Sápmi |

Sáhkabihtážat Yle Sámis: Jagi hbtiq-aktivistta jienasteapmi álgá ja vel geargá ohcat Chubbuck Sápmi -neaktinbargobádjái

Dá leat gaskavahku sáhkabihtážat.

Sápmi Pride
Anne Olli lea evttohassan jagi hbtiq-aktivistan QX-bláđi QX-Awardsis. Govva: Ville-Riiko Fofonoff / Yle

Hbtiq-jienasteapmi álgá

Davviriikalaš seksuálavehádagaid áššiid gieđahalli QX-bláđi QX Awards jienasteapmi álgá odne. QX Awardsis leat mielde oktiibuot 15 sierra kategoriija ja kategoriijat evttohasaiguin leat ovdanbuktojuvvon bláđi neahttasiidduin.

Anárlaš Anne Olli lea mielde jienasteamis. Son lea evttohuvvon jagi hbtiq-aktivistan. Olli oaččui evttohasvuođa, go lei diibmá oktan váldolágideaddjin Sápmi Pride –dáhpáhusas Anáris.

Jienasteapmi álgá odne qx.fi-neahttasiiddus. Vuoittit almmuhuvvojit QX Awards -gálas Glorias Helssegis lávvardaga 25.8.

Vel geargá ohcat Chubbuck Sápmi -neaktinbargobádjái

Otne gaskavahku lea maŋimuš beaivi ohcat neavttár Ingá Márjá Sarre neaktinbargobádjái. Bargobádji ordnejuvvo Anáris nuoraidguovddáš Vasatokkas borgemánu 16.-17. beaivve. Bargobáji váldogiella lea davvisámegiella.

Bargobájis Sarre oahpaha Chubbuck-teknihkka. Dat lea amerihkálaš Ivana Chubbuck 12 oasi neavttármetoda, man ulbmilin lea hábmet čiekŋalis ja jáhkehahtti karaktera. Kursa lea oaivvilduvvon 15-30-jahkásaš nuoraide, geat leat beroštuvvan neaktimis dahje filbmasuorggis.

Liŋkka almmuhanskovvái gávdno dás ja lassediehtu gávdno dás.

Fálaldagaid bivdin Sáná ráhpaid huksenbarggus álgá

Fálaldagaid bivdin Sáná ráhpaid huksenbarggus álgá. Sáná boares ráhpáid burge mannan gease Gilbbesjávrris, go dat ledje heajos ortnegis. Ođđa ráhpaid háhkan lea aiddo jođus, ja dat galggaše leat geavahusas geasset 2019. Sáná bálgáide dahkat jahkásaččat sulaid 25 000 galledeami.

Meahciráđđehusa Luonddubálvalusat ordnejit oahpásmuvvantuvrra ođđa ráhpaid báikái disdaga 28.8. diibmu 9. Vuolgga tuvrii lea Malla parkerensajis.

Anára searvegottis nuoraidbargi virgi ohcanláhkái

Anára searvegoddi ohcá nuoraidbargi. Bargu álgá skábmamánu álggus dahje soahpamuša mielde. Virgi sisttisdoallá buot nuoraidbarggu guovddáš doaimmaid searvegottis, sihke fierpmádatovttasbarggu eará doibmiiguin.

Virggi gelbbolašvuođaeaktun lea bismmáidčoahkkima dohkkehan girku nuoraidbargi dutkkus. Virgehálddašeaddjis gáibidit maiddái sámegiela dáiddu dahje čatnaseami dan háhkamii. Válljejuvvon galgá leat konfirmerejuvvon ja suoma evangelalaš-luteralaš girku lahttu.

Čálálaš ohcamušaid galgá doaimmahit 24.8.2018 diibmu 14 rádjái Anára searvegoddái.

Varrasamosat: Sápmi

Váldoođđasat

Varrasamosat

Muualla Yle.fi:ssä