkuin Deanus. Stággobivdobadji bistá gitta borgemánu 20. beaivvi rádjai. Báikki olbmuide stággobivdolohpi máksá 150 euro, earret vuolil 18-jahkásaččaide dat máksá 40 euro. Lobiin sáhttá bivdit olles bivdobaji. Ráfáiduhttináigi álgá alo sotnabeaieahkes čieža áigge ja bistá olles jándora.

Golgadeapmi, buođđobivdu ja fierbmebivdu álget geavadis easkka vuossárgga. Guolleturisttaid guolástanbadji Deanus álgá geassemánu 10. beaivvi ja bistá gitta borgemánu 10. beaivái. Lassedieđut Deanu bivdonjuolggadusain gávdnojit EJB-guovddáža neahttasiiddus.

Moratoria ceggejuvvo vuot Čearretsullui

Dál go Deanu bivdu lea álgán, ceggejuvvo vuot moratoria Čearretsullui, bajábeallai Sámi Šalddi, lahka Ohcejoga. Ellos Deatnu -lihkadus dieđiha, ahte Čearretsullo moratoria lea fámus nu guhká, go Deanus leat dakkár bivdonjuolggadusat, mat dohkkehuvvojit báikkálaš dásis. Ellos Deatnu -joavku ceggii vuosttas háve diibmá Moratoria Čearretsullui , ja dainna figget bissehit Deanu bivdonjuolggadusaid Čearretsullo lahkosiin.

SOG fievrridišgoahtá ohppiidis Avvilis Anárii boahtte čavčča

Sámi oahpahusguovddáš ordnegoahtá boahtte čavčča rájes ohppiidis linjábiilasáhtu Avvilis Anárii. Sámi oahpahusguovddáža rektora mielde ohppiid sáhtut gusket birrasii 40 oahppi, muhto fálaldagat leat bivdojuvvon 55 báikki linjabiillas. Fálaldatgilvvus oahpahusráđđehus bivdá Sámi oahpahusguovddážii ohppiid sáhtu skuvlabeivviide Avvilis Anárii ja ruovttoluotta. Ohppiid sáhtuid fálaldatgilvvus fálaldaga sáhttá addit geassemánu 8. beaivvi rádjái.

Paltto bargojovkui, mii čielggada Jiekŋameara ruovdegeainnu máđidjamolssaeavttu Girkonjárgii

Johtolat- ja birasministeriija lea ásahan Suoma- ja Norgga gaskasaš bargojoavkku čielggadit Jiekŋameara ruovdegeainnu máđidjamolssaeavttu Girkonjárgii. Sámedikki stivra lea nammadan bargojovkui sámedikki vuosttas várreságadoalli Heikki Paltto ja su várrelahttun nuppi várreságadoalli Tuomas Aslak Juuso. Bargojoavkku ságadoallin doaibmá johtolatráđđeolmmoš Sabina Lindström. Bargojoavkku doaibmabadji lea 9.5.-14.12.2018.

Heasttat, čuovgagraffiti ja escape room Anáris Game Over -dáhpáhusas

Anára gieldda Selvä Peli -bargojoavku ordne lávvardaga 2.6.2018 Game Over -dáhpáhusa Anáris diibmu 17-21. Dáhpáhus ordnejuvvo vuosttas geardde Anáris, ovdal dat lea álo leamašan Avvilis. Báikin lea Anára skuvlla šillju.

Dáhpáhusas leat olu sierra doaimmat ja nuvttá borramuš, vai nuorain lea juoga suohtas dáhpáhus, go skuvllat nohket.

– Dán dáhpáhusa ulbmilin lea ordnet nuoraide skuvllaid nohkama áigái dáhpáhusa, ahte nuoraide livčče molssaeaktu, vai eai dárbbašivčče mannat gillái juhkat dahje geavahit eará gárrenmirkkuid, dadjá Sámedikki nuoraidčálli Kaisa Tapiola-Länsman, guhte gullá dáhpáhusa bargojovkui.

Game Over –dáhpáhusas lea máŋggabealat prográmma, muitala Tapiola-Länsman.

– Nuoraidguovddáš Vasatokka ordne ovdamearkka dihte dakkár escape room, mas nuorat fertejit hutkat, mo sii besset dan lánjas olggos. Anára skuvlašiljus leat ovdamearka dihte heasttat, čuovgagraffiti ja vaikkoba karaoke.

Divvojuvvon 1.6. dii 21:50: Muitaleimmet vuos, ahte dáhpáhusbáikin livčče maiddái nuoraidguovddáš Vasatokka Rivdolis. Dáhpáhus lea goit ollásit Anara skuvllas. Nuoraidguovddáš Vasatokka lea dáhpáhusa ordnemis mielde.

Sano se saameksi -siidu lea jorgaluvvon anáraš- ja nuortalašgielaide

Yle ruhtadan, neahtas doaibmi Sano se saameksi -frásasátnegirji almmustuvai jagis 2016 vuos davvisámegillii. Dál Sano se saameksi -prošeavtta dahkkit leat jorgalan dan maiddái Suoma vehádatsámegielaide, anáraš- ja nuortalašgielaide. Sano se saameksi -siidu earet eará oahpaha geavaheaddjiide áittavuloš sámegielaid birra ja seammás ealáskahttá sámegielaid.

Sano se saameksi vuittii stáhta dieđualmmustahttima bálkkašumi jagis 2017. Siiddu leat giitalan ovdamearkan das, ahte dat váldá vuhtii viiddes suopmelaš čuozáhatjoavkku ja lasiha áddejumi sámegiela ja -kultuvrra birra.

Avvila girdigieddi nammaduvvon jagi 2017 girdigieddin

Finavia lea válljen Avvila girdigietti jagi 2017 girdigieddin. Dán namahusa dat lea ožžon ovdalge, jagis 2001. Nammadeami ákkastallet dainna, ahte girdigietti jođihanbargu lea ovdánan ja bargit leat čatnasan bargosadjái. Avvila girdigieddi bođii maid vuosttasin gažadeames, mas čielggadedje dan, man duđavaččat Finavia girdimátkkošteaddjit leamašan girdigieddái.

Varrasamosat: Sápmi

Váldoođđasat

Varrasamosat

Muualla Yle.fi:ssä